Amu bu mutshi

“MISAMBU ya tusala mienza kudi tshileyaleya bu meme, kadi anu Nzambi ke udi mua kuenza mutshi.” Pa kuzangika ngikadilu mimpe ya mitshi, mufundi wa misambu Joyce Kilmer wakajadika difukibua diayi kudi Nzambi.

Yehowa Nzambi wakafuka mitshi ya mishindu kabukabu, mishilangane ku bulengele ne ku dikengedibua diayi. Nansha yoyi mikale ya tumpatama anyi milemile ya kafiondo, idi mua kuikala milengele mushindu ukêna kumvuija. Kabidi, idi ipetesha biakudia, biakutemesha nabi kapia ne maleji a kuikishila [munya]. Ku musangu ne ku musangu, bakebuludi badi bajingulula mushindu mupiamupia wa kutumika ne mitshi.

Mu Bible, batu imue misangu batumika mu tshimfuanyi ne mitshi bua kufunkuna makalenge, bakokeshi, ne bantu. (Yehezekele 31:1-18; Danyele 4:10-26) Mitshi itu kabidi misuikakaja ku disanka, ditalala ne nsombelu wa dilubuluka udi ufuma ku bukokeshi bua Yehowa ne dijadika tshiakabidi tshisamba tshiende. (1 Kulondolola 16:33; Yeshayi 55:12; Yehezekele 34:27; 36:30) Mifundu idi kabidi ilaya se: matuku a bena tshisamba tshia Nzambi neikale bu a mutshi. (Yeshayi 65:22) Mulayi eu udi ne diumvuija dinene patudi bamanye se: imue mitshi itu ishala ne muoyo siekele ne siekele.

Umue wa ku bafundi ba misambu ya mu Bible wakamba ne: muntu udi usankila mu mikenji ya Nzambi “nealue bushuwa bu mutshi mukuna ku muelelu wa mâyi, udi ukuama mamuma awu mu tshitshia tshiawu ne udi mabeji kaayi afubidila, ne malu ende wonso adiye wenza nealubuluke.” Mutshi mulengele mukuna ku kaala ka mpokolo wa mâyi mavule uvua uvuluija mufundi wa misambu didiunda dia mu nyuma dia eu “udi disanka diende dikale mu mikenji ya Yehowa.” (Musambu wa 1:1-3) Bushuwa, biwikala usankila mu mikenji ya Nzambi ne Dîyi diende dinsantu, matuku ebe adi mua kulua bu a mutshi. Pa nanku, ku dienza malu mu diumvuangana ne dimanya dijalame dia Yehowa Nzambi ne Yezu Kristo, udi mua kutekemena bua kupeta muoyo wa kashidi.​—Yone 17:3.