Utuku wenza disua dia Nzambi anyi?

MU MUDIMU wabo wa buambi wa ku nzubu ne ku nzubu, Bantemu kampanda ba Yehowa babidi bakasambakena ne muakuidi kansanga wa ekleziya episkopale. Uvua umueneka muntu muena musangelu, wa miedi mivule, muikale ne bidimu bu 60, muvuale mupila mufunde ne maleta manene dîna dia ekleziya wende. Diakamue wakanungana, wamba ne: “Ndi njinga bua se: bena ekleziya wetu bikala pabu ne mitalu bu inudi nayi mu ditangalaja Dîyi [dia Nzambi], kadi ndi nnulomba bua kanualukidi musangu mukuabo bua kunkumbula ku nzubu kuanyi nansha.”

Eyowa, kudi bantu bavule badi bakatshila bua mudimu wa Bantemu ba Yehowa ne babatumbisha bua tshisumi ne musangelu biabu. Kadi, kabayi basankidila bionso bitu Bantemu benza nansha kakese, anyi bamona ne: buabu buobo nkayabu, kuenza mudimu awu kakuena ne mushinga to. Pine apo, dibengangana dia nsombelu wa malu didiku lelu’eu ki mmuanda mupiamupia nansha. Yezu wakadisunguluja mu tshikondo tshiende, wakashindika bualu ebu ku diambuluisha dia tshimfuanyi tshilenga tshidi tshisaka ku diela meji.

“Udi wela meji kayi? Bua muntu kampanda uvua ne bana ba balume babidi. Wakaya kudi wa kumpala, e kumuambila ne: ‘Muana, uye lelu kuenza mudimu mu budimi bua mvinyo.’ Mu diandamuna, yeye eu wakamba ne: ‘Nenye, mukalenge,’ kadi kakapatuka to. Mufike kudi muibidi, wakamuambila bualu bua muomumue. Mu diandamuna, yeye eu wakamba ne: ‘Tshiena musue.’ Pashishe, wakabungama bikole bitambe, e kupatukaye. Nnganyi wa ku bana babidi aba wakenza disua dia tatuende?”​—Matayi 21:28-31.

Diandamuna ndipepele. Amu bu musumba wa bantu bavua bateleja Yezu, tuvua petu mua kuandamuna ne: “Ng’wa ndekedi.” Kadi, kusambuka too ne pa bualu ebu bupepele bua kubujingulula, ku diambuluisha dia tshimfuanyi, Yezu uvua ukoka ntema yetu ku bualu bua se: kuenza tshivua tatu musue ke kuvua ne mushinga. Nansha muvua muanende muibidi muambe ne: kavua musue kuya, kadi, pashishe wakaya ne wakatumbishibua bua tshienzedi etshi. Kuenza mudimu muakane kudi paku ne mushinga mukole. Muana muibidi wakenza bimpe pakayaye kutumika mu budimi bua mvinyo bua tatuende; kakuya kutumika mu budimi buenda nkayende to.

Bionso ebi mbisuikakaja ku tshinyi tshitudi tuetu ne bua kuenza? Ntshinyi tshidi Nzambi mutekemene kudi bamutendeledi bende lelu’eu? Ntshinyi tshitudi mua kulonga ku ngikadilu uvua nende Yezu mu nsombelu wende ne tshiatuambuluisha bua kuenza disua dia Tatuende? Eyi nkonko mminene, dipeta dietu dia mandamuna majalame nediumvuije makanda a mubidi a kashidi, bualu “eu udi wenza disua dia Nzambi neashale tshiendelele.”​—1 Yone 2:17; Efeso 5:17.

“Disua dia Nzambi” didi tshinyi?

Tshibikidilu “disua” ntshifundibue misangu 80 mu mukanda wa Comprehensive Concordance wa Traduction du monde nouveau. Misangu bu 60 (anyi 75 pa lukama) mmitangile disua dia Nzambi. Biambilu bu mudi “disua dia Nzambi,” “disua dia Tatuanyi,” bidi bisanganyibua misangu mipite pa 20. Pa bualu ebu, tudi mua kumona se: disua dia Nzambi didi ne bua kuikala tshintu tshia mushinga mupite bunene kutudi. Kuenza disua dia Nzambi kudi ne bua kuikala tshipatshila tshinene mu nsombelu wetu.

