“Katuena mua kuenza anu bu badi bayukidilangana!”
MIKAELE, mulumbuluidianganyi, uvua ne bua kuikala muyukididianganyi wa dilambu. Mudimu wende uvua ukengela kuenza nenku. Kadi kunyima kua bidimu 16 bia dibaka, Mikaele uvua ne bua kuitaba se: pavuaye upingana ku nzubu kuvua mukajende, Adrienne, dimanya diende dia mua kuyukidilangana divua dijimima. “Dijanangana, ditandishangana, dipetulangana bua tulemalema, disendekangana,” ke bidi Mikaele uvuluka, “Adrienne ne meme tuvua anu mu matandu a dielangana mpata, ne mvua ngela meji se: nebitutekeshe. Meme kudiebeja se: ke dine dibaka edi anyi? Peshi dijikangana ku mêyi dia munanunanu dia kanyinganyinga ne dikolesha mianda. Pikala nsombelu wetu wa mu dibaka nenku bua matuku adi mashale a muoyo wetu pamue, buanyi meme, ndi mua kupatukamu—tshiena ngelesha bilele to. Tshiena mua kutantamena bidimu 20, 30, 40 bia dikolesha malu ne ditandangana bia mushindu’eu.”
Ngenyi ya mushindu’eu kayena anu bua Mikaele ne Adrienne to. Ke mudi nsombelu bua bena dibaka bavule badi ne malanda a diluishangana ne dilekela mvita bitua bishilangana muaba. Diyukidilangana dikese patupu didi ditayika dikudimuka mvita. Batu “bumvua” bintu bidi muena dibaka nabo kayi muambe. Badi bamba bidibo kabayi bela meji. Badi baluishangana ne babandangana, pashishe badi bashala ne lukinu bapudikile. Kabena batapulukangana, kadi kabena bulelela “musunyi umuepele.” (Genese 2:24) Malanda abo mmanyanguke. Kualukila tshia nyima kudi kumvuija ditapulukangana; kuya kumpala kudi kumvuija kupetangana ne mpata ya buludiludi. Bua kuepuka dikenga dia ku bintu ebi bibidi, bena dibaka aba badi badilekelela bua kulama diepukangana munkatshi muabo bua kabavu kubuela mu dielangana mpata.
Bena dibaka ba mushindu’eu badi ne bua ‘kupeta bulombodi bua dilambu’ mu dibaka diabo. (Nsumuinu 1:5) Bulombodi ebu budi mu Bible, Dîyi dia Nzambi. Mukanda muibidi wa Paulo mutumina Timote udi ujadika ne: Bible “udi ne mushinga bua kulongesha, bua kubela, bua kupingajilula malu mu bulongame.” (2 Timote 3:16) Ke mudibi bienzeka mu dilongolola diyukidilangana dia mu dibaka, anu bu mutuabimona mu tshiena-bualu tshidi tshilonda.