Buludiki bua bantu mbupangile anyi?

NNGANYI wakafuka bintu bionso? Biwandamuna se: “nNzambi,” udi umue wa ku miliyo ya bantu badi bitabuja Nzambi wa mu Bible, Mufuki.

Pabi, bavule ba ku aba badi bitabuja Nzambi badi ne lutatu bua kuanyisha se: Nzambi udi uditatshisha bushuwa bua kujikija ntatu ya bukua-bantu. Mbia bushuwa bua kuela meji se: Nzambi udi ne programme ukadiye pa kukumbaja, muine watuadila bukua-bantu disulakana anyi? Bavule badi bamone se: kakuena tshidi tshibijadika.

Munkatshi mua miliyo ya bidimu, bantu mbatete ntumikilu mishindu kabukabu bua kujikijabo ntatu, pa kuela Nzambi nyima. Kadi, bantu mbafike ku bipeta bilenga anyi? Peshi ntatu idi’anu yenda ivula ne ikola mua kuyijikija? Mmushindu kayi udi muntu uluangana ne ntatu ikena yanyisha ditanaja idi minemene bukua-bantu lelu’eu?

Mushikuluji kampanda udi umvuija ne: “Katshia benza biapu bipiluke bia mpolondo, matunga mabanji mmele kalele mu ditumika ne mabanji a ku tshifukilu a pa buloba bujima bilondeshile dienza ne ditumika dinekesha, bakebesha dinyanguka dia bidi bitunyunguluke, bionso ebi bua diakabi dia matunga mapele.”

Muntu mmutungunuke ne kunyanga buloba. Tshikandakanda tshia ku Argentine tshia Clarín tshiakamanyisha ne: “Mu bidimu makumi atanu bia ndekelu wa siekele eu, lukuka lua mabanji‚ dipanga budimu‚ ne dilengulula mbikebeshe bipupu binene bidi bishipeshe bantu bavule pamue ne dinyanguka dia bidi bitunyunguluke mushindu mubi menemene.”

Bupele bukole mbumueneke bujame kashidi mu bukua-bantu lelu’eu. Nansha matunga adi abadibua mudiwu mabanji kaena apanga kutua mikemu bua bujitu bua bupele. Bilondeshile tshikandakanda tshia The Globe and Mail tshia ku Toronto, ku Canada, mbimueneke se: “tshia bisatu tshimue tshia bena Canada nebabuele mu bupele eku bikale ku midimu yabu ya matuku wonso.” Tshikandakanda tshidi tshisakidila ne: “dinyanguka dia nsombelu wa mêku nkamue ka ku tubingila tua bupele, ne luine lutatu elu ndutambe kukola mu bidimu bidi panshi ebi.”

Ditumika ne diamba mu mishindu yadi yonso ntshimanyinu tshikuabu tshia dibipa dia nsombelu wa bantu. Bantu badi mua kuenza tshinyi? Nansha bualu bumue, ke mudibi bimueneka. Bantu miliyo mivule mbatungunuke ne kujimija makanda a mubidi, makokeshi a mu tshieledi tshia lungenyi ne bikadilu bilenga, tshipeta tshia ditumika dibi ne bibipishi bia bumuntu. Ne muanda eu udi wenda umuangalaka bu muishi.

Bena science mbamueneke bapangila mvita yabu ya diluisha masama. Bushuwa, ditumika ne mamanya mapiluke ne biamu bipiabipia bia mpolondo mu tshikondo etshi ndifikishe ku matshimuna mavule. Kadi, imue ntumikilu ya bipeta bia bukebikebi kudi bena science ndiambuluishe ku divulangana dia tuishi tubi tudi katuyi tufua ku manga, bua dibidila nawu.

Mbulamatadi ya bantu kayena mua kuimanyika tshinyangu tshia maneme a bantu tshidi katshiyi tshishiye muaba lelu. Tshilejilu, nansha mudibo benza malaya mavule ne bela mikenji bua kupumbisha bupika, pa buloba bujima matshinkidila adi aleja se: pa buloba bujima, bantu bapite pa miliyo nkama mivule mbenzejibue bua kutumika mu nsombelu mifuane bupika bukuate muendi.

Kadi, bua tshinyi buludiki bua bantu mbupangile? Tuanjibi kukonkonona amue malu masunguluke. Buludiki bua bantu budi bufuma kudi bantu​—bine bantu badi belela mikalu minene. Bule bua muoyo wabu mbupite kuipidila ne muoyo eu mmuela mikalu kudi nshidimukilu kampanda peshi nsombelu ya miaba idibo basanganyibua. Dimanya diabu ndiipidile padi. Nansha biajingabu kutumika ne buludiki bua mushindu kayi, buine ebu budi anu busuikakaja ku mikalu eyi. Anu muvua mupostolo Paulo muambe, “buonso bakenza mpekatu ne kabena bafika ku butumbi bua Nzambi.”​—Lomo 3:23.

Bushuwa, ntatu mivule idi tshitupa tshinene tshia bukua-bantu bapetangana nayi ntshipeta tshidi tshifuma buludi peshi mu mushindu kampanda ku dipanga kulonda buludiki bua Nzambi. Kadi, nkuepi kua kupetela buine buludiki ebu? Mmunyi mudi Nzambi utuludika lelu? Tshiena-bualu tshidi tshilonda etshi tshidi tshifila mandamuna ku nkonko eyi.