Nkonko ya babadi

Bu mudi Bible wakula misangu mivule bua “muana wa balume mubule tatu,” ebi bidi bileja dibenga kutabalela dia bana ba bakaji anyi?

Ki mmuomu nansha.

Bible wa Les Saintes Ecritures​—Traduction du monde nouveau utu yeye utumika ne tshiambilu tshia: “muana wa balume mubule tatu” mu mvese mivule idi ileja mudi Nzambi utabalela bana badi babule muledi kampanda. Nzambi udi uleja patoke ditabalela edi mu Mikenji yakapeshaye Izalele.

Tshilejilu, Nzambi wakamba ne: “Kanukengeshi mukaji mukamba anyi muana wa nshiya wa balume kayi yonso mubule tatu. Biwabakengesha ne biadilabo kundi, meme nenteleje lubila luende lukole; ne tshiji tshianyi netshitambe kukola, ne nennushipe ne muele wa mvita, ne bakaji benu nebalue bakamba ne bana benu ba balume nebalue bana ba nshiya babule ba-tatu.” (Ekesode 22:22-24) “Bualu Yehowa, Nzambi wenu, udi Nzambi wa nzambi ne Mukalenge wa bakalenge, Nzambi wa bukole ne udibo batshina, utu kayi wangata bantu ne kansungansunga, udi kayi witaba mabuejila. Udi ukumbaja dilumbuluisha bua muana wa nshiya wa balume udi mubule tatu ne bua mukaji mukamba.”​—Dutelonome 10:17, 18; 14:29; 24:17; 27:19.

Nkudimuinu mivule ya Bible itu yamba yoyi ne: “muana mubule tatu” anyi “muana wa nshiya” mu mvese ayi, nenku bakulamu bua bana ba balume ne ba bakaji. Kadi, nkudimuinu ya mushindu’eu ki mmimanye ngikadilu udi mu muaku wa tshiena Ebelu (ya·thohmʹ), udi mu mulongo wa balume. Kadi, nkudimuinu wa Les Saintes Ecritures​—Traduction du monde nouveau udi yeye utumika ne nkudimuinu mujalame wa: “muana wa balume wa nshiya mubule tatu anyi bana ba balume ba nshiya babule tatu,” amu bu mudibi mu Musambu wa 68:5, mutudi tubala ne: “Tatu wa bana ba balume ba nshiya babule tatu, mulumbuluidi wa bakaji bakamba, n’Nzambi udi musombe mu muaba wende munsantu.” Bashindamene pa mushindu muinenke wa muomumue udibo batumikila mu tshiena-Ebelu, bu mudibu bateka muaku wa pa muanda ku mulongo wa bakaji anu mudibi mua kubadibua mu Musambu wa 68:11 ne: “Bakaji badi bamanyisha lumu luimpe badi tshiluilu tshinene.”a

Nansha mudi ya·thohmʹ muikale utamba kukudimunyibua ne: “muana wa nshiya wa balume mubule tatu,” ebi kabiena mua kuangatshibua bu dipanga kutabalela bana ba nshiya ba bakaji badi babule muledi kampanda to. Mvese mitela ne mikuabo idi ileja ne: tshisamba tshia Nzambi bakatshikankamija bua kukubatshi bana ba bakaji ne bakaji bakamba. (Musambu wa 146:9; Yeshayi 1:17; Yelemiya 22:3; Zekâya 7:9, 10; Malaki 3:5) Mu Mikenji, Nzambi wakamusakidila pamu bualu budi butangila dipangadika dia bu Nzuji divua dijadika bumpianyi bua bana ba bakaji ba nshiya babule tatu ba Zelofehade. Dipangadika adi diakalua mêyi ne mikandu bia kukosa nabi bilumbu bia muomumue, ne divua disungila bumpianyi buvua bana ba bakaji ba nshiya babule tatu ne bua kupeta.​—Nomba 27:1-8.

Yezu kavua usungulula balume anyi bakaji pavuaye uleja dinanga kudi bana batekete. Kadi, tudi tubala ne: “Bantu bakatuadija kumutuadila bana batekete bua yeye kubalenga; kadi balongi [bende] bakabakanyina. Pakamonaye bualu ebu, Yezu wakafika munda ne kubambila ne: ‘Lekelayi bana batekete balue kundi; kanutetshi bua kubakandika, bualu bukalenge bua Nzambi mbua badi bu bana batekete. Bulelela, ndi nnuambila ne: Muntu yonso udi kayi wakidila bukalenge bua Nzambi bu muana mutekete, kakubuelamu.’ Ne wakambula bana mu maboko ende ne kutuadija kubabenesha.”​—Mako 10:13-16.

Muaku wa tshiena-Greke udibu bakudimuna apa bu “bana batekete,” kawena ku bakaji anyi ku balume. Nkonga-miaku kampanda wa tshiena-Greke mumanyike bimpe udi wamba ne: muaku eu “bakatumika nawu bua bana ba balume ne ba bakaji.” Yezu uvua uleja ditabalela dia muomumue ne didi Yehowa uleja kudi bana batekete buonso, ba balume ne ba bakaji popamue. (Ebelu 1:3; fuanyikija ne Dutelonome 16:14; Mako 5:35, 38-42.) Nenku, tudi ne bua kumanya se: mubelu udi mu Mifundu ya tshiena-Ebelu udi utangila dikuba “bana ba nshiya ba balume babule tatu” udi pawu ubadibua ku eyi idi itubela bua kukuba bana buonso badi bajimije muledi anyi baledi.

[Mêyi adi kuinshi]