Nyemena kudi Yehowa
“Kûdi, Ô Yehowa, ke kundi nnyemena.”—MUSAMBU WA 31:1.
1. Mmu ngumvuilu kayi mudi Musambu wa 31 uleja dieyemena mu diakanyina dia Yehowa bua kuikala tshinyemenu?
DÎYI dia musambu didi diumvuika, didi divuluija muntu kampanda uvua, nansha muvuaye mupungile mu lungenyi ne ku mubidi, muye kudifila ne kasuki kudi Yehowa. Ditabuja didi ditshimuna, ke tshidi mêyi a musambu eu munsantu wamba. Mu maboko a Wa-Bukole-Buonso adi mamuindile, muntu eu udi upeta muaba wa kunyemena bamukengeshi bende badi bamuipatshila. “Kûdi, ô Yehowa, ke kundi nnyemena,” ke mudi musambu eu utungunuka nunku. “Oh! tshifu bundu nansha bukese! Mu buakane buebe ungambuluishe bua kudiopoka.”—Musambu wa 31:1.
2. (a) Mmakunji kayi abidi padi dieyemena dietu kudi Yehowa, muaba-mukolesha wetu, diashile? (b) Yehowa n’Nzambi wa mushindu kayi?
2 Kangimba udi ne tshinyemenu tshimuepele—muaba mulenga mupite mikuabu! Nansha bikala mpata yedibua bua malu makuabu, bualu bulelela budiku mbua se: Yehowa ng’wende muaba-mukolesha, n’lumbu luende. Dieyemena diende ndiashila pa makunji abidi mashindame. Dia kumpala, nditabuja diende, dikala Yehowa kayi mua kufuisha bundu musangu nansha umue, ne dibidi, mbuakane bua Yehowa, budi buenza bua se: kalekedi tshiendelele mumusadidi Wende. Yehowa ki n’Nzambi udi ufuisha bamusadidi bende bundu, udi kayi ukumbaja dilaya diende nansha. Kabiyi nanku, udi Nzambi [muambi] wa bulelela, udi ufuta aba badi bamueyemena ne muoyo umue. Ndekelu wa bionso, ditabuja nedifutshibue! Lupandu neluvue!—Musambu wa 31:5, 6.
3. Mmunyi mudi kangimba utumbisha Yehowa?
3 Mu dilongolola diende dia mijiki ya mêyi matue mashilangane, idi ituadija panshipanshi mu bisama ne diakabi abanda ne mu katongobela ka dieyemena, kangimba udi umvua bukole kampanda budiunda munda muende. Udi upa Yehowa makumbu bua dinanga Diende dia lulamatu. “Yehowa abeneshibue,” ke mudiye wimba, “bualu wavuiji bulenga-bunangi bua dikema kundi mu tshimenga mu kulubakana.”—Musambu wa 31:21.
Tshisumbu tshikole tshia tungimba tshia bamanyishi ba Bukalenge
4, 5. (a) Ntshisumbu kayi tshikole tshia tungimba tshidi tshisamuna Yehowa lelu’eu, ne mmunyi muvuatu tuenze munkatshi mua tshidimu tshia mudimu tshishale? (Tangila tabló mu dibeji dia 12 too ne dia 15.) (b) Nku tshinyi kudi bateleji bavua mu Tshivulukilu baleja ne: kutshidi kabidi bantu bavule badi bajinga mua kulua kudisangisha ku tshisumbu tshia tungimba tshia bamanyishi ba Bukalenge? (Tangila tabló.) (c) Mbanganyi badi mua kudisangisha ku tungimba etu mu tshisumbu tshienu?