Mu muakulu wa anglais, muaku “disua” udi umvuija ‘dijinga, tshintu tshidi muoyo usua, dipangadika, tshintu kampanda tshidi muoyo ujinga, nangananga disungula anyi dipangadika bidi eu udi ne bukokeshi anyi bumfumu wenza.’ Nenku, Yehowa, Mfumu mutambe bunene udi ku mutu kua bionso udi ne disua, dijinga anyi dipangadika. Ndia tshinyi? Mifundu idi ituambila mu tshimue tshitupa tshiayi ne: “Disua [dia Nzambi] ndia se: bantu ba mishindu yonso bapandishibue ne bafike ku dimanya dijalame dia bulelela.” (1 Timote 2:4) Yezu Kristo pamue ne bena nkristo ba kumpala bakatumika ne anyima wabu mujima bua kutuadila bantu bakuabu dimanya dijalame.​—Matayi 9:35; Bienzedi 5:42; Filipoi 2:19, 22.

Nnganyi udi wenza disua dia Nzambi lelu wa ndaya eu? Munkatshi mua bantu batue ku miliyare ibidi badi badiamba patoke mudibo balondi ba Yezu Kristo, mbungi kayi badi bu muana wa balume wa mu tshimfuanyi tshia Yezu, eu wakapatuka bua kuenza disua dia tatuende? Diandamuna ndipepele bua kudipeta. Balondi balelela ba dikasa dia Yezu Kristo badi ne bua kuikala benza mudimu eu udiye mubatumine dîyi bua kuenza: “Diambedi bidi bikengela bua lumu luimpe kuanjilu kumanyishibua mu matunga wonso.” (Mako 13:10) Bantemu ba Yehowa, bapite pa miliyo inayi ne tshitupa pa buloba bujima, badi bamanyisha ne tshisumi tshionso lumu luimpe lua Bukalenge bua Nzambi, balongesha bantu bakuabo ne bafunkuna Bukalenge bua Nzambi bu ditekemena dimuepele dia bukua-bantu buatuala ditalala ne dikubibua. Udiku pebe muditue muebe muonso mu dienza disua dia Nzambi anyi? Udiku umanyisha lumu luimpe lua Bukalenge bu muakenza Yezu anyi?​—Bienzedi 10:42; Ebelu 10:7.

Kupeta disanka mu dienza disua dia Nzambi

Padiku disanka mu dilonga dia tshidi disua dia Tatu, kudi kabidi disanka dipite bunene mu dilongesha bantu bakuabo disua dia Nzambi. Yezu wakapeta disanka bualu wakalongesha bantu malu adi atangila Tatuende. Buende yeye, bivu’anu bu biakudia. (Yone 4:34) Tuetu petu netupete disanka dilelela bituikala tuenza muakenza Yezu, mbuena-kuamba ne: kumanyisha ne kulongesha malu akalongeshaye, malu akapetaye kudi Tatuende. (Matayi 28:19, 20) Yezu wakalaya ne: “binuikala bamanya malu aa, nenuikale ne disanka binuaenza.”​—Yone 13:17.

Tshilejilu: Mamu kampanda udi ufumina ku dituadija tshiakabidi mudimu wa ku dîba ne ku dîba wa bumpanda-njila wakamba ne: “Kumona mpala wa mulongi wa Bible ubalakana padi malelela kabukabu adi mu Bible amulenga ku muoyo mbualu bua disanka dinene! Mbualu bua disanka kundi pandi mmona utudi tulonga nende Mifundu udianjila kufunda mvese yonso kumpala kua dilonga ne muikale ufunda malu manene patudi tulonga bua kumonaye mua kuandamuna nkonko ya diambulula ku shòò.” Umue wa ku balongi bende ba Bible wakatuadija kumvua bulelela patshivuaye mushika-nkunde. Lelu’eu, ukadi mukaji musela ne uditangidila ende malu, uvua ujinga kupetangana ne Bantemu. Ndisanka kayipu divuaye nadi pakamukumbula muanetu kampanda mpanda-njila mukaji! Inabanza eu wakasanka bikole bitambe bua kutuadija tshiakabidi dilonga diende dia Bible.

Kulama disanka bua kuenza disua dia Nzambi

Davidi, mukalenge wa Izalele wa kale, uvua umue wa ku bantu bavua bakeba mushindu wa kuenza disua dia Nzambi mu muoyo wabo mujima. Nansha muvuaye upetangana ne ntatu ne bilobeshi, ku diambuluisha dia spiritu, wakamba ne: “Kuenza disua diebe, Ô Nzambi wanyi, kudi kunsankisha, ne mukenji webe udi munda muanyi.” (Musambu wa 40:8) Kuenza disua dia Nzambi kuvua menemene mu anyima wa Davidi anyi mu bumuntu buende. Kuvua bualu busokome bua disanka diende dikena ndekelu mu disadila Yehowa. Kuenza disua dia Nzambi kakuvua bualu bukole kudi Davidi to. Kadi kuvua kumusankisha, bualu buvua bufumina mu mutshima wende. Mu matuku ende wonso a muoyo, wakenza madikolela bua kusadila Nzambi, Yehowa, nansha muakenzaye minga misangu mpekatu ne bilema.

