Utuku wambuluisha muanebe bua kusungula Yehowa anyi?

“MVUA ngumvua ne: kulonga Bible kuvua kutonda menemene ne kupungija bikole. Mu musokoko, ngakapangadija mu mutshima wanyi se: pangakola tshiakuvua umue wa ku Bantemu ba Yehowa nansha,” ke muakatonda nsongalume kampanda. Kadi mbitekemenyibue se: bavule ba ku bana ba mu mêku a bena nkristo nebasungule kakuyi mpata bua kuditeka ku luseke lua Yehowa, bansonga bakuabo bu yeye badi mua kupitshila mu tshikondo tshikole mu disungula Yehowa bu wabo Nzambi.

Imue misangu baledi kabena ne dishindika pa mushindu udibo mua kuludika bana babo bua kupatula bipeta bimpe. Badi badikonkonona bikole mundamunda, bu tatu munyingaladi wakamba umue musangu ne: “Bua kuamba bulelela, kuvua bikondo bimvua ntangila mpala ya bana banyi balale tulu, binsonji bia dibungama bitshivua pa matama abo, ne ndiebeja né tshivua mua kuleja luse luvule.” Bana bende babidi bakakola ne bakasungula bua kusadila Yehowa.

Kadi kudi bansonga badi balekela Yehowa ne bashiya bena nkristo nabo bua bulongolodi bua Satana. Nunku, mmunyi mudi baledi balubuluka mu diambuluisha bana babo bua kusungula Yehowa? Bua kuandamuna lukonko elu, tuanjibi kukeba diambedi mua kumanya bua tshinyi bamue bansonga batu balekela Yehowa eku baledi babo bikale bajinga bikole bua se: bashale nende.

Bua tshinyi bamue bansonga badi balekela Yehowa?

Kamue ka ku tubingila kadi ka se: bamue bansonga kabatu mene bafika ku dimanya Yehowa ne njila yende nansha. Nansha batantshila bisangilu bia bena nkristo katshia ku buana, badi babienza anu bua kubienza, ne kakuena dikeba dilelela dia Yehowa nansha. (Yeshaya 55:6; Bienzedi 17:27) Muana wa balume mutêla kuulu uvua umvua bimutonda mu bisangilu bia bena nkristo bualu kavua ujingulula tshivua tshiambibua kudi ngamba-malu ku tshiakuilu to.

Mamiinu a bulelela adi makunyibue mu bamue bana, kadi badi balekela mitshima yabo yilobeshibua kudi nsombelu udi mu bulongolodi bua Satana, nsombelu udi umueneka bu kayi ntatu, wa bintu bivule bia ku mubidi. Bamue kabena mua kutshimuna dijinga dikole dia kudia bulunda ne bena mulongo nabo ne kubidikija to.​—1 Kulondolola 28:9; Luka 8:12-14; 1 Kolinto 15:33.

Kadi, pa buloba bujima, bana bavule ba mu mêku a bena nkristo mbasungule bua kuditeka ku luseke lua Yehowa. Kudiku mushindu wa kulongela tshintu kampanda ku bienzedi bipatudi bia bipeta bimpe biakenza baledi babo anyi?

Tuadija kumpala kua dîba

Nsapi munene mu diambuluisha bana bebe bua kusungula Yehowa nkutuadija kumpala kua dîba. Mu nsombelu mivule, malu mamonamona adi atua ku muoyo ne malesona malonga patshivua mutshima mutekete ne mudiakaje bua kutumikila nebinenge musangu mule. (Nsumuinu 22:6) Nunku kumpala kua dîba tuadija kuambila bana bebe malu adi atangila buimpe bua Yehowa, dinanga ne bunene biende, pa kuditatshisha bua kuibaka mu mitshima yabo dinanga bua Yehowa ne dianyisha bua bidi Yehowa mubenzele. Bua kubikumbaja, baledi bavule mbalubuluke mu ditumika ne biena-bualu bidi bisanganyibua mu bibejibeji bia Société Watchtower pa bifukibua bia Yehowa.

Ditumikila ne kanemu bua Yehowa ne ntendelelu wende bidi munkatshi mua ngikadilu mikuabo idi ne bua kubuejibua mu meji kumpala kua dîba mu nsombelu. Bidi bitua ku muoyo pa kumona mu bisangilu bia bena nkristo bana badi kabayi banji kubuela mu kalasa baditatshisha bua kuangata note mipepele ne kukeba mvese mu Bible wabo nkayabo anyi baya ne baledi babo ku tshiowedi tshia mâyi bua kuôwa mâyi matalale kuîsu padibu bumvua tulu. Malu aa mmapepele, kadi mmushindu kayipu udiwu ne mushinga bua kubueja mu tshieledi tshia lungenyi tshia nsonga bualu bua se: kanemu ne ditumikila bidi ne bua kulejibua kudi Yehowa!

Dishidimuna dilelela dia muntu ne muntu pa nkayende didi ne bua kutuadija padi kumpala kua dîba. Patshivua bana babo ne bidimu bibidi, bena dibaka kampanda babidi bakatuadija kubabadila mukanda wa Telejayi Mulongeshi Munene.a Kunyima, pakatuadija bana ba balume kuya mu kalasa, bavua ne bua kubiika kumpala kua dîba ne kulonga mu dinda dionso ne mamuabo mu mukanda wa Miyuki ya mu Mukanda wa Nzambi ne wa Udi mua kuikala ne muoyo wa kashidi pa buloba bukudimuna mparadizu.b Ebi bavua ne bua kubilonda kudi dikonkonona dia mvese ya ku dituku ne ku dituku dilombola kudi tatuabu kumpala kua didia dia mu dinda. Madikolela a baledi [aba] akatamba kufutshibua matuku adi panshi aa bu muafumi bana babo ku disungula bua kusadila Yehowa, pa kuleja tshimanyinu tshia didilambula diabo ku batismo wa mâyi pakakumbajabu umue bidimu 10 ne mukuabo 11.

Nsonga kampanda mulenga udi usadila ku filiale wa Société Watch Tower mu Japon wakavuluka ne: patshivuaye nsonga menemene, mamuende wakamuambuluisha bua kushemesha malanda ne Yehowa pa kusomba ku luseke luende butuku, umuambuluisha bua kusambila. Kakapua musangu nansha umue muoyo dilesona dimulongesha​—muaba kayi wonso uvuaye uya anyi mu tshintu kayi tshionso tshivuaye wenza, Yehowa uvua dîba dionso anu pabuipi ne mudiakaje bua kuambuluisha.

Baledi badi bapatula bipeta bimpe badi balonga mua kujingulula majinga mabi adi afumina ku dipanga bupuangane dia bana babo dipiana, ne baledi aba badi batuadija kumpala kua dîba bua kuambuluisha bana babo bua kudilulamija. (Nsumuinu 22:15) Dinyikibua ku buiminyi, tshishiku, lutambishi, dinekesha mu dijana bakuabo, bidi ne bua kutudibua kumpala kua dîba. Bikalabi kabiyi nunku, dinyikibua dia mushindu’eu nedidiunde kushiikiladi too ne ku ditombokela Nzambi ne njila yende kunyima. Tshilejilu, baledi badi ne bipatshila bimpe kadi badi baleja luse lupitshisha batu misangu ya bungi balekela bana babo bakolesha mmuenenu ya budisui. Bana aba mbibakolele bua kunemeka baledi babo anyi Yehowa, pa kuvua bu bantu ‘babule dianyisha’ batêla mu Bible. (Nsumuinu 29:21) Ku lukuabo luseke, bana batu bapeshibua midimu ku nzubu ne badi balongeshibue bua kuikala badiakaje bua kukumbaja bidi bakuabo bakengela mbinyikibue ku dikala ne dianyisha bua baledi babo ne bua Yehowa.