4 Lelu’eu, mêyi a mu musambu eu atshidi kabidi ne bukole buawu. Muluishi nansha umue, tshipupu kayi tshionso tshia ku bintu bifuka nansha diakabi kayi dionso mu mianda ya mabanji kabiena mua kupumbisha misambu idibo bimba bua kusamuna Yehowa. Kabiyi mpata, bulenga-bunangi bua Yehowa budi bumueneka mu mushindu wa dikema kudi tshisamba tshiende. Munkatshi mua tshidimu tshia mudimu tshiashadi, bungi bubandile bua tshisumbu tshia tungimba 4 709 889 bavua bimbe mukenji wa Bukalenge bua Nzambi mu matunga 231 pa buloba bujima. Mbulamatadi wa mu diulu wa Yehowa, mulombola kudi Yezu Kristo ntshinyemenu tshidi katshiyi mua kubafuisha bundu. Tshidimu tshiashadi, bamanyishi aba ba Bukalenge, basangisha mu bisumbu 73 070, bavua bapitshishe bungi busanga bua mêba 1 057 341 972 mu mudimu wa kumanyisha evanjeliyo. Bu tshipeta, bantu 296 004 bavua baleje patoke mulambu wa bumuntu buabu kudi Nzambi pa kutambushibua mu mâyi. Ne, mbualu kayipu bua disanka buvua kabuyi butekemena buvua butulukile bateleji buonso bavua babuele mu mpuilu wa bukua-matunga wa Dilongesha dia Nzambi uvua muenzekele ku Kiev (Ukraine) mu ngondo wa Tshimungu mushale! Bakajingululamu mianda minene mivule ya mu miyuki ya Bantemu ba Yehowa: bushuwa, katshia ne katshia, luapolo kalutu luanji kufidibua pa bena nkristo balelela bungi nenku bu bavua batambushibue musangu umue! Amu bu mudibi bimanyisha mu mulayi udi mu Yeshayi 54:2, 3, tshisamba tshia Nzambi ntshidiunde ne bungi buvua katshia, kabuyi buanji kupeteka.
5 Kadi, bantu bakuabu badi bajinga kukokeshibua kudi Bukalenge bua Nzambi mbindile wabu musangu bua kuvuabu kudisanga ku tshisumbu etshi tshia tungimba. Tshidimu tshishale, mu Tshivulukilu tshia lufu lua Yezu muvua mubuele bateleji bungi bua dikema bua bantu 11 865 765. Tudi batekemene bua se: bavule ba kudibo nebakumbaje malu malomba bua kumona mua kuimba musambu wa Bukalenge ku tshiibi ne ku tshiibi mu bule bua tshidimu etshi tshia mudimu. Tshipatshila etshi tshidi ne bua kukebesha mukupa mukole kudi muluishi wa bulelela, Satana Diabolo!—Buakabuluibua 12:12, 17.
6, 7. Umvuija mushindu uvua muntu uvua ukengeshibua kudi ba-demon mufike ku dipikudibua ku diambuluisha dia Yehowa.
6 Satana neakebe mua kupumbisha bantu bakuabu bua kabasangishi abo mêyi ku a tshisumbu etshi tshikole tshia tungimba. Ke mudi bamanyishi ba mu ditunga dia Thaïlande bapetangana ne bantu bavulavulayi badi batatshishibua kudi ba-demon. Nansha bikale nanku, bantu bavule bena muoyo mulenga mbapikudibue ku diambuluisha dia Yehowa. Muntu kampanda uvua muye kutangila tshilumbú kansanga amu bua dijinga patupu dia kumanya bia bungi, wakakuatshibua ku buenzeji bua ba-demon munkatshi mua bidimu dikumi. Ne diambuluisha dia mfumu wa ekleziya kampanda, wakenza madikoleka bua kudipikula, kadi, dishilangana dia nsongo kadivuaku to. Pashishe, mumanyishi wa ku dîba ne ku dîba, Ntemu wa Yehowa, wakatuadija kulonga Bible pamue nende ne kumulongesha mushindu umuepele wa kupikudibua ku bukokeshi bua ba-demon ne kupeta dimanya dijalame dia bulelela, mua kupeta ditabuja kudi Yehowa Nzambi ne mua kumusengelela mu masambila.—1 Kolinto 2:5; Efeso 4:6, 7; 1 Timote 2:3, 4.
7 Butuku buakalonda diyukidilangana edi, muntu wakalota tatu’ende ukavua mufue; muine eu wakamutumina dîyi pa kumukanyina bua kupinganyina malanda ende ne bena lubuku. Pashishe, dîku diende diakatuadija kutatshishibua. Bu muvuaye kayi musue kulekela, muntu eu wakatungunuka ne kulonga Bible ne kutuadija kubuela mu bisangilu. Munkatshi mua dimue dia ku malonga awu, mpanda-njila awu wakamumvuija ne: imue misangu, bintu bivuabu batumika nabi mu mikiya ya kutendelela ba-spiritu babi bidi mua kupetesha ba-demon mushindu wa kutatshisha bantu badi bakeba mua kudipikula ku bukokeshi buabu. Apo, muntu wakavuluka se: uvua ne mafuta avuaye utumika nawu mu buloji buende. Wakajingulula ne: bivua bikengela kuiimansha. Katshia waiimansha, ba-spiritu babi mbamulekele talalaa. (Fuanyikija ne Efeso 6:13; Yakobo 4:7, 8.) Mukajende pamue ne yeye muine badi bela biidia bimpe mu kulonga kuabu ne badi babuela pa tshibidilu mu bisangilu bidi bipetesha bushidimunyi bua mu Bible.