Ku mpukapuka, disanka dietu didi mua kuikala dienda dikepela. Tudi mua kuikala bapungile anyi batekeshibue ku muoyo. Pamu’apa mmalu atuakenza kale adi atungunuka ne kututonda, kuondo ketu ka muoyo kadi mua kutunyingalaja bua bienzedi bibi kampanda bituakenza kukadi kupite tshikondo tshile. Pa tshibidilu, tudi mua kutshimuna bingenyingenyi bia mushindu’eu pa kutamba kulonga Dîyi dia Nzambi. Tudi mua kuipatshila difunda mikenji ya Nzambi “munda” muetu bu muenzele Davidi. Bituenza madikolela bua kukumbaja disua dia Nzambi ne anyima wetu mujima, mbuena-kuamba ne: kudikumbaja ne bukole buetu buonso, yeye neatufute bilondeshile madikolela etu, bualu mmuena lulamatu.​—Efeso 6:6; Ebelu 6:10-12; 1 Petelo 4:19.

Mu Ebelu 10:5-7, mupostolo Paulo udi utela miaku ya Davidi idi mu Musambu wa 40:6-8 ne uyikumbajila Yezu Kristo. Pa kuenza nanku, Paulo wakaleja patoke mushindu udi Yezu pabuipi ne Tatuende. Mu tshiena-Ebelu, muaku “disua” udi umvuija ‘disanka, dijinga, dienzela muntu bualu buimpe, anyi tshintu tshidi tshipetesha disanka.’ Nenku, Musambu wa 40:8 uvua mua kubadibua mushindu’eu bua Kristo: “Kukusankisha, Ô Nzambi wanyi, kudi kunsankisha bikole.”a Anu bu mudibi, Yezu wakajinga kuenza tshivua tshisankisha Tatuende. Yezu wakenza kupita too ne pa bivuaye mulombibue. Wakenza tshintu tshionso tshivua mu diumvuangana ne mutshima wa Tatuende, ne wakasanka bua kutshienza.

Yezu wakapitshisha muoyo wende mujima pa buloba, pa kuya miaba mivule wenda ulongesha bakuabo tshidi disua dia Nzambi pamue ne tshivuabo ne bua kuenza bua kupeta dibenesha dia kudi Nzambi. Uvua mumanyishi ne mulongeshi wa ku dîba ne ku dîba ne wakapeta disanka dipite bunene pa kuenza mudimu awu. Nenku, bidi bia meji bua se: bituenza bivule mu mudimu wa Yehowa, apu netupete disanka dinene. Udi pebe mua kusadila ku dîba ne ku dîba mu mudimu wa buambi bua disanka diebe kudiundadi padi anyi?

Diambuluisha dikuabu mu dilama disanka mu dienza disua dia Nzambi nkuikala ne muenenu mujalame wa malu atshivuavua. Ke tshivua Yezu wenza. “Bualu bua disanka diakatekabu kumpala kuende, wakananukila mutshi wa tshinyongopelu, muikale ulengulula bundu.” Buende yeye, disanka divua difumina ku dishala muena lulamatu too ne ku ndekelu, ne pashishe, kupeta difutu dia kutekibua bu Mukalenge ku dia balume dia Tatuende.​—Ebelu 12:2.

Fuanyikija disanka ditshivuavua diafikila aba badi batungunuke ne kuenza disua dia Nzambi. Nebamone dibutudibua dia aba badi basuminyine ne kuleja budisui pa kuenza disua diabu nkayabu nansha diodi dikale dikengesha aba badi benza madikolela bua kuenza disua dia Nzambi. (2 Tesalonike 1:7, 8) Ela meji ku disanka dia betu bananga babishiibua ku lufu bua kupetabu mushindu wa kulonga ne kuenza disua dia Nzambi. Anyi konkonona disua dia Nzambi dia kuasulula mparadizu pa buloba. Ndekelu wa bionso, fuanyikija dipikudibua dikalaku pabutudibua Satana bua kashidi, muluishi wa disua dia Nzambi.

Eyowa, kuenza disua dia Nzambi lelu’eu kudi mua kututuadila disanka dinene mpindieu pamue ne diakalenga dikena nshikidilu mu matuku atshivuavua. Katuyi tukatshila bua diandamuna ditudi mua kupeta mu mudimu wa bumanyishi, tuidikijayi tshilejilu tshia Yezu mu disankidila kuenza disua dia Tatuende.

[Mêyi adi kuinshi]