“Bantemu ba Yehowa bampandishi!”

MU MATUKU a ku ndekelu aa, bavule badi badileja “bena luonji, kabayi banangi ba bimpe.” (2 Timote 3:1, 3, NW) Isaac, ministre mudisuile ku filiale wa Société Watch Tower mu Afrike wa ku ouest, wakadimuena bulelela bua bualu ebu. Udi ulonda ne:

“Mu Tshiongo 1992, mvua ngenza luendu mu tshitupa tshia njila muvua kamuyi bantu mu taksi ne bena-ngendu bakuabo batanu. Ngakatuadija muyuki ne mukaji uvua musombele pabuipi nanyi, ne disanka dionso wakanyisha broshire mumvuiji wa Bible ungakamupesha.

“Mu tshimpitshimpi, pa dîba inayi wa dilolo, mashinyi mapiamapia kaayi ne dilata dia nimero wa mbulamatadi akimana kumpala kuetu, mashinyi etu akimana ne dikuyakana dikole dia ndundu mu buloba. Balume basatu ba mpolondo, yonso wa kudibo ne tshingoma, bakatumpika mu mashinyi ne kunzululabo ku bukole biibi bia taksi. ‘Patukayi, buonso buenu,’ ke muakavuma umue wa kudibo.

“Mulume umue wakanyenga tshibuta tshianyi tshia mikanda. Pakamonaye ne: tshivua anu ne mikanda idi yumvuija Bible, wakakupa tshibuta kule. ‘Udi ne tshintu tshikuabo kayi?’ ke muakangebejaye, tshingoