Bamanyishi ba Bukalenge badi balonda

Dipangadika dikole didi dituala mafutu manene

YEZU wakalaya ne: bamulondi bende bavua ne bua kukengeshibua, nenku, ke muakamba mupostolo Paulo, anu bu mudibi bifunda mu 2 Timote 3:12: “Bua bualu ebu, bantu buonso badi basue kuikala batshinyi ba Nzambi mu buobumue ne Kristo Yezu, nebakengeshibue pabo.” Kadi, dipangadika dikole mu disadila Yehowa Nzambi ditu dituala mafutu manene.

◻ Ebi biakamueneka bilelela mu tshimenga tshidi ku muelelu wa mbuu ku nord-est wa Malaisie. Nansha muvuaye muena ekleziya wa Buddha wa tshisumi ne muena dîsu dikole kudi bana bende, tatu eu kakakumbana kupumbisha bana bende ba bakaji basatu ne ba balume basatu ku dilonga Bible ne Bantemu ba Yehowa to. Mukajende pende wakaleja dijinga dia kumanya bia bungi pa bulelela. Bua muanda eu, dituku kampanda, muena mutumba nende wakamuseka, wamba ne: “Mmunyi muwudi upanga bukokeshi pa bana bebe ne ubalekela balua Bantemu ba Yehowa? Banyi bana buonso badi balonda anu mêyi anyi ne a ekleziya wa nkambua wetu Bouddha. Udi unkuatshisha luse be!”

Tatu eu wakaalukila ne lukasa luonso ku nzubu, ukana bua kututa muanetu wa bakaji uvua ulombola malonga ne bana bende. Kadi, bana bakamutuyisha, bakatungunuka dilonga Bible ne Bantemu ba Yehowa ne kutantshila bisangilu ku dikuatshisha dia mamuabu.

Ndekelu wa bionso, tatu eu wakasangisha bena dîku dijima kumpala kuende. “Sungulayi, pankatshi panyi meme bua nushale ku nzubu ne kulua bena nkristo bua numbuke ku nzubu,” ke muakabambilaye. Diakamue, muanende wa balume mukulumpe utu muena lutulu ku diakula, wakatuadija kusuika bintu biende bua kumbuka. “Tòo!” ke muakakula tatu eu ne dîyi dikole. “Bu munudi nuenu buonso bantomboji, buanyi meme, mbimpe mfue nansha kufua.” Pashishe, wakaditapa lubilu pambelu, eku bamulonda kudi bena dîku, bamusengelela bua kadishipi. Bu muvua malomba abu amulenga ku muoyo, wakaalukila ku mbelu.

Tshikondo kampanda tshiakapita. Tatu eu wakatuadija kumona buenzeji buimpe bua bulelela bua mu Bible pa bikadilu bia bana babo. Dituku kampanda, wakatutakena ne mulunda wende awu uvua umuseka, mpindieu walu muena dibungama, wakamba ne: “Tshiena ngumvuangana kabidi ne bana banyi to. Badi banshima ne biiba bintu bianyi.” Kadi, tatu eu muena bana bavua balonga ne Bantemu ba Yehowa wakamba ne: “Oh, bana banyi kabena nanku to! Badi nanyi bimpe menemene ne kabidi bakangambuluisha bua kujikija dibanza dia mashinyi anyi pamvua mulofo.”

Lelu’eu, bana [bende] ba bakaji basatu ne mamuabu bakadi bamane kutambushibua. Muanende wa balume umue udi mpanda-njila wa pa buende. Kadi, netuambe tshinyi bua tatu eu uvua kale muena tshikisu ne bumfika-munda? Mpindieu udi ne ngikadilu wa bulunda ne wakabuela mu Tshivulukilu.

Yehowa wakafuta muana wa balume eu, bana bende ba bakaji basatu ne mamuabo pende, bua dipangadika diabo dikole kudiye. Badi mpindieu bamanyishi ba Bukalenge ba mitalu badi basankisha mutshima wa Yehowa.​—Nsumuinu 27:11.