Bulengele budi kabuyi bufubidila

WALTER De la Mare wakamanyisha ne: “Bulengele budi bujimina; bulengele budi bupita.” Ke mudibi menemene bua bilongo bilenga bia cactus bidi bileja apa. Butumbi buabi budi bufubidila ne lukasa luonso.

Yakobo, mulongi muena nkristo, mmufunde ne: “[Muntu mubanji] neapite bu tshilonga tshia tshisosa. Bualu, dîba didi dipatuka ne luya luadi ludi luosha, ne nediumishe tshisosa, ne tshilongo tshiatshi netshipone, bulengele buatshi budi bujimina. Nenku, kabidi ke muafubidila mubanji mu njila yende ya muoyo.”​—Yakobo 1:10, 11.

Bu mudi bulongolodi ebu buikale bua mpukapuka mivule, bubanji budi mua kujimina mu tshimpitshimpi. Kabidi, muntu mubanji​—amu bu mukuabo kayi yonso—​udi ne ‘muoyo muipi, bu wa tshilongo.’ (Yobo 14:1, 2) Yezu wakafila tshimfuanyi tshia muntu uvua muditue ne kasuki mu diunguija bubanji bua kumona mua kudiolola ne kusanka mu matuku ende a muoyo. Kadi, pakatshinkaye bua se: ukavua ne bionso bivua bikengedibua bua kuikala ne nsombelu ukena tunyinganyinga, wakafua. Yezu wakafila didimuija edi ne: “Ke mudibi bua muntu udi unguija biuma buende yeye muine, kadi kayi mubanji kudi Nzambi.”​—Luka 12:16-21.

“Mubanji kudi Nzambi.” Ntshinyi tshivua Yezu musue kumvuija? Muntu udi ne bubanji bua mushindu’eu udi ne “biuma mu diulu”​—muena lumu luimpe kudi Nzambi. Tshiuma etshi katshiena mua kufubidila tshiendelele. (Matayi 6:20; Ebelu 6:10) Pamutu pa kuikala bu tshilongo tshidi tshifubidila, muntu eu mmufuanyikija mu Bible ne mutshi udi mabeji awu kaayi afubidila. Ne tudi ne dishindika dia se: “bionso bidiye wenza nebilubuluke.”​—Musambu wa 1:1-3, 6.