Butuku bua kuvuluka

PAVUA bena Izalele bapika mu Ejipitu munkatshi mua bidimu bipite pa 3 500, Yehowa Nzambi wakabambila bua kushipabu muan’a mukoko, pashishe, kumiamina mashi ende ku biibi ne pa mikamba ya biibi bia nzubu yabo. Anu buine butuku abu, muanjelu wa Nzambi wakapita pa nzubu ivua ne tshimanyinu etshi, kadi wakashipa ban’a bute ba balume mu nzubu yonso ya bena Ejipitu. Pashishe, bena Izalele bakapikudibua. Bituadijile apo, dituku dia mufikilu wa muanda eu, bena Yuda badi benza difesto dia Pasaka.

Kunyima kua Yezu Kristo mumane kuenza bua musangu wa ndekelu diende difesto dia Pasaka pamue ne bapostolo bende, wakabanjija didia divua ne bua kuvuluija lufu luende lua mulambu. Wakapesha bapostolo bende ba lulamatu diampa wamba ne: “Angatayi, nudie. Etshi tshidi tshileja mubidi wanyi.” Pashishe, wakabapesha lupanza lua mvinyo wamba ne: “Nuayi buonso buenu; bualu etshi tshidi tshileja ‘mashi anyi a tshiovo,’ adi ne bua kumuangalajibua bua ba bungi bua dijimijibua dia mpekato.” Yezu wakamba kabidi ne: “Tungunukayi ne kuenza nunku bua kumvuluka.” (Matayo 26:26-28; Luka 22:19, 20) Nenku, Yezu wakatumina bamulondi bende dîyi bua kuikalabo benza difesto edi dia lufu luende.

Bantemu ba Yehowa badi bakubikila ne musangelu bua wewe kudisanga kudibu bua kuenza Tshivulukilu etshi tshia lufu lua Yezu. Udi mua kubuela mu Nzubu wa Bukalenge udi pabuipi ne nzubu webe. Ebeja Bantemu ba mu musoko wenu dîba dijalame ne muaba wenzekelatshi. Dituku adi, nedikale mu disambombo dia 26 Luabanya 1994, mampa ne mvinyo nebiendeshibue kunyima kua dibuela dia dîba.