Bansonga badi ‘beyemena Yehowa’
KI NG’ANU bansonga badi balengele, nansha ki ng’anu bakulumpe badi ne meji to. (Fuanyikija ne Nsumuinu 11:22; Muambi 10:1.) Kadi, aba badi ne bulengele budi bunenga ne meji a bushuwa ng’aba badi beyemena Yehowa ne muoyo wabu mujima. Buobo aba, badi bamba buende yeye ne: “Udi Nzambi wanyi.”—Musambu wa 31:14; Nsumuinu 9:10; 16:31.
Pa buloba bujima, padi musumba wa bantu balengele udi wenda udiunda, bansonga ne bakulumpe, badi baleja meji abu pa kusadila Nzambi ne kumanyisha lumu luimpe lua Bukalenge bua Nzambi. Tuanjibi kuangata tshilejilu tshia Sabrina muana wa bidimu muanda-mukulu.
Sabrina mmusombe mu Allemagne ne udi mu kalasa kibidi. Yeye udi wa kumpala wa ku Bantemu ba Yehowa ku ditantshila kalasa kende. Diakabi, uvu’anu upendibua kudi balongi nende too ne ku dituku divua mulongeshi mubalombe bua batuale mu kalasa mukanda wabo utubu banange bikole. Sabrina wakapangadija bua kutuala mukanda wa Miyuki ya mu Mukanda wa Nzambi. Butuku bua muladilu, nansha muvuaye muena buôwa, wakadilongolola bimpe bua kuya mu kalasa. Bu muvua kalasa kende ne balongi 26, uvua mumanye ne: kakuikala ne dîba dia bungi. Kadi uvu’anu mupangadije bua kubenga kushila muntu nansha umue mpunga bua akose dileja diende, ne uvua mujadike se: Yehowa uvua ne bua kumuambuluisha. Pakafika dituku adi, mulongeshi wakebeja eu uvua mutuale mukanda bua ikale wa kumpala ku diwuleja. Bualu bua dikema, anu Sabrina ke uvua mutuale mukanda. Wakapita kumpala kua kalasa ne kutuadija kuakula, ubala eku uleja bimfuanyi bidi mu mukanda ne umvuija ne: bionso bidimu bivua bishindamene pa Bible. Mu diwubuikila, wakebeja ne: “Nnganyi udi ujinga kupeta mukanda eu?” Wakapesha mulongeshi mukanda umue, ne mu matuku makese akalonda, wakafila mikuabo mikanda dikumi kudi bamue bena mu kalasa kende. Diumvuija dimuepele dia mulongeshi pa dileja divu’anu dia ne: “Tshiena muanji kumona tshintu bu etshi to.” Wakapa Sabrina mpue mivule bua mudimu wende.
Eyowa, bansonga bavule badi bamanyishi ba lumu luimpe ba disanka mu kalasa. Tshikuabo tshilejilu n’tshia Erika, mumanyishi wa lumu luimpe wa bidimu 11 mu Méxique. Kumbukila ku buana buende, bakamulongesha mushindu wa kunanga Yehowa. Mudimu wende mu kalasa udi umueneka patoke. Bakamuomekela bujitu bua kulongolola muyuki udi utangila disama dia SIDA ne didifila ne kasuki mu dinua makanya ne maluvu makole. Wakadilongolola bimpe, wakatumika ne tshibejibeji tshia Réveillez-vous! ne wakapeta mpue mivule. Mulongeshi wende wa bakaji wakamuebeja bua kumuambila muaba uvuaye muangatshile mamanyisha aa ne wakamupa bibejibeji bivua ne biena-bualu abi. Kunyima, mulongeshi wakatumika ne bibejibeji abi bua kuyukidilangana ne kalasa kajima pa biena-bualu ebi. Bua nsombelu wa Erika, dinemeka balongeshi bende ne bua mpue yende mivule, uvua mukumbanyine kupeta kadó, maplome, ne dikepesha mfranga ivuaye ne bua kufuta mu kalasa. Kadi, wakumvua ne: dilubuluka diende dinene divua dia se: wakamanyika bu umue wa ku Bantemu ba Yehowa, wakapeta mushindu wa kufila mikanda idi yumvuija Bible, ne wakatumbisha dîna dia Nzambi.
Kudi kabidi Shannon, muana wa balume wa bidimu dikumi udi mu Nouvelle-Zélande. Udi anu ne dîsu dimue dimpe; dikuabu wakadijimija ku disama dia kansere patshivuaye muana wa katoto. Pavua Shannon ne bidimu muanda-mutekete, mamuende wakatuadija kulonga Bible ne Bantemu ba Yehowa. Kadi, katupa kîpi kunyima kua kutuadija malonga ende a Bible, wakatuadija kusomba mu tshindumba ne mulume kampanda, pashishe, wakapangadija bua kuimanyika malonga ende. Shannon wakalomba bua dilonga diende dia Bible kutungunukadi. Disua diende diakafutshibua. Bantemu bakatungunuka ne kumukumbula, pashishe, bena dîku buonso basatu bakalonga Bible ne bakalubuluka mu nyuma. Kunyima kua kufundisha dibaka diabu ku mikanda ya mbulamatadi, mamuende wa Shannon ne tatuende mudiishi bakatambushibua.
Dituku kampanda, Shannon ne mukaji wa mutangidi kansanga muena-ngendu bakapatuka pamue mu mudimu wa budimi. Inabanza kampanda wakebeja Shannon ne: “Ntshinyi tshiakenzeka mu dîsu diebe?” “Diakasama kansere, ne diakumushibua,” ke muakandamunaye. “Mu katupa kîpi emu, Yehowa neampeteshe dipiadipia mu Mparadizu, ne ke tshitudi bavue kukuambila apa.”