Bualu bukuabo bua mushinga nkufunda kumpala kua dîba bipatshila bitshintshikila mu mudimu wa teokrasi bidi muana mua kukumbaja. Pikalabi kabiyi bienzekibua [nunku] kumpala kua dîba ne disuminyina dionso, bakuabo badi mua kuuja tshieledi tshiende tshia lungenyi ne mutshima wende ne bipatshila bishilangane. Kubala Bible ku ntuadijilu too ne ku ndekelu, kulonga muntu pa nkayende umue wa ku mikanda ya Société Watchtower, kudifundisha mu Kalasa ka Mudimu wa Teokrasi, kuvua mumanyishi wa lumu luimpe, ne kutambushibua bidi ne bua kuikala munkatshi mua bipatshila ebi.

Takafumi udi uvuluka ne: mamuende wakamuibidija dibala dia bibejibeji bia Tshibumba tshia Nsentedi ne Réveillez-vous! pa kufunda nkonko mipepele ne kuyishiya pa mêsa a mu tshikuku bua kuyisangana papinganaye ku nzubu ufumina mu kalasa. Yuri udi uvuluka ne: kushala pamue munkatshi mua matuku makese ne bampanda-njilac bavua basadila muaba uvua dikengedibua dinene dia ba-ministre bena nkristo, pa kupatuka nabo mu buambi, pa kubamona balamba biakudia bisheme, ne pa kumona musangelu ne tshisumi biabo bivua ne buenzeji bunene pa dijinga diende dia kusadila Yehowa mu mushindu wa muomumue. Bansonga bavule badi balonda ne: baledi babo bavua babatuala pa tshibidilu ku Betele, anu bu mutu tshilombuelu ne filiale ya Société Watch Tower ibikidibua, kuvuabo mua kubandila bakuabo bansongalume ne bansongakaji badi basadila ne disanka dionso Yehowa. Bavule ba ku aba bakakukumbula ku buana badi mpindieu basadila ku Betele pa buloba bujima.

Pesha bana bebe dîba diebe

Bungi ne mushinga bia dîba diudi upitshisha ne bana bebe nebikale pamu’apa mu buludiludi ne buenzeji pa disungula diabo dia kusadila Yehowa anyi dia kubenga kumusadila. Badi ne lukasa luonso mua kusunguluja bungi bua mêba autu upitshisha ne didilongolola diutu wenza bua dilonga dia Bible diutu ulombola nabo. Biwabenga kumanya muaba unuakashikidila mu dilonga dishale anyi biwapumbisha dilonga bua tubingila tubule mushinga, udi ubaleja ne: dilonga kadiena ne mushinga menemene to. Kadi, padibo bamona se: baledi badi baditatshisha, badilongolola bimpe ne balombola dilonga pa tshibidilu nansha bia munyi, [baledi aba] badi baleja bualu bushilangane. Nansha mudibi kabiyi bualu bulomba, bamue bamamu batu bavuala bua dilonga dia Bible dia bana babo, anu bu mutubu benza pa kuya mu bisangilu anyi kulombola dilonga dia Bible ne bena mutumba nabo. Bualu budi bushala bufunda mu lungenyi mbua se: ntendelelu wa Yehowa udi ne mushinga.

Dîba ne madikolela bivule nebikengedibue bua kuvuija dishidimuna bana bebe mu mianda ya Bible bualu bua disanka, budi butua ku mioyo yabo. Bana batekete batu mu mushindu wa pa buawu batuibua ku muoyo padibo bamona bintu bidibo balonga biambulula mu dinaya dia tshilejilu kumpala kuabo. Tshilejilu, tatu kampanda, wakambuluisha bana bende bua kumona ne mêsu abu tshivua dibiika ku lufu diumvuija pa kuenza dinaya dia tshilejilu dia muyuki wa mu Bible wa dibiika ku lufu dia Lazare. Wakabuela mu nkumba ne pashishe wakapatukamu bu Lazare mubiisha ku lufu.​—Yone 11:17-44.

