Amu bu bimuma bia pomme bia or

BIMUMA bia pomme​—mmushindu kayipu utubi bilengele kuîsu ne bisheme pa tshilakalaka! Bible udi utumika ne tshimuma etshi tshisheme mu mushindu’eu muondoke wa mu tshimfuanyi padiye wamba ne: “Dîyi diamba mu tshikondo tshiakanyine didi bu bimuma bia pomme bia or mu tshitekelu tshia argent.” (Nsumuinu 25:11) Nntshinyi tshidi tshiambilu etshi tshiumvuija?

“Bimuma bia pomme bia or mu tshitekelu tshia argent” bidi mua kufunkuna mudimu wa difula, dizola anyi wa disonga mpingu amu bu dilonga dibasame dia argent didibu balengeje ne bimuma bia or bizolamu. Bu mudi mvese idi ku mutu yakula bua disemena pabuipi ne mukalenge, mvese eu udi mua kuikala wakula bua milambu itubu balambula mfumu​—bilengejilu bia or bifuanangane ne bimuma bia pomme biteka mu dilonga dibasame dia argent. (Nsumuinu 25:6, 7) Bushuwa, mbulengele kayipu abu!

Mu miaku miakanyine, ya kanemu, miakula pa tshikondo tshiakanyine, mifunda anyi miakula, mudi pamu bulengele bua muomumue. Idi isankisha, ikankamija, ne mu mishindu mivule idi ne mushinga. Mu mushindu wa pa buawu, miaku idi mu Bible mifundisha ku spiritu wa Nzambi idi payi bu “bimuma bia pomme bia or mu tshitekelu tshia argent.”

Amu bu muvuabi bilejibue mu ngakuilu wa meji wa mukalenge Solomo udi mu Nsumuinu 25:11, yeye “uvua anu uditatshisha bua kupeta miaku idi isankisha ne bua kufunda miaku miakane ya bulelela.” (Muambi 12:10; Nsumuinu 25:1) Kunyima kua siekele bungi kampanda, muena nkristo mupostolo Paulo wakafunda ne: “Mufundu wonso mmufunda ku spiritu wa Nzambi ne udi ne mushinga.” (2 Timote 3:16) Eyowa, Bible udi ne mubelu wa mushinga, milayi, miaku ya mu tshimfuanyi, malelela adi akenka mushindu’eu ne malengele mmapite midimu ya mufudi mupiluke kayi yonso. Kupita apu, eu yonso udi upeta meji adi afumina ku Dîyi dia Nzambi, Bible, udi upeta tshintu tshia mushinga ukena kufuanyikija ne udi mua kutekemena muoyo wa kashidi.​—Nsumuinu 4:7-9; Yone 17:3.