Vuayi mu mpuilu wa distrike wa “Ditshina dia Nzambi”

MU DIUMVUANGANA ne mukenji wa Mozese, kale, bavua balomba basadidi ba Yehowa bua kudisangisha misangu isatu ku tshidimu tshionso bua amue mafesto. Bisangilu ebi bivua bikondo bia disanka ne bivua kabidi biibaka bikole mu nyuma.​—Dutelonome 16:16.

Bia muomumue, mu matuku etu aa, basadidi ba Yehowa badi badisangisha misangu isatu ku tshidimu tshionso: bua mpuilu wa pa buende wa dituku dimue, ne bua mpuilu wa tshijengu wa matuku abidi, pashishe ne bua mpuilu wa distrike wa matuku asatu anyi anayi. Mu tshidimu tshia mudimu tshia 1994, Bantemu ba Yehowa nebadisangishe mu mpuilu wa distrike wa “Ditshina dia Nzambi.”

Dîyi dia Nzambi ki ndishile mpata kaba nansha kakese pa bidi bitangila mushinga wa ditshina dia Nzambi. Ditshina dia nanku nditedibuemu misangu mitue ku 200. Ditshina dia Nzambi ndikubibua amu bu mudibi mu Nsumuinu 16:6: “Mu ditshina dia Yehowa, badi bepuka malu mabi.” Ke bualu kayi, mbatuambile mu Musambu wa 111:10 ne: ditshina dia Yehowa mmbangilu menemene wa meji!

Bidi mua kuambibua se: kudi bitupa bibidi bia ditshina dia Nzambi. Diambedi, ditshina dia mushindu’eu ndisaka kudi dinanga. Tudi tutshina bua katubungamiji Nzambi bua dinanga dikole ditudi nadi kudiye. (Nsumuinu 27:11) Pashishe kabidi, buetu tuetu, meji neatuambuluishe bua kudima ditshina dia Nzambi munda muetu, bualu tudi bamanye ne: Nzambi udi “kabidi kapia kadi kashidisha” aba buonso badi benza malu mabi.​—Ebelu 12:29.

Ku mpuilu wetu wa “Ditshina dia Nzambi,” netukupetele malongesha ne makankamija mavule bua kudiundisha ditshina dietu dia Nzambi. Dilongesha dia mushindu’eu nedienzeke ku butuangaji bua miyuki, manaya a tshilejilu, drama, pamue ne dilonda dia malu mamonamona.

Amu bu muakatuminabu bena Izalele ba kale dîyi bua kabayi mu mpuilu bianza bitupu, nenku, tuenze madikolela bua tuye mu mpuilu yetu ne dijinga dikole dia kuyitua nyama ku mikolo. (Dutelonome 16:17) Tudi mua kutua mpuilu eu wa distrike nyama ku mikolo bua kulubulukaye pa kuleja kanemu bua mesa a Yehowa. Mmushindu kayi? Pakulua pa dîba, pa kuteleja ne ntema ya pa buayi bionso biambibua kumbukila ku tshibasa, pa kuimba misambu ne muoyo umue, ne pa kuepuka kuyukidilangana anyi kuendakana dîba didi programme wenzeka. Tuambuluishayi kabidi muetu muonso pa kuenza midimu yetu ku budisuile. Ndongoluelu wa mpuilu udi ne bibambalu bivule, bionso bia kudibi bidi bikengela basadidi bua kubilombola. Tufilayi mapa a mfranga, bilondeshile mudi Yehowa mutubeneshe, bualu biakudia bia ku mubidi ne bia mu nyuma, bidi bisumbibua ku diambuluisha dia mapa a ku budisuile.

Musadidi yonso wa Yehowa adianjile kudilongolola mpindieu bua ikaleku matuku wonso asatu a mpuilu wa distrike wa “Ditshina dia Nzambi,” biangatshile ku musambu wa diunzulula nawu mu ditanu mu dinda too ne ku disambila dia nkomenu mu dia lumingu ku dilolo.

Miaba yenzekela mpuilu wa distrike mu 1994 bua Burundi, Congo, ne Zaïre

MU DIA 12-14 TSHIMUNGU

KINSHASA

MU DIA 19-21 TSHIMUNGU

BRAZZAVILLE (CONGO)

KIKWIT

MATADI

MBUJI-MAYI

MU DIA 26-28 TSHIMUNGU

BUNIA

KANANGA

LUBUMBASHI

POINTE-NOIRE (CONGO)

MU DIA 2-4 KABITENDE

BANDUNDU

BUTEMBO

KOLWEZI

MU DIA 9-11 KABITENDE

BUKAVU

LODJA

MULONGO

TSHIKAPA

MU DIA 16-18 KABITENDE

BUJUMBURA (BURUNDI)

MBANDAKA

MU DIA 23-25 KABITENDE

BUMBA

GEMENA

MU DIA 30 KABITENDE TOO NE MU DIA 2 KASUAMANSENSE

BOENDE

KISANGANI

KINDU

MU DIA 7-9 KASUAMANSENSE

ISIRO

KALEMIE