Nkonko ya babadi

Bu muvua muakuidi wa kale uvuabu babikile ne: Melkisedeke muikale muntu mulelela, bua tshinyi Bible udi wamba ne: “kavua ne bankambua”?

Mbaleje lungenyi elu mu Ebelu 7:3. Tukonkononayi diumvuija dia mvese eu bilondeshile miaku idi ku mutu ne idi kuinshi:

“Bualu bua Melkisedeke, mukalenge wa Salema, muakuidi wa Nzambi Mutambe Bunene, wakaya bua kututakena ne Abrahame pavuaye yeye muine, ufuma ku dibutula bakalenge, ne wakamubenesha, ne nyeye uvua Abrahame mupeshe tshia-dikumi tshia ku bintu bionso, udi diambedi, bilondeshile nkudimuinu, ‘Mukalenge wa buakane,’ ne pashishe udi kabidi mukalenge wa Salema, mbuena kuamba ne: ‘Mukalenge wa ditalala.’ Kayi tatu, kayi mamu, kayi bankambua, kayi ne ntuadijilu anyi ndekelu wa matuku peshi ndekelu wa muoyo, kadi wakenjibua mushindu wa muomumue ne Muana wa Nzambi, udi ushala muakuidi bua tshiendelele.”​—Ebelu 7:1-3.

Amu bu mutukavua babifunde, Melkisedeke uvua muntu mulelela, mulelela amu bu muvua Abrahame, wakapetanganaye nende buludiludi. (Genese 14:17-20; Ebelu 7:4-10) Bu mudibi nanku, Melkisedeke uvua ne bua kuikala ne baledi, tatu ne mamu, ne pamu’apa ne ndelanganyi kabidi. Pa nanku, bu muvuaye muntu, uvua ne bankambua, mbuena kuamba ne: mulongolongo wa bankambua. Bia muomumue, muoyo wende wakapeta nshikidilu. Bilondeshile mêyi adi Paulo mufunde mu Lomo 5:12, 14, Melkisedeke wakafua. Kadi, bu mutudi katuyi bamanye dituku diakafua Melkisedeke ne diakalekelaye kusadila bu muakuidi, mu ngumvuilu awu: wakasadila kakuyi nshikidilu mumanyike.

Mu mukanda wende kudi bena Ebelu, Paulo udi wakula bua Melkisedeke padiye umvuija bua Yezu Kristo bu Muakuidi Mutambe Bunene. Pa kuangata Melkisedeke bu tshilejilu tshivua tshileja Yezu mu muanzu wende wa buakuidi, Paulo udi wamba ne: “Yezu . . . wakalua muakuidi munene mushindu wa muomumue ne Melkisedeke.” (Ebelu 6:20) Mmu ngumvuilu kayi?

Paulo wakajingulula se: Bible kêna ufila diumvuija disunguluke pa bidi bitangila dilondangana dia bena mu dîku dia Melkisedeke​—bankambua bende anyi ndelanganyi yende pavuaye mua kuikala nayi. Bible ki mmutambe kuakula pa muanda eu to. Pa nanku, ku mmuenenu uvua Paulo mumanye anyi utudi bamanye, nenku tudi mua kuamba bimpe bitambe bua Melkisedeke se: “kavua ne bankambua” (Les Saintes Ecritures​—Traduction du monde nouveau; Osty; Jérusalem; Segond), “a kayi bankambua” (W. J. Conybeare) anyi “ukena ne mulongolongo wa bena dîku.”​—J. B. Phillips.

Mmu ngumvuilu kayi muvua Yezu mufuanangane nende? Bushuwa, tudi bamanye se: Yehowa ke udi Tatuende wa Yezu, ne pakaluaye muntu, mamuende uvua Mariya wa mu tshisa tshia Yuda. Pabi, kuvua difuanangana pankatshi pa Melkisedeke ne Yezu. Mmunyi muvuabi nanku? Yezu kavua muledibue mu tshisa tshia Lewi to, tshisa tshia bakuidi mu ditunga dia Izalele. Tòo, Yezu kakalua muakuidi ku diambuluisha dia bankambua ba pa buloba. Bivua kabidi bia muomumue bua Melkisedeke, wakalua muakuidi “kabiyi ku diambuluisha dia mukenji wa diyi-dituma bilondeshile nsombelu wa ku mubidi,” mbuena kuamba se: pa kuledibua mu tshisa ne mu dîku dia bakuidi. (Ebelu 7:15, 16) Pamutu pa kulua muakuidi ku butuangaji bua tatu kampanda uvua yeye muine muakuidi, Yezu “wakabikidibua mu mushindu musunguluke kudi Nzambi ne: muakuidi munene mushindu wa muomumue ne Melkisedeke.”​—Ebelu 5:10.

Kupita apu, Yezu kavua ne ndelanganyi anyi ne bamupinganyi mu buakuidi buende. Mu ngumvuilu eu kabidi, kavua ne bankambua. Neakumbaje bua kashidi mudimu wende wa muakuidi pa kulongesha ne kuambuluishangana. Paulo wakumvuija bidi bitangila disadila edi dia kashidi, pakambaye ne:

“Bu mudi [Yezu] ne muoyo bua kashidi, kêna ne bamupinganyi mu buakuidi buende. Bu tshipeta, mmukumbane kabidi bua kupandisha kashidi aba badi basemena kudi Nzambi ku butuangaji buende, bualu udi anu ne muoyo bua kubakuila.”​—Ebelu 7:24, 25.

Dikonkonona dietu dia miaku ya Paulo idi mu Ebelu 7:3 divua ne bua kupita mmuenenu patupu wa dimanya dia kulama mu mutu muetu. Divua ne bua kukolesha dianyisha dietu bua ndongoluelu muwule tente ne dinanga udi Yehowa muenze bua tuetu kupeta dilekedibua dia mpekatu dia kashidi, ne mushindu udiye mutuakajile malu bua kupeta diambuluisha ne bulombodi bia kashidi.