“Tshimanyinu tshia mu diulu”

LUSUMUINU kampanda lua kale ludi luamba ne: “Padi kuulu kukunza ku dilolo, kudi kumanyisha tshikondo tshilenga. Padi kuulu kukunza mu dinda, atshi ndidimuija dia tshikondo tshibi kudi bena luendu.” Lelu’eu, badi batumika ne bintu bivule bua kudianjila kumanyisha bikondo: satelite, malonga adi atangila nshintulukilu wa luya, biamu bia radar wa Doppler ne mishindu mikuabo bua kudianjila kumanyisha bikondo. Nansha bikale nanku, kudianjila kumanya bikondo kutu misangu mivule mu diumvuangana ne lusumuinu lutuatedi kuulu eku.

Baluishi ba Yezu bena malu a Nzambi bakamulomba “tshimanyinu tshia mu diulu,” bualu kampanda bua pa buabu buvua ne bua kubatuisha ne: uvua Masiya. Wakamba ne: “Patu dilolo dilua, nutu ne tshibidilu tshia kuamba ne: ‘nekuenzeke tshikondo tshilenga, bualu diulu ndikunze bu kapia’; ne mu dinda: ‘Lelu’eu mvula nealoke, bualu diulu ndikunze bu kapia, kadi, kuulu nkumueneke kubi.’ Nudi bamanye mua kujandula tshimuenekelu tshia diulu, kadi kanuena bakumbane mua kumvuija bimanyinu bia bikondo. Bena tshipungu tshia bantu babi ne bendi ba masandi badi batungunuka ne kukeba tshimanyinu, kadi, kabakubapesha tshimanyinu tshikuabu, pa kumbusha tshia Yona.”​—Matayi 16:1-4.

Bena lukuna ba Yezu bavua mua kudianjila kumanyisha tshikondo, kadi, kabavua bakumbane mua kujingulula malu a mu nyuma. Tshilejilu: “tshimanyinu tshia Yona” ntshinyi? Kunyima kua yeye mumane kupitshisha matuku matue ku asatu mu difu dia mushipa munene, Yona, muprofete wa Nzambi, wakalongesha ku Ninive, ke muakaluaye tshimanyinu bua tshimenga atshi, tshimamuende wa bukalenge tshia ditunga dia Assyrie. Bena mu tshikondo tshia Yezu bakapeta “tshimanyinu tshia Yona” pavua Kristo mupitshishe matuku asatu mu lukita ne kubiishibua ku lufu. Balongi bende bakafila bumanyisha pa muanda eu, ne Yezu uvua tshimanyinu bua bena mu tshikondo atshi.​—Matayi 12:39-41.

Musangu mukuabo kabidi, balongi ba Yezu bakamulomba “tshimanyinu” tshia “dikalaku” diende bu Mukalenge mu matuku avua ne bua kulua. Bu diandamuna, wakafila tshimanyinu tshinene tshivua ne malu mashilangane munda bu mudi: mvita ya kafuafuayi, dizakala dikole dia buloba, bipupu bia masama ne dimanyisha pa buloba bujima dia dijadikibua dia Bukalenge bua Nzambi bua mu diulu.​—Matayi 24:3-14.

Udiku mujingulule tshimanyinu tshia dikalaku dia Kristo bu Mukalenge wa mu diulu ukena-umueneka anyi? Mianda ya mu tshimanyinu etshi idi yenda ikumbana mu tshikondo tshietu etshi. (Matayi 24:34) Netuambe tshinyi bua matuku atshilualua? Bible kên’amu usokolola ne: nshikidilu wa bulongolodi ebu bua malu wasemenyi, kadi, udi kabidi udianjila kumanyisha ne: munya wa dituku dipiadipia dilaya kudi Nzambi ukadi pa kubanda mpindieu, ukenka ne wela nsese, bua bukua-bantu.​—2 Petelo 3:13.