8, 9. Mbipumbishi kayi bikuabu bitu bamanyishi ba Bukalenge batantamena?
8 Kudi bipumbishi bikuabu bidi mua kujika mêyi a lumu luimpe. Nsombelu mubipe mu mianda ya mabanji ku Ghana mmumbushishe bantu bavule ku midimu. Nsombelu mmukole mutambe; ke bua tshinyi mbikole menemene bua kudisumbila nansha tuntu tukese tudi tukengedibua. Mmunyi mudi bena tshisamba tshia Yehowa baakamangana ne nsombelu eu? Ndieyemena diabu, ki nkudibo nkayabu, kadi nkudi Yehowa. Tshilejilu, dituku kampanda, muntu kansanga wakashiya anvelope mukanga bimpe ku tshiakidilu tshia benyi tshia ku filiale. Mu anvelope eu muvua mfranga binunu 100 ya bena ditunga dia Ghana, ivua bungi bua difutu ditambe kupuekela ku wonso dia ngondo isatu. Nansha muvua pa anvelope kapayi pafunda dîna dia mufidi wa mfranga ayi, kadi tuvua mua kubala miaku eyi ivua mu dibeji divua dijingila mfranga eyi: “Mvua mujimije mudimu wanyi, kadi Yehowa wampeshi mukuabu. Ndi ne dianyisha kudiye ne kudi Muanende, Yezu Kristo. Bua kuambuluisha bua kumuangalaja lumu luimpe lua Bukalenge diambedi nshikidilu kayi muanji kulua, anyishayiku dianyi dikuatshisha dikese.”—Fuanyikija ne 2 Kolinto 9:11.
9 Dibuela mu bisangilu didi diambuluisha bua kulongeshibua kua aba badi balua kudisangisha ku tshisumbu etshi tshikole tshia tungimba basamunyi ba Yehowa. (Fuanyikija ne Musambu wa 22:22.) Ke bua tshinyi, ku sud wa ditunga dia Honduras, kudi tshisumbu tshikese tshidibo babikila ne: El Jordán. Mbualu kayi bua pa buabu budi butangila tshisumbu etshi? Lulamatu lua babuedi ba mu bisangilu. Pa bamanyishi 19, 12 badi ne bua kusabuka musulu munenanenayi bua kuikala mu bisangilu lumingu luonso. Mu mushipu, kakuena lutatu luvule nansha, bualu badi mua kusabuka bendela pa mabue manene. Kadi mu muvu wa mvula, mbualu bukuabu. Etshi tshivu’anu mâyi makese matambe tshidi tshilua mienji idi ipuekesha bionso bidi pa mâyi. Bua kuakama tshipumbishi etshi, bidi bikengela bua bana betu ba balume ne ba bakaji bikale buowedi ba mâyi ba dilambu. Diambedi ne kusabuka, badi bela bilamba biabu bia kubuela nabi mu bisangilu mu tina (dilongo dia dilata dinene ne diondoke) ne pashishe badijingila mu tshibombi tshia kabudimbu. Muowedi wa mâyi wa dilambu udi ulombola tshisumbu tshia basabuki pa kutumika ne tina bu tshitundubuji [peshi bu kadidi ka nshinga wa ndobo]. Padibo bafika dia muamua, badi badiumisha mubidi, bavuala bilamba ne bafika ku Nzubu wa Bukalenge ne musangelu ne babalakana ne mankenda!—Musambu wa 40:9.