Padi bana benda basemena ku bukulumpe, bidi bikengela dîba ne dimanya kuenza bia bungi bua kuakamangana ne mpampakenu mivulavulayi, mpata, ne tunyinganyinga bidibu bapetangana nabio. Dîba diteka ku luseke kudi baledi banangi ne basunguluji mu tshikondo etshi didi ne mushinga mubandile bikala bana ne bua kudima dieyemena kudi Yehowa. Tatu kampanda wa bana banayi wakapatula bipeta bimpe udi ulonda ne: pavua bana bende bapetangana ne ntatu mishilashilangane, uvua wenza makebulula ne uyukidilangana nabo pa biena-bualu bidi mu diumvuangana nayi mu mikanda ya Société Watchtower dituku dionso too ne pavua ntatu ayi itshimunyibua nkong.

Mamu kampanda wa bana babidi mpanda-njila uvua ne bivule bia kuenza wakajingulula ne: muanende wa bakaji ukavua wenda udipatula ku kakese ku kakese mu midimu ya Teokrasi ne katshivua kabidi uyisankidila to. Nunku mamu eu wakapangadija bua kuikala ku mbelu pavua muana upingana mu kalasa ku dilolo dionso, pa kubueja muanende wa bakaji mu diyukidilangana dîba dia kunua tshiayi. Ku butuangaji bua mayukidilangana a bulunda pankatshi pa mamu ne muanende wa bakaji, muana wa bakaji eu wakapeta diambuluisha divuaye ukengela. Mpindieu, kunyima kua dipeta diplome dia kalasa kabandile, walondi dikasa dia mamuende pa kudibueja pende mu mudimu wa bumpanda-njila.​—Nsumuinu 20:5.

Bulunda ne tshilejilu bimpe

Kusakidila ku difila dîba diabo, baledi badi ne bua kupetesha bana babo bulunda buakane. Nsumuinu 13:20 [NW], udi wamba ne: “Eu udi wenda ne bena meji nealue pende muena meji, kadi, diakabi nedivuile eu udi umvuangana ne bapote.”

Baledi bavule badi bapatula bipeta bimpe mbatuishibue kudi bulelela bua lusumuinu elu. Tatu kampanda wa bana banayi udi wamba ne: “Pandi ntangila tshia nyima, ndi ngela meji ne: bungi buvule bua balunda ba mu bulelela ba bana betu ke buakabasaka ku disadila Yehowa. Mvua mbakankamija bua kukeba balunda mu bikuabo bisumbu bia muomumue ne mu tshietu ne pashishe bua kukuba malanda aa.” Mukulu kampanda muena nkristo wakasadila ku Betele munkatshi mua bidimu bivule wakavuluka ne: “Pantshivua muana mutekete, tuvua basombele mu nzubu mukese, kadi pa tshibidilu uvua ulua muaba wa kulala bua batangidi ba bijengu. Kupita apu, bampanda-njila ba pa buabu mu tshisumbu tshietu bavua pa tshibidilu balua kudia pamue netu biakudia bia mu midi. Bavua buôwa mâyi ku nzubu kuetu ne bavua badia netu bulunda. Diteleja malu abo mamonamona ne dimona musangelu wabo biakangambuluisha bua kudima dianyisha bua mudimu wa ku dîba ne ku dîba.”

Bulunda buimpe budi buambuluisha aba badi bapetangane ne ntatu. Mamu kampanda muena muana wakapetangana ne tshikondo tshikondakane wakayukidilangana ne mutangidi muena-ngendu wa Bantemu ba Yehowa. Wakamubela bua kupatuka ne muana eu mu mudimu wa budimi. “Biwenza nunku, makanda ende a mu nyuma ne malu makuabo kayi wonso nebilubuluke,” ke muakamba mutangidi. Mamu eu udi ulonda ne: “Mu tshisumbu tshietu muvua ndongoluelu bua bumanyishi bua ku dilolo, ne bana bena kalasa ba bungi, bakulumpe bavule bampanda-njila ba pa tshibidilu, ne mukulu umue anyi bavule bavua badifilemu. Bangabanga bivua mvita bua meme kufika ku dipatuisha muananyi wa balume pa tshibidilu, kadi nsombelu eu kakanenga to bu muvuaye upingana ku nzubu musanguluke ne mukankamija kudi bulunda buimpe. Wakatambushibua patshivuaye mulongi mu kalasa kabandile, ne wakatuadija kusadila bu mpanda-njila muambuluishi ku ngondo ne ku ngondo, ne pakapetaye diplome, wakavua mpanda-njila wa pa tshibidilu.” Bulunda buakane busakidila ku dienza disua dia Nzambi biakapatula bipeta bimpe.

