Amu bu mpasu

UKADIKU dituku kampanda mukosoluela mu tshipela mu muvu wa été, ne wewe kumona mpasu bungi kabuyi kubadika, itumpika ku makasa ebe anyi? Bivua bimueneke amu bu ivua ipatukila ku nseke yonso, pabi, kuvua mua kuikala mubijingulule menemene to. Ndekelu wa bionso, ivua imueneka miena ditalala ne ya patupu.

Bushuwa, mpasu ntshimanyinu tshia bukua-bantu, bualu idi mitambe bukese. Bamue bantu bende lumu badi mua kudiangata ne mushinga mutambe kubandila, kadi Mufuki wetu udi wela meji mushindu mushilangane. Muprofete wende Yeshayi wakamba ne: “Kudi kampanda udi musombe pa tshijengu tshia buloba, udi [wangata] bantu badi basepu bu mpasu.”​—Yeshayi 40:22.

Buneme, bukole ne meji bia Yehowa Nzambi bidi bimubandisha ku mutu kua bantu batambe bukese, amu bu mudi muntu mutambe mpasu ku lungenyi ne ku bukole. Kadi, tshikadilu tshia Nzambi tshitambe bunene, ndinanga. Ne dinanga edi dikena kuelekeja ke didi dimusaka bua kututabalela, kutuambuluisha ne kutukuatshisha​—amu bituamunanga ne kabidi bituamutumikila. Yehowa udi utuangata ne dinanga dionso nansha mutudi bu mpasu ya patupu. Mufundi wa misambu wakamba ne: “Nnganyi udi bu Yehowa, Nzambi wetu, Yeye udi muenze tshisombedi tshiende muulu? Udi udipuekesha bua kutangila mu diulu ne pa buloba. Yeye utu ubiisha mukese mu dimfuenkenya.”​—Musambu wa 113:5-7.

Amu bu mudi Musambu eu ubiumvuija, Yehowa udi wambuluisha mukese ne dinanga dionso. Eyowa, udi wambuluisha aba badi ne budipuekeshi ‘bakeba Nzambi, bua kumonabu mua kumupeta menemene.’ (Bienzedi 17:27) Aba badi bapeta Nzambi​—ne bamusadila—​badi mene balua bantu ba mushinga mukole ku mêsu kuende. (Fuanyikija ne Yeshayi 43:4, 10.) Nenku, mpasu mupuekele udi utuvuluija mutudi bantu batambe bukese ne dinanga dia Mutufuki wetu Wa-Bukole-Buonso, udi ufila buimpe buende bukêna butukumbanyine kudi bantu bena butumike. Utuku uleja dianyisha bua dinanga dia Nzambi anyi?