Lumbu kutudi mua kusombela
10. Bua tshinyi tudi mua kutangila kudi Yehowa patudi mu tshikondo tshia dilubakana?
10 Nansha utatshishibua kudi ba-demon peshi kudi dilubakana kayi dikuabu didi difumina kukuabu, Yehowa udi mua kuikala webe muaba-mukolesha. Umubile mu disambila. Udi uteleja ne ntema yonso ku mikemu nansha mikese ya bena tshisamba tshiende. Kangimba, uvua mu nsombelu eu, ufundile ne: “Inyika ditshi diebe kundi. Unsungile ne lukasa luonso. Wikale buanyi meme dibue dia muaba-mukolesha, nzubu wa muaba-mukolesha bua kumpandisha. Bualu udi dibue dianyi ne muaba-mukolesha wanyi; ne anu bua dîna diebe, newundudike ne undombole. Newumpatule mu bukondo budibo bansokoke, bualu udi lumbu luanyi.”—Musambu wa 31:2-4.
11. Umvuija bua tshinyi lumbu lua Yehowa ki mmuaba wa musangu muîpi.
11 Yehowa kêna utupetesha tshinyemenu tshia musangu muîpi, kadi, n’lumbu lukêna kulenga kutudi mua kusombela mu dikubibua. Bulombodi pamue ne mibelu bidiye ufila kabiena bifuisha tshisamba tshiende bundu nansha kakese. Bukole bua Nzambi nebuvuije bienzedi bia meji mabi bia Satana bintu bia patupu. (Efeso 6:10, 11) Bituateka dieyemena dietu dijima kudi Yehowa, neatupikule ku mateyi a Satana. (2 Petelo 2:9) Munkatshi mua bidimu binayi bishale, matunga 35 akanyisha ku mikanda ya mbulamatadi mudimu wa kulongesha wa Bantemu ba Yehowa. Kabidi, bamue bantu bafuane mikoko badi basombele mu matunga muvua nsombelu wa bantu, wa mianda ya mabanji ne ya tshididi ipumbisha dimanyisha dia lumu luimpe mbalue kusombela mu miaba mikuabu ya pa buloba mudibo mua kubayukidila kakuyi lutatu. Japon ng’umue wa ku miaba eyi.
12. Mmunyi muvua mpanda-njila wa ku Japon muvuije Yehowa muaba-mukolesha wende?
12 Mu Japon mudi bena mudimu bavule bena tshimuangi badi bafumine mu matunga menyi, ne bisumbu bivule bia miakulu mienyi biakenjibua. Bualu buvua buenzekele muanetu kampanda wa balume muena mu tshisumbu kansanga tshia ku Japon budi buleja mudi budimi ebu bupiabupia bupatula bipeta bivule. Wakasua bua kuya kusadila muaba uvua dikengedibua dinene dia bamanyishi. Kadi, tumanye se: uvua ulombola malonga a Bible dikumi muaba uvuaye. Umue wa ku balunda bende wakamunekela wamba ne: “Biwaya muaba udi dikengedibua dinene, malonga 20 a Bible ke awatuadija kulombolaku!” Muanetu eu wakatumibua ku Hiroshima. Kadi, kunyima kua ngondo inayi, uvu’anu ne mulongi wa Bible umuepele. Dituku kampanda wakabikila muntu kansanga muena ditunga dia Brésil uvua wakula amu tshiena-Portugal. Bu muvua muanetu wa balume kayi mua kuyukidilangana ne muntu awu, wakasumba mukanda bua kulonga tshiena-Portugal. Yeye mumane kulonga bimue biambilu, wakaalukila bua kumona muntu eu. Pafikile muanetu wa balume ne kumuela muoyo mu tshiena-Portugal, muntu eu wakakema, ne difukuna mimuemue dikole, wakunzulula tshiibi tshionso e kumubueja. Bakatuadija kulonga Bible. Kunyima kua matuku makese, muanetu uvua ulombola malonga 22 a Bible: 14 mu tshiena-Portugal, 6 mu tshiena-Espagne ne 2 mu tshiena-Japon!
