Tshikondo tshia dinowa!
BUA tshinyi malu a kale a “bena nkristo” adi abengangana ne disua dia Kristo? Bantu bavule bena meji batu badiebeja lukonko elu, kadi Yezu wakamana kuluandamuna kukadi kupita bidimu pabuipi ne 2 000 mu lusumuinu kampanda. Wakakula bua “muntu kampanda wakakuna maminu mimpe mu budimi buende.” Pashishe, “muluishi wende wakalua ne kusakidila bisosa bibi munkatshi mua blé.” Pakatoloka maminu, bena mudimu bakamona bisosa bibi ne bakasua kubitula. Kadi, muntu awu wakamba ne: “Lekelayi wonso abidi adiunde pamue too ne ku dinowa.” Pafika tshikondo tshia dinowa, badi ne bua kutapulula blé ku bisosa bibi.—Matayi 13:24-30.
Yezu, pavuaye umvuija lusumuinu elu wakamba ne: yeye muine uvua eu wakakuna “maminu mimpe”—bena nkristo balelela. Muluishi uvua Satana, eu wakasakidila “bisosa bibi”—wakabueja bena nkristo ba dishima mu tshisumbu. Yezu wakalekela bua bena nkristo ba dishima ne balelela bikale kaba kamue—kadi anu too ne ku dinowa. Pashishe, nebatapuludibue.—Matayi 24:36-44.
Pabi, kabiena bitukemesha patudi tumanya se: malongolodi a “bena nkristo” mu dipita dia nkama ya bidimu kabena batumbishe Nzambi pa kuangata malongesha a bampangano, kulengulula tshiendenda tshia masandi, batua mvita ya dikuata bakuabu ku bupika nyama ku mikolo, kabidi balombola tubadi tua dilumbuluisha bantu bavua ne malongesha mashilangane ne a bena Katolike. Tudi tujingulula mu bionso abi maminu mabi avua Satana mukune. Kadi, patudi tubala malu a bantu bavuabo bakengeshe mu buloko anyi a aba bakafua pamutu pa kushipa mêyi-maludiki a mu Bible, tudi bamone se: maminu mimpe kaavua matudibue.
Yezu wakamba ne: dinowa divua “nkomenu wa bulongolodi bua malu.” Bu mutudi mu tshikondo tshia nkomenu wa bulongolodi ebu bua malu, etshi tshidi ne bua kuikala tshikondo tshia dinowa! Nenku, ditapulula ndimane kutuadija pankatshi pa bena nkristo balelela ne ba dishima. Lelu’eu, kudi tshisamba, kadi ki mbantu palepale to, badi bakumbaja bivua Yezu muambe bua bena nkristo balelela—badi bakokela Bukalenge bua Nzambi ne bamanyisha lumu luimpe pa bidi bitangila Bukalenge ebu, badi bakuata ne manza abidi ngikadilu mimpe miashila pa Bible ne babenga malongesha a bampangano, kadi, badi batumika ne bulelela budi mu Bible. Badi bamanyisha dîna dia Nzambi patoke ne kabayi badibueja mu mianda ya mu bulongolodi ebu.—Matayi 6:33; 24:14; Yone 3:20; 8:32; 17:6, 16.
Tudi tukujadikila se: tshisamba tshia mushindu’eu tshidiku! Udiku pebe musue kusadila Nzambi mu mushindu udi umulengelela anyi? Nenku, keba bantu aba ne sadila Nzambi pamue nabu.