Bena nkristo bena Grande-Bretagne ba mitalu

Bilondeshile tshikandakanda tshia The Economist, bantu bashadile ku 10 pa lukama ba ku bena Grande-Bretagne miliyo 56, badi lelu’eu bena nkristo ba mitalu. Bushuwa, bantu bungi bushadile ku miliyo inayi ba munkatshi muabu badi babuela mu masangisha a mu dia lumingu. Bena [tshitendelelu tshia] Anglikane badi anu 1 100 000. Kadi, nansha mudi dibenga kuitabuja difukibua dia bionso bikena bimueneka kudi Nzambi dimuangalake, Ekleziya wa ku Angleterre udi utungunuka ne kukuata mudimu wende bu tshitendelelu tshia mbulamatadi. Tshikandakanda atshi tshidi tshisakidila ne: “Kudi mpindieu bidimu bivule, bena Grande-Bretagne kabatshiena bena nkristo, kadi, nangananga bua kanyinganyinga, kabena bitaba dikalaku dia bantu badi kabayi bitabuja difukibua dia bionso bikena bimueneka kudi Nzambi.” Nenku, kabiena bikemesha nansha kakese lelu’eu padi bena mianda ya politike ne [bafundi ba] bikandakanda balomba ditapulula dia Ekleziya ne mbulamatadi.

“Bulongolodi budi budiamba mudibu buena-nkristo, eku budiine ne kasuki mu mianda ya bena mu bulongolodi ebu, mbulongolodi bubi menemene,” ke muakadiabakena Walter Bagehot mufundi-muludiki wa tshikandakanda tshia The Economist wa mu siekele wa 19. Kadi, mu siekele wa kumpala B.B., bua balongi bende, Yezu Kristo wakamba ne: “Kabena ba mu bulongolodi ebu, bu mundi meme tshiyi wa mu bulongolodi ebu.” (Yone 17:16) Kabidi, wakabatuma pa buloba bujima bua kumanyisha Bukalenge bua Nzambi. Bia muomumue lelu’eu, Bantemu ba Yehowa mbamanyike bimpe pa buloba bujima bua mitalu mu buambi bua “patoke ne ku nzubu ne ku nzubu.”​—Bienzedi 20:20.

Pa kubafuanyikija ne ba-Anglikane, Bantemu 126 173 badi mu Grande-Bretagne badi bungi bukese. Kadi, badi bapitshisha mêba matue ku 20 ku ngondo mu bisangilu bia bena nkristo. Kusakidila ku apu, mu 1992, Ntemu yonso uvua mupitshishe mwayene wa mêba 16 mu buambi bua lumu luimpe lua Bukalenge bua Nzambi, mbulamatadi walua pashishe kuasa bulongolodi bupiabupia buakane. (Matayi 24:14; 2 Petelo 3:13) Pakukumbula Bantemu ba Yehowa ku nzubu kuebe musangu walonda, neutelejeku mukenji wabu musunguluke ne kujingulula tshidi tshisaka mitalu yabu anyi?