Tulongeshayi ne dieyemena
13. Bua tshinyi muntu nansha umue kêna mua kuteta mua kutufuisha bundu mu disadila dietu dia Yehowa?
13 Tshisamba tshia Yehowa tshidi tshimba musambu wa Bukalenge ne dieyemena dionso tshimanye se: Yehowa ke tshinyemenu tshiatshi. (Musambu wa 31:14) Kabakufuishibua bundu to—Yehowa kakubafuisha bundu nansha, bualu neakumbaje dîyi diende. (Musambu wa 31:17) Diabolo ne tshisumbu tshiende tshia ba-demon ke bafuishibua bundu. Bu mudi tshisamba tshia Yehowa tshipeshibue mudimu wa kulongesha mukenji udi kawuyi ufuishangana bundu, kabena bafuishibua bundu kudi bantu bakuabu badibo balongesha nansha. Ki mmudi Yehowa, nansha Muanende, basaka bantu bua kumutendelela to. Padi bantu ne mutshima muwule tente ne ditabuja ne dianyisha kudi Yehowa bua buimpe ne bulenga-bunangi biende, ngikadilu wabu muimpe wa mu mutshima ke udi usaka ‘mishiku yabu bua yakule.’ (Luka 6:45) Nenku, nansha bituapitshisha mêba bungi kayi buonso ku ngondo ne ku ngondo mu mudimu wa buambi, nangananga pikala dîba edi dipitshisha bilondeshile muetu muonso mutudi mua kuenza, katuena mua kufua bundu, kadi bidi disanka. Tukuta tubidi tua mukaji mukamba kampanda katuvuapu tuanyishibue kudi Yezu ne kudi Tatuende anyi?—Luka 21:1-4.
14. Mmumvuija kayi awudi mua kufila pa bidi bitangila mudimu wa bumpanda-njila? (Tangila kabidi tabló.)
14 Bua bungi buvule bua bamanyishi budi buenda buvula, kutendelela ne anyima wabu mujima kudi kumvuija kusadila bu bampanda-njila—bavua bungi bubandile bufike ku 890 231 ku ngondo yonso tshidimu tshishale! Bienzekaku didiunda edi, pamu’apa bungi ebu nebupite pa 1 000 000. Bualu bumona budi bulonda ebu budi buleja mushindu uvua muanetu kampanda wa bakaji wa ku Nigéria muditeke mu milongo ya bampanda-njila. Mmufunde ne: “Matuku makese kumpala kua kujikija malonga anyi, mvua muye kulambila aba bavua babuela mu Kalasa bua bampanda-njila kalongolola kudi Bantemu ba Yehowa. Ngakasanganamu bana betu ba bakaji babidi bavua bapite kaku wanyi wa bakaji ku bidimu. Pangakajingulula se: bavua bampanda-njila bavua babuele mu kalasa, meme kudiambila ne: ‘Bikala bana betu ba bakaji aba babidi mua kuikala bampanda-njila, bua tshinyi tshiena panyi mua kuikala mpanda-njila?’ Nenku, pangakajikija malonga anyi, ngakavua panyi mpanda-njila wa pa tshibidilu.”
15. Nku tshinyi kudi bumanyishi bua mu mpukapuka buambuluisha bua bakuabu kuvuabu kunyemena kudi Yehowa?
15 Biapanga buonso mua kulua bampanda-njila, kadi buonso badi mua kufila bumanyishi. Muanetu wa bakaji wa ku Belgique wa bidimu 82 wakaya mu tshisumbishilu tshia minyinyi bua kusumba munyinyi. Wakamona se: mukaji wa musumbishi wa minyinyi uvua ne kulubakana kukole bua ndululu idi panshi eyi ya mianda ya tshididi. Nenku, pakavuaye ufuta mfranga, wakasangishaku trakte wa Mmitabuja kâyi adi nawu Bantemu ba Yehowa? (mu français). Pakaalukilaye ku tshisumbishilu tshia minyinyi, mukaji wa musumbishi wa minyinyi wakazukila bua kumuebeja tshidi Bible wamba pa bidi bitangila njiwu idi mua kufikisha ku Mvita Misatu ya buloba bujima. Muanetu wa bakaji wakamutuadila mukanda wa La paix et la sécurité véritable: comment est-ce possible? Kunyima kua matuku makese, wakalua tshiakabidi mu tshisumbishilu etshi tshia minyinyi. Amu ku tshidiatshilu tshiende tshia dikasa mu tshisumbishilu, mukaji wa musumbishi wa minyinyi wakamuela mikuabu nkonko. Mutshima wa muanetu eu wakasanguluka bua mukaji eu, bualu wakanyisha dilonga dia Bible divua muanetu wa bakaji mumulombe. Mpindieu, mukaji eu wa musumbishi wa minyinyi udi uleja dijinga dia kutambushibua. Kadi musumbishi wa minyinyi? Wakabala trakte ne ukadi pende ulonga Bible.
‘Tshiuma tshia buimpe’
16. Mmu ngumvuilu kayi mutudi mua kuamba ne: Yehowa mmulamine tshisamba tshiende buimpe bu tshiuma?
16 Mu matuku aa a ndekelu a ndululu mikole, Yehowa kênapu “muvuije bulenga-bunangi bua dikema” kudi aba badi banyemena kudiye anyi? Amu bu tatu wa dinanga ne mukubi, Yehowa mmulamine bana bende ba pa buloba tshiuma tshia buimpe. Mmubitshikijile diakalenga kumpala kua buonso, ke tshidi kangimba muambe: “Buimpe buebe bunenebu, buwakalamina bu tshiuma aba badi bakutshina, buwakaleja aba badi banyemena kûdi, ku mpala kua bana ba bantu!”—Musambu wa 31:19, 21.
17-19. Mu ditunga dia Ghana, mbimpe kayi bivua bipatuke ku difundibua ku mikanda ya mbulamatadi dia dibaka dia muntu kampanda mununu?
17 Ke bua tshinyi, bantu ba mu bulongolodi ebu badi balua bamonyi ba bululame bua aba badi batendelela Yehowa, ne bidi bibakemesha bikole. Mulume kampanda muena ditunga dia Ghana wa bidimu 96 wakaya ku biro bia difundisha mikanda ya mbulamatadi ne kulomba bua dibaka diende, yeye uvua mufile biuma kukadi bidimu 70, difundibue ku mikanda ya mbulamatadi. Ne kukema kuonso, muedi wa mabaka ku mikanda ya mbulamatadi wakamuebeja ne: “Udi mushindike bua se: ke tshiudi ujinga menemene bukole buebe ebu anyi?”
18 Muntu eu wakumvuija ne: “Ndi musue kulua umue wa ku Bantemu ba Yehowa ne kudisangisha mu mudimu wa mushinga mutambe bunene udiku diambedi nshikidilu wa bulongolodi ebu kayi muanji kufika—mudimu wa kumanyisha lumu luimpe lua Bukalenge bua Nzambi. Mudimu eu udi ufikisha ku muoyo wa kashidi. Bantemu ba Yehowa badi batumikila mikenji ya mbulamatadi, pamue ne mukenji udi ulomba bua kufundisha dibaka ku mikanda. Bu wewe mua kusua, fundayi kabidi dianyi dibaka ku mikanda.” Muedi wa mabaka ku mikanda ya mbulamatadi wakakema bikole. Ke kutuadijaye kufunda, ne muntu mununu eu wakasanka bikole bualu uvua mpindieu mufundishe dibaka diende ku mikanda ya mbulamatadi.—Fuanyikija ne Lomo 12:2.
19 Pashishe, muedi wa mabaka ku mikanda wakashala wela meji pa bintu bivuaye mumvue. “Bantemu ba Yehowa . . . mudimu wa mushinga mutambe bunene . . . nshikidilu wa bulongolodi ebu . . . Bukalenge bua Nzambi . . . muoyo wa kashidi.” Bu muvuaye kayi ufika ku dijingulula tshivua malu aa umvuija bua mukulakaje eu wa bidimu 96, wakangata dipangadika dia kukeba Bantemu bua kuakonkonona mu buondoke buawu. Wakanyisha dilonga dia Bible ku nzubu ne wakela biidia bia mu nyuma ne lukasa luonso. Lelu’eu, muedi eu wa mabaka ku mikanda ya mbulamatadi udi Ntemu mutambule. Nenku, kutumikila kuetu kua Yehowa mu bidi bakuabo bangata bu tuntu tukese kudi mua kuenza bimpe bivule, buetu tuetu nansha bua aba badi bamonyi ba bikadilu bietu.—Fuanyikija ne 1 Petelo 2:12.
20. Ku Myanmar [Birmanie], mmunyi muakambuluisha bululame bua muanetu kampanda wa bakaji utshivua nsongakaji bua bumanyishi buimpe kufidibuabu?
20 Bakulumpe badi badilekelela balombodibua kudi bulelela ne bavua bena bululame badi bashila bansonga tshilejilu tshimpe mu bulongolodi ebu bupange bululame. Ke mudibi bua muanetu kampanda wa bakaji wa ku ditunga dia Myanmar [Birmanie]. Mmulela mu dîku dia bapele ne bena kudipuekesha dia bana dikumi. Tatu, muena pansio, utu mpanda-njila wa pa tshibidilu. Dimue edi mu kalasa, muanetu wa bakaji wakangula kakanu ka ku munu peshi bâke wa diamá e kuya kumuleja kudi mulongeshi wende. Dinda diakalonda, mulongeshi wakumvuija kalasa kajima mushindu uvua bâke eu muangudibue, nenku, bakamupingaja kudi nsongakaji muenaye. Pashishe, wakalomba muanetu wa bakaji eu utshivua nsongakaji bua kuimana kumpala kua kalasa kajima ne kumvuija bua tshinyi uvua mumupingaje, bu muvuaye mumanye ne: pamu’apa bana bakuabu bavua mua kumusokoka. Muanetu wa bakaji wakumvuija ne: uvua Ntemu wa Yehowa ne Nzambi ki mmusue buivi anyi mushindu kayi wonso wa dipanga bululame. Muanda eu wakamanyika mu ekole mujima, ke tshiakambuluisha bua muanetu wa bakaji utshivua nsongakaji kufilaye bumanyishi kudi balongeshi ne balongi popamue.
21. Padi bansonga beyemena Yehowa, nsombelu wabu udi ubapatuila bipeta kayi?
21 Ku Belgique, mulongeshi kampanda wakamba bualu kansanga budi bujula dijinga dia kumanya bia bungi pa bidi bitangila Bantemu ba Yehowa. Uvua mutabalele nsombelu wa umue wa ku balongi bende, uvua nsongakaji Ntemu, e kuamba ne: “Ndi mpindieu ne mmuenenu mukuabu pa Bantemu ba Yehowa. Meji mabi amvua mbelela avua amfikisha ku diamba ne: kabatu bamanye mua kuanyisha mmuenenu wa bakuabu nansha kakese. Kabiyi nanku, nansha mudibo kabayi bashipa mêyi-maludiki abu, badi banyisha mmuenenu wa bakuabu.” Tshidimu tshionso balongeshi batu bafila tudó kudi balongi babo. Ku tuine etu, kudi kadó ka nsombelu muimpe. Bua bidimu bisatu bilondangane, tudó tua kumpala tusatu tua kudi mulongeshi eu tuakapeshibua bana ba Bantemu ba Yehowa. Ke tshitu tshifikila misangu mivule aba badi banemeka mikenji mu dieyemena Yehowa.—Musambu wa 31:23.
22. Musambu wa 31 udi ufila nkomenu kayi wa ditshimuna, ne mêyi aa adi atutuadila dikuatshisha kayi bu mudi bulongolodi ebu bua malu butua ku tshibungubungu tshiabu?
22 Musambu wa 31 udi ukomesha ne dipunguluja edi dia ditshimuna: “Ikalayi ne dikima, ne mutshima wenu wikale mukole, nuenu buonso badi bindile Yehowa!” (Musambu wa 31:24) Nanku, bu mudi bulongolodi ebu bubi bua Satana butua ku tshibungubungu tshiabu, kayi mua kutulekela, Yehowa udi usemena pabuipi netu ne utupesha bukole buende. Yehowa mmuena lulamatu ne kêna mua kupangila nansha. Udi tshinyemenu tshietu; udi tshibumba tshietu.—Nsumuinu 18:10.
Utshidi muvuluke anyi?
◻ Bua tshinyi tudi mua kunyemena kudi Yehowa ne dieyemena dijima?
◻ Ntshinyi tshidi tshijadika se: tshisumbu tshikole tshia tungimba tshidi tshimba ne dikima misambu ya Bukalenge ya kusamuna nayi?
◻ Bua tshinyi tudi mua kuikala batuishibue se: bukondo bua Satana kabuakukuata tshisamba tshia Yehowa mu buteyi nansha?
◻ Ntshiuma kayi tshidi Yehowa mulamine aba badi banyemena kudiyi?
[Tablo mu mabeji 12-15]
LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 1993
(Bua kumona malu bimpe, tangila mu mukanda)
[Bimfuanyi mu mabeji 16, 17]
Aba badi banyemena kudi Yehowa badi benza tshisumbu tshikole tshia tungimba tshia—bamanyishi 4 709 889 ba Bukalenge!
1. Sénégal
2. Brésil
3. Chili
4. Bolivie