Imue misangu muaba uudi kawena bansonga badi mua kuikala ne buenzeji buimpe pa muanebe, kadi mubelu mufilafila kudi bansonga bavule bakasungula bua kusadila Yehowa ng’wa pa bilejilu bia baledi babo. Bansonga ba bungi bavua banyisha baledi babo ne bajinga kubidikija. Yuri udi uvuluka diakidilangana dia mamuende ne mushindu uvuaye utabalela bakuabo, pa kubabikila ku nshinga ne kulamba biakudia bua babedi. Tatsuo, wakafumina mu dîku dia bansongalume banayi, buonso buabo mpindieu bakadi bakulumpe ne badi basadila Yehowa, wakamba ne: “Mamu kavua mua kulonga netu pa tshibidilu bualu tatu kavua muena kuitabuja ne wakaluishibua bikole kudi balela bende. Kadi pa kumona dishimata diende bua bulelela ne musangelu wende mu disadila Yehowa bivua ne buenzeji bukole kundi. Uvua kabidi mudiakaje bua kushala mutabale too ne ku mêba a lunkelu bua kutuambuluisha mu ntatu yetu.” Mêyi a meji a baledi adi ne bukole padiwu makuatshisha kudi midimu ya lulamatu. Yoichiro wakamba bua baledi bende ne: “Tshiena mvuluka nansha musangu umue uvuabu bapatule ngenyi mibi pa bidi bitangila bakuabo mu tshisumbu; anyi batulekele tuetu bana tuakula pa mibi ya bakuabo to.”​—Luka 6:40-42.

Disanka dia kumona bana basungula Yehowa

Kakuena ntumikilu udi kayi ntupakanyi bua kuambuluisha bana bebe bua kusungula Yehowa nansha. Nekuikale bikondo bivule bia tunyinganyinga. Kadi tatu munyingaladi mutêla kuulu eku wakamba ne: “Bu baledi, tuvua anu ne lulamatu luonso tuteta mua kulonda mibelu ya Bulongolodi bua Yehowa budi bumueneka. Ebi bivua diambuluisha dinene mu ditshimuna ntatu.” Madikolela abo akalubuluka.

Eyowa, pa kuenza muenu muonso bua kulonda mêyi-maludiki a mu Bible, pa kulongesha bana benu tubingila tuimpe tua kunanga Yehowa, bikuatshisha kudi tshilejilu tshienu tshia lulamatu ne madikolela enu malelela bua kuambuluisha, nuenu penu nudi mua kulubuluka mu madikolela enu. Utshidi uvuluka nsongalume mutêla ku ntuadijilu, uvua musangu kampanda mupangadije bua kubenga kuvua umue wa ku Bantemu ba Yehowa anyi? Kunyima kua mamuende mumane kulubuluka mu dimuambuluisha munkatshi mua bidimu biende bia ntatu, wakamba ne: “Ndi ne disanka bualu kakateketa mu maboko musangu nansha umue!” Udi pebe mua kupatula tshipeta tshia muomumue ne bebe bana​—Galatia 6:9.

[Mêyi adi kuinshi]

[Tshimfuanyi mu dibeji 30]

Udiku mua kutapa dîsu tshia nyima mu dikolesha muana ne [kupetamu] bivulukidi bia disanka anyi?