Lumu luimpe ludi lumbukila ku Malawi!

BIVUA bualu bua disanka dinene pa kumvua ne: mu dia 15 Kasuabanga 1993, Watch Tower and Tract Society of Pennsylvania wakafundibua mu mikanda ya mbulamatadi mu ditunga dia ku sud-est wa Afrike dia Malawi. Ebi nebipeteshe Bantemu ba Yehowa dimanyibua didi mu diuvuangana ne mikenji ya ditunga ne budikadidi bua kumanyisha malelela a mu Bible kudi bantu ba mu Malawi.

Kale mu 1948, biro bia filiale wa Société Watch Tower biakatekibua mu Malawi bua kulombola mudimu wa Bantemu ba Yehowa mu ditunga adi. Mu dia 8 Tshiongo 1957, Société Watch Tower bua musangu wa kumpala wakafundibua ku mikanda ya mbulamatadi. Munkatshi mua bidimu bivule, Bantemu ba Yehowa bakavula ne lukasa luonso. Kadi buluishi bua tshikisu buakabudika mu 1964. Mbua tshinyi?

Mu ditumikila Nzambi, Bantemu ba Yehowa bakalama ne dîsu dikole ndubidila wabo pa bidi bitangila malu a tshididi. (Yone 17:16) Kakuyi mpata, bamue kabakajingulula bimpe ngenzedi eu udi mu diumvuangana ne Mifundu ne bakabanda Bantemu ba Yehowa bu tshitendelelu tshidi tshijinga dishintuluka diondoke mu malu wonso ne bu tshipetudi tshia mikenji. Pa nanku, bamue bavua badiumvua babingishibue mu malu a tshikisu avuabo benzela bena nkristo banangi ba ditalala aba. Bantemu bavule bakipatshibua ku midimu yabo, bakabatuta, ne bakafuishibua bundu mu nsombelu mikuabo kabidi. Bakuabo bakabatapulula ku bukole ne bana babo.

Mu 1972, Bantemu bapite pa 30 000 ne bakuabo bavuabo balonga nabo Bible bavua ne bua kumbuka mu ditunga adi batshina kujimija mioyo yabo. Binunu ne binunu bakaya kusombela mu tumponya tua bena tshimuangi pabuipi ne Mozambique. Kadi mu 1975, bena tshimuangi aba bakabapingaja ku Malawi, kuvuabo ne bua kuakamangana ne dikengeshibua dia katshi ku dînu. Bena tshimuangi bavule bakatekibua mu tumponya tua dikengesha bantu ne dibenzeja midimu mikole. Munkatshi mua tshimvundu etshi, Société Watch Tower wakumbushibua ku liste wa malongolodi adi mbulamatadi muanyishe mu Malawi. Biangatshile ku tshikondo atshi, Bantemu ba Yehowa ne malongolodi abo adi mu diumvuangana ne mikenji bakakandikibua mu ditunga adi.

Bantemu kabakatombokela mbulamatadi bua malu wonso aa to. Kabakajula tshimvundu anyi kupatuka mu njila bua kutombokela mbulamatadi nansha. Pamutu pa nanku, bakatumikila dîyi-ditumina bena nkristo dia kuleja kanemu ne ditshina kudi “bamfumu badi ku mutu” ba mbulamatadi. (Lomo 13:1-7; 1 Timote 2:1, 2) Bantemu mbabingishe kabidi mêyi-maludiki mabandile a nsombelu wa bena nkristo adi Bible uleja, ne pa kuenza nanku, mbatungunuke ne kufila tshilejilu tshimpe mu ngenzedi.

Ne budikadidi budibo batshifuma kudipeta, Bantemu ba Yehowa mu Malawi badi mpindieu bangate dipangadika dia kutungunuka ne kumanyisha malelela a mu Bible kakuyi dijingakana, “mu tshikondo tshiakane.”​—2 Timote 4:2.

[Tshimfuanyi mu dibeji 31]

Milton Henschel ne dîku dia Betele dia ku Malawi mu bidimu bia 1960