Diya mu diulu anyi mu inferno?
“Udi mumone se: neuye mu diulu anyi mu inferno?”
Ke lukonko luvua luela tshitupa tshinene tshia bena Amerike mu makebulula menza matuku adi panshi aa. Nzubu mukebuludi wa malu a bitendelelu mu tshimenga tshia Princeton wakafunda bipeta biawu mu mukanda eu wa Ditendelela mu Amerike 1992-1993 (angl.).
Mmunyi muwuvua mua kuandamuna? Mukajebe peshi banangibue bebe bakuabo badi baya mu diulu padibo bafua anyi? Udi wela meji ne: wewe peshi bakuabo nenuye mu inferno anyi?
Makebulula akaleja se: bantu 78 pa lukama badi bela meji se: nebaye mu diulu, bakuabo bavule bakandamuna mushindu wa muomumue kukadi bidimu 40. Mu inferno? Bantu 77 pa lukama badi bamba se: kakuena diya mu inferno.
Mandamuna abo avua mashila pa dimanya dijalame dia mu Bible anyi? Bushuwa, bantu 4 pa 10 bavua bitabe se: batu baya mu ditendelela misangu mishadile ku ivuabo bayamu kukadi bidimu bitanu. Amu bantu 28 pa lukama ke bavua bajadika se: batu babuela mu dilonga dia Bible dia mu tusumbu, ne bantu 27 pa lukama bavua baya mu tulasa tua malongesha a bitendelelu.
Wewe mulonga Bible mu lutulu, neujandule malu adi akemesha. Tshilejilu: Bible udi wamba patoke se: Yezu wakaya mu “inferno” ku lufu luende, ke mudibi bifunda mu nkudimuinu mikuabo ya Bible. (Bienzedi 2:31, King James version; “Hadès,” Traduction du monde nouveau) Dîyi dia Nzambi didi dijadika se: nansha mukalenge Davidi nansha Yona Mubatiji kabakaya mu diulu pakafuabo. (Matayi 11:11; Bienzedi 2:29) Aa mmalu malelela, ki mmuenenu patupu idi ifumina ku dikebulula mu malu a ditendelela.
Malu makuabo malelela adi mua kukutonda: Bible udi ulongesha se: bapostolo ba Yezu pamue ne kasumbu kakese ka bakuabo bantu nebaye mu diulu bua kukokesha pamue ne Yezu. Kadi, tshi-bungi tshia bafuafua badi baya mu lukita mudi bantu buonso [baya]. Nzambi neababiishe ku lufu, neabapingaje ku muoyo pa buloba ne ditekemena dia kuikala ne muoyo wa kashidi mu disanka pa buloba bukudimuna mparadizu.
Bantemu ba Yehowa nebasanke bua kukuambuluisha bua wewe kupeta ditekemena edi dishindamena pa Bible webe nkayebe.