Mpuilu ya dikema idi izangika dilongesha dia Nzambi

LELU’EU, dimanya ndimuangalake pa buloba bujima. Ku televizion ne ku bisanji, mu mikanda anyi ku diambuluisha dia biamu bia ordinatere, mudi dimanya dia malu dikena mikalu pa bidi bitangila mamanya pabuipi ne wonso pa biena-bualu bisunguluke bitudi mua kufuanyikija. Kadi, bantu badi’anu bakuatshika masama ne pashishe bafua. Dibunda dia bibawu, nzala, ne bupele bidiku pa buloba bujima, ne masama a mu mpampakenu mmakuate bantu bavule kupita kumpala. Dimanya kayi dionso ki ndikumbane bua kujikija malu aa to. Mbua tshinyi? Bualu bukua-bantu mbuele meji a Nzambi nyima.

Nenku, mmushindu kayipu uvuabi bikumbanyine bua “Dilongesha dia Nzambi” kusungudibuadi bu tshiena-bualu tshia mpuilu ya Bantemu ba Yehowa ivua mienzeke matuku ashadi aa! Programme uvua uvuluija aba bavuamu ne: anu dilongesha didi mu Dîyi dia Nzambi, Bible ke didi menemene ne bukole bua kupandisha muoyo.

Mpuilu wa diambedi wakatuadija mu Dinayi, dia 3 Kabalashipu, mu tshimenga tshia Uniondale, New york, Etats-Unis. Kumbukila apu, programme eu wakalejibua mu bimenga bishilangane mu ditunga dimue pashishe mu dikuabu, kujikijibuaye mu kontina wa Afrike ne mu Amerike wa ku Sud.

Dilolo dia dituku dia kumpala

Dituku dionso divua ne tshiena-bualu tshivua tshizangika tshitupa kampanda tshia dilongesha dia Nzambi. Tshilejilu, programme wa dituku dia kumpala uvua mushindamene pa tshiena-bualu tshia: “Tumanyayi mua kujingulula dilongesha didi difumina kudi Nzambi.” (Yone 7:17) Lungenyi elu luakasulakajibua mu kupita kua dituku.

Kunyima kua musambu ne disambila, muludiki wa mpuilu wakunzulula programme ne muyuki uvua ne tshiena-bualu tshia: “Dilongesha dia Nzambi didi ditusangisha.” Wakaleja ne: tshisamba tshia Yehowa tshidi mu buobumue pa kulonga njila Yende ne pa kuendela mu tujila Tuende. (Mika 4:1-5) Dilongesha dia Nzambi didi dikolesha buobumue buabo. Bateleji bakakankamijibua bua kusanka bua buobumue buabo bua buena-muntu.​—Musambu wa 133:1-3.

Ku shòo ku ibamulolo, bakayukidilangana bua bisangilu bia tshisumbu bia pa tshibidilu mu muyuki mukosolola mu bitupa uvua ne tshiena-bualu tshia: “Bisangilu bidi bitulongesha njila ya Yehowa.” Ngamba-malu wa kumpala wakavuluija bateleji ne: patudi tudisanga pamue, tudi tutumbisha Yehowa ne nanku tupeta dibenesha diende. Ngamba-malu wakalonda, wakazangika dikengedibua dia kufila mumvuija mu bisangilu. Pa kuenza nunku, tudi tutumbisha Yehowa patoke, tuleja ditabuja dietu, ne tukolesha ditabuja dia bakuabo. Ngamba-malu muisatu mu tshiende tshitupa tshia ku bitupa bia muyuki eu wakaleja mudibi bikengela kutumikila bitudi tulonga mu bisangilu. Tudi ne bua kuikala “batumikidi ba Dîyi, ki ng’anu bateleji patupu to.”​—Yakobo 1:22.

Pashishe, muyuki muimpe wa misambu ya kutumbisha nayi Yehowa wakalonda. Musambu udi utua ku mutshima n’tshimue tshitupa tshinene tshia ntendelelu wetu. Muyuki eu bakawutua mu nyima kudi mukuabo wa nshindamenu, wa “Dilongesha dia Nzambi didi ditshimuna.” Tshiena-bualu kayipu tshimpe! “Yehowa mmpokolo wa dilongesha dipite buimpe didi muntu kayi yonso mua kupeta,” ke muakamba ngamba-malu. Nenku, kunyima kua diyukidilangana mu mêyi makese pa mushindu udi buongo bua muntu buikale tshishima, wakamba ne: “Tudi ne bua kutumika ne makole etu a kuela lungenyi diambedi bua kumanya dilongesha dia Nzambi. Amu diodi nkayadi ke ditu dipetesha meji malelela.” Mmushindu kayipu udibi bilelela!

Dinda dibidi

“Tutungunukayi ne kudiakaja bua kutumikila dilongesha dia Mupandishi wetu, Nzambi” tshivua tshiena-bualu tshia dituku dibidi dia mpuilu. (Tito 2:10) Dîyi-diludiki edi diakasulakajibua ku ntuadijilu kua muyuki wa “Dilongesha dia Nzambi nditapulukangane ne malongesha a ba-demon.” Eyowa, ba-demon badi ne abo malongesha. (1 Timote 4:1) Amu bu muvua ngamba-malu umvuija, dilongesha dia Nzambi didi ditshimuna “meji” a Satana pa kuela patoke malongesha a dishima ne njila ya Diabolo ya mayele. Bua bualu ebu, bena nkristo bena muoyo muakane batue ku bantu 4 500 000 kabatshiena kabidi mu bupika bua mîdima ya Satana to.​—Yone 8:32.

Kabidi, tudi ne bua kutungunuka ne kutantamena Satana. Ebi biakazangikibua mu muyuki wa “Tutantamenayi mmuenenu wa bena mum bulongolodi.” Lungenyi lua bulongolodi ebu lutu lushipa. Lutu luolu lukankamija bikadilu bibi, lusaka ku ditombokela bakokeshi, ne lusonsola lukuka lua kupeta bintu bia ku mubidi bipitepite. Muena nkristo udi ne bua kudikonkonona dîba dionso. Utshidi kabidi ulonda mêyi-maludiki mabandile pa bintu bidiye utangila, uteleja, peshi ubala anyi? Ne dikankamija dionso, ngamba-malu wakamba ne: “Bana betu ba balume ne ba bakaji, kabidi ne bansonga, tudi tunuela ka-lumbandi bua madikolela anudi bamane kuenza bua bualu ebu.”​—1 Yone 2:15-17.

Kudi tshintu tshimue tshitu tshikolesha kutantamena lungenyi lua bulongolodi ebu. Ntshintu kayi atshi? Tuetu buonso katuena bapuangane. Bushuwa, Yezu wakafua bua mpekato yetu, kadi tudi anu ne bua kuluangana ne dijinga dia kuenza mpekato. Ebi biakasulakajibua mu muyuki wa “Tuluishayi bukokeshi bua mpekatu pa mubidi muena butekete.” Mu bintu bikuabo, ngamba-malu wakamba ne: tudi mua kutshimuna mvita yetu itudi tuluangana ne mpekato bituavuala bumuntu bupiabupia ne kuepuka tshintu kayi tshionso tshidi mua kujula majinga etu a mpekato a ku tshilelelu.

“Uvuije dilongesha dia lupandu nsombelu webe” ke tshivua tshiena-bualu tshia muyuki uvua ulonda. Bamue batu banekesha mu dikuba makanda abo a mubidi. Bulelela, makanda a mu nyuma adi ne mushinga kupita. Ngamba-malu wakazangika mudibi bikengela kutabalela menemene muanda eu, ne uvua ne mêyi a pa buawu a dikankamija nawu bakaji bena nkristo. Wakamba ne: “Tudi tuanyisha bikole bana betu ba bakaji bakulakaje ne bansonga badi ne ngikadilu muimpe wa pankatshikatshi mu dikumbaja ne mitalu mudimu wabo wa buambi, eku bakumbaja kabidi ne mitalu midimu yabo nkayabo ya ku mubidi.” Eyowa, tuetu buonso, tudi tuela Yehowa tuasakidila bua dilongesha edi dia lupandu didi ditutapulula ku bulongolodi ebu.

Muyuki wa “Dilongesha dia Nzambi didi disokolola tshipatshila tshia muoyo” ke wakela tshisala ku programme wa mu dinda. Ngamba-malu wakamba ne: “Imue misangu, bantu pabuipi ne buonso nebadiebeje ne: ‘tshipatshila tshia muoyo ntshinyi?’” Ne bijadiki bia mpatshi, wakaleja ne: amu Bible ki udi wandamuna bimpe ku lukonko elu. Pashishe, ngamba-malu wakaleja ne: malaya a dikema a Nzambi adi atupetesha menemene tshipatshila mu muoyo. Bia muomumue, bateleji bavule bavua badiambila mundamunda ne: ‘Ebi ke bidi bushuwa bantu badi mu teritware wanyi bajinga bua kuteleja.’ Kasumbu kaludiki kavua pako ne mmuenenu wa muomumue. Broshire mupiamupia udi ne tshiena-bualu tshia Quel est le but de la vie? (Tshipatshila tshia muoyo ntshinyi?) wakalejibua ku ndekelu kua muyuki eu. Ndisanka kayipu divua muntu yonso nadi! Dîba dia diikisha mu midi diakapetesha mushindu wa kubala tshibejibeji atshi tshipiatshipia.

Dilolo Dibidi

Muyuki wa kumpala mu dilolo uvua ne tshiena-bualu tshidi tshikankamija tshia “Uupuilayi Yehowa tunyinganyinga tuenu tuonso.” Malu mavule atu mpokolo wa tunyinganyinga; kadi, Dîyi dia Nzambi didi diamba ne: tudi ne bua kumupuila tunyinganyinga tuetu tuonso. (1 Petelo 5:6, 7) Bushuwa, imue ntatu itu itungunuka, ne bua bualu ebu, ngamba-malu wakamba ne: ‘Ikalayi ne lutulu. Indilayi Yehowa. Ne dishindika dionso itabujayi ne: kulonda Bible kutu pa tshibidilu kuimpe kutambe. Bituatungunuka ne kuteka mitshima yetu kudi Yehowa, netusanke bua “ditalala dia kudi Nzambi” didi ku mutu kua ngenyi kayi yonso.’​—Filipoi 4:6, 7.

Miyuki inayi yakalonda yakaleja ne: dilongesha dia Nzambi didi kabidi ditangila nsombelu wa mu dîku. Wa kumpala, “Vuijayi dibaka dienu kudisangisha kua kashidi,” wakavuluija bateleji bavua mu mpuilu ne: ku mêsu kua Yehowa, dibaka ki ntshisuikidi tshia mutantshi muîpi to, amu bu mudibu badiangata kudi bavule mu bulongolodi ebu. Kadi, bua kulubuluja dibaka, tudi ne bua kulonda buludiki bua Yehowa. Bualu wakatufuka. Nanku, Dîyi diende difunda ku buenzeji bua spiritu munsantu didi dipetesha mubelu muimpe bua dibaka.

Muyuki wa “Tumikayi bua lupandu lua ba mu nzubu muenu,” uvua ukonkonona ntatu ya mu ditabalela bena mu dîku mu bikondo ebi bikole. (2 Timote 3:1) Baledi batu balongesha bana babo mankenda a mubidi ne a miaba idibo basombele, bikadilu bimpe, mushindu wa kutumika, mushindu wa kuikala muena kalolo ne kuambuluisha bakuabo. Kupita bionso ebi, badi ne bua kulongesha ndelanganyi yabo bua kuikalabo basadidi ba Yehowa ba lulamatu.​—Nsumuinu 22:6.

Mu diyukidilangana diakalonda, dia “Baledi, bana benu badi bakengela ditabalela dia pa buadi,” ngamba-malu wakavuluija bateleji mushinga wa kuela bana ka-lumbadi, kadi kabayi babuikila mêsu abu pa bilema bia babo bana. Baledi badi nangananga ne bua kutabalela bua babo bana kababudi bululame, kabikadi banangi ba bintu bia ku mubidi, anyi badisui.

Nangananga bansonga bavua mu mpuilu bakalonda ne ntema muyuki wa “Bansonga: ndilongesha dia nganyi dinudi nuipatshila?” Malu mmakole bua bansonga bena nkristo lelu’eu. Kuya pamue ne bulongolodi ebu nkupepele, kadi, ebi bidi bifikisha ku lufu. Nansha mudi kusungula bua kulamata dilongesha dia Nzambi kukengela dikima bua nsonga, kudi kutuala mabenesha manene mpindieu ne muoyo wa kashidi walua.​—1 Timote 4:8.

Dituku dibidi diakajika ne drama uvua utua ku muoyo wa: Bansonga badi bavuluka Mufuki wabo mpindieu. Mu mbangilu, direktere wakabikila bansonga badi mu bulongolodi bua Nzambi bu “tshiluilu tshidi mu diumvuangana ne teokrasi tshia batumikidi ba mikenji badi badifile mu mudimu wa Yehowa Nzambi ne Mukalenge wende mutekibue, Yezu Kristo.” Wakasakidila ne: “Eyowa, bansonga betu badi bakumbaja tshintu kampanda tshimpe!” Drama wakaleja biakane ne: padi muledi ukolesha muana bimpe, ebi nebimuvuije muntu mushindame pakolaye ne pasadilaye Yehowa ku budisuile.

Dinda dia dituku disatu

Tshiena-bualu tshia dituku disatu tshivua tshia “Tulongeshayi bantu ba mu matunga wonso katuyi tulekela.” (Matayi 28:19, 20) Kakuyi mpata, bateleji bavua mu mpuilu tshikondo atshi bavua batekemena mubelu muakanyine pa mudimu wa buambi, ne kabakafuishibua bundu to. Muyuki mukosolola mu bitupa uvua ne tshiena-bualu tshia “Tukumbajayi ne disanka mudimu wetu wa buambi ne wa kulongesha” wakakolesha dipangadika diabo dia kutungunuka ne kudifila mu mudimu wa buambi. Muyuki wa ntuadijilu wakakula bua makumbula a diambedi; muibidi wakakula bua dialukila mu makumbula; ne muisatu, wakashindamena pa malonga a Bible. Bakalomba ba-misionere pa buloba bujima bua kuanjibu kualukila ku mabo ne kuya kubuela mu mpuilu pamue ne bena mêku abo ne balunda babo. Mu imue miaba, ba-misionere bavua ne tshiabo tshitupa mu programme. Bivua disanka divule bua kuteleja amue malu a ku bipeta bimpe bidibu bapatule mu midimu yabu. Muyuki uvua ulonda, wa “Tulejayi lumu luimpe kudi buonso” wakaleja buenzeji budi nabu bumanyishi bua mu mpukapuka [kudi bantu].

Dinda diakajika ne muyuki wa batismo, utu misangu yonso muanda mutambe bunene mu bisangilu binene bia Bantemu ba Yehowa. Mu mpuilu ayi, musumba munene wa aba bavua bafuma ku diditshipa bavua bimana kumpala kua misumba ya bateleji ne bakandamuna ne dieyemena dionso ne: eyowa ku nkonko ibidi ivuabu babele. Pashishe, bakapeta batismo wa patoke. Tshijadiki tshikole kayipu tshia buenzeji bunene budi nabu dilongesha dia Nzambi!

Dilolo dia dituku disatu

Programme wa dilolo wakatuadija ne dikonkonona diondoke dia Mifundu. Bantemu ba Yehowa mbibidilangana ne miaku idi mu Matayi nshapita wa 24 ne Luka nshapita wa 21. Kuvuaku bamue bavua bela meji ne: kakuena bualu kampanda bupiabupia buvua mua kuambibua pa bidi bitangila nshapita eyi ya mu Bible anyi? Mmushindu kayipu uvuabi ditupakana! Miyuki ya “Tshimanyinu tshia dikalaku diebe netshikale tshinyi?” ne “Utuambile, ndîba kayi dienzeka bintu ebi?” yakafikisha bateleji ku diyukidilangana dia mpatshi pa bimue bitupa bia nshapita ibidi eyi ne yakafila mumvuija mapiamapia a imue mvese. Kuvua mayukidilangana a dikema ku ndekelu kua tshitupa atshi pavua bateleji bafuanyikija note yabu bua kumona né bavua bumvue bimpe malu [avua masulakajibue]. Kakuyi mpata, nkonko mivule neyandamunyibue pafundibua diumvuija edi mu Tshibumba tshia Nsentedi.

Tshiena-bualu tshia dilonga dia Bible tshiakatungunuka mu muyuki wa “Mandamuna adi ibaka a ku nkonko yenu ya mu Bible.” Pashishe, programme wakashintuluka. Tshidimu tshia 1993 tshivua mufikilu wa bidimu 50 bia kalasa ka Galaad ka Watchtower Bible. Muyuki wa “Galaad: bidimu makumi atanu bia dilongesha ne bia mudimu wa bu-misionere” wakaleja bateleji bavua mu mpuilu tshivua tshimane kukumbajibua mu tshikondo atshi. Pavuaku ba-misionere dîba dia muyuki wa “Bipeta bia mudimu wa buambi pa buloba bujima,” bavua babalomba bua kulondela bateleji amue malu mamonamona. Kuteleja muvua bamisionere baalonda kuvua kutua ku muoyo!

Muyuki udi ulonda, wa “Bua tshinyi Bantemu ba Yehowa badi bashala batabale?” uvua dikuabo dilongesha dia malu a kale. Muyuki eu wakaleja ne: bituadijile mu siekele wa kumpala B.B. too ne mpindieu, bena nkristo batu bashala amu batabale. Ebi biakafikisha ku bualu bukuabo buvua kabuyi butekemenyibua. Ku ntuadijilu kua muyuki uvua ulonda, uvua ne tshiena-bualu tshia: “Bamanyishi ba Bukalenge: badi ne disuminyina pa buloba bujima,” ngamba-malu wakaleja mukanda munene (pavuawu mumane kupatuka mu muakulu wa muaba awu) ne wakamba ne: “Mbia disanka bua kumanyisha apa lelu’eu dipatuka dia mukanda eu mupiamupia, udi ne tshiena-bualu tshia: Les Témions de Jéhovah​—Prédicateurs du Royaume de Dieu” (Bantemu ba Yehowa​—Bamanyishi ba Bukalenge bua Nzambi). Mu mukanda eu mbalonde mu bule ne mu butshiama muyuki wa malu a kale a Bantemu ba Yehowa ba mu tshikondo tshietu etshi. Udi ulonda bualu budi butua ku muoyo bua dinanukila, dipangadika, ne ditshimuna, biobi ebi bidi bifila bijadiki bikole bia mushindu udi spiritu wa Yehowa utumika kudi bamusadidi bende.

Dinda dinayi

Dituku adi dikavua dia ndekelu bua mpuilu. Tshiena-bualu tshia dituku tshivua “Tubabidilayi dilongesha dia Nzambi,” tshiakafikisha ku nkomenu muakane wa programme. (Yeshayi 48:17) Mu dinda, ntema ya bateleji ivua mikoka pa muyuki mukosolola mu bitupa bisatu bia miyuki ya bukole. Uvua ne tshiena-bualu tshia “Didimuija difila kudi Yelemiya bua tshikondo tshia kale ne bua tshietu etshi,” muyuki eu uvua usulakaja mvese ku mvese ya nshapita ya 23, 24, ne 25 ya Yelemiya. Mukenji wa bukole kayipu udi mu nshapita eyi! Izalele mubule lulamatu wa mu matuku a Yelemiya wakazakala bua madimuija ende majalame a kudi Nzambi. Kupita apu, buloba bujima buakazakala pakakumbana madimuija aa. Malu mmashilangane lelu’eu anyi? Kabiena nanku to. Bantemu ba Yehowa badi bamanyisha ne dikima mikenji ya Nzambi ya dilumbuluisha. Eyowa, bulongolodi ebu bujima bua malu nebuakamangane ne bienzedi bia Yehowa bia bundumbulula. Ebi nebiumvuije dibutuka butubutu dia bulongolodi bua Satana.

Dinda dia mu Dialumingu diakajika ne drama muibidi, wa Kabanupambudi ne kanuseki Nzambi. Mu mushindu muakane, wakaleja mushindu udi dilongesha dia Nzambi mua kutukuba bua tusete tua vidéo tubi, misambu mibi ne tshilele tshia kukuna matandu munkatshi mua bena nkristo netu kabikadi ne buenzeji kutudi. Ku nkomenu wa drama, muludiki wakatela miaku ivua isaka ku dienza ya umue wa ku banayi ba drama idi ilonda eyi: “Katuena batapibue bisalu bidi mua kutuepula ku buenzeji bua bulongolodi ebu to. Bituabenga kutua nkanana, bulongolodi ebu nebunyange tshieledi tshietu tshia lungenyi mu mayele. Bitualama lulamata anyi katuyi balulame, bionso ebi mbisuikakaje ku bitudi tukuna.” Mbulelela kayipu abu!

Dilolo dia ndekelu

Mpuilu uvua ne lukasa luonso uya matangila ku tshibungubungu pavua ngamba-malu uya ku tshiakuidi bua kuenza muyuki wa patoke uvua ne tshiena-bualu tshia: “Dilongesha dia mushinga bua tshikondo tshietu etshi tshia njiwu.” Mu butoke buonso ne meji, wakasunguluja ntatu minene itutu itutatshisha lelu’eu ne wakasunguluja imue mishindu idi dilongesha dia Nzambi mua kutuambuluisha bua kuikala ne nsombelu muimpe wa disanka. Wakamba ne: bitualonda dilongesha dia mu Mifundu mpindieu, netukumbane bua kudilonda kabidi tshiendelele mu bulongolodi bupiabupia bua Yehowa.

Kunyima kua tshikepeshilu tshia dilonga dia ku lumingu dia Tshibumba tshia Nsentedi, dîba dia muyuki wa ndekelu diakakumbana. Ngamba-malu wakambulula lukasa lukasa malu manene a programme wa mpuilu wa matuku anayi au ne wakavuluija bateleji bua mikanda mipiamipia. Wakamanyisha kabidi ne: kasete ka vidéo kibidi ka ku milongolongo ya tusete tua: La Bible: un livre historique et prophétique kavua ne bua kupatuka kunyima kua matuku makese. Eyowa, kasete ka vidéo kadi ne tshiena-bualu tshia: La Bible: le plus ancien livre de l’humanité, mais toujours d’actualité, bakadi mpindieu bakapatula mu muakulu wa anglais. Luapolo idi itua ku muoyo ivua ifumina miaba idi mu makenga makole yakabadibua, muaba bu Bosnie-Herzégovine. Ku nkomenu, ngamba-malu wakabala miaku idi mu Muambi 12:13: “Eu nshikidilu wa malu, malu wonso umvuiki. Utshine Nzambi mulelela ne utumikile mikenji yende. Bualu ebu mbualu buonso budi muntu ne bua kukumbaja.”

Ndivuluija dimpe kayipu! Muoyo wetu wikale mudiakaje bua dituku diatumbisha bukua-bantu Mulongeshi wetu Munene, Yehowa, ne kuteleja dilongesha diende dia bunzambi.

[Bimfuanyi mu mabeji 24, 25]

Mpuilu ya “Dilongesha dia Nzambi” mu Moscou ne Kiev yakapetesha disanka dinene

[Bimfuanyi mu mabeji 26, 27]

1. Pa kutambushibua, bavule bakaleja tshimanyinu tshia kuditshipa kuabo kudi Nzambi

2. Muteleji kampanda mulume wa bidimu 100 uvua mu mpuilu wakatuibua ku muoyo pakapetaye mukanda mupiamupia

3, 4. Drama ivua isaka ku dieleela meji yakanyishibua bikole

5. Ba-misionere bavuabu bele nkonko mu mpuilu bakazangika buimpe bua dilongesha dia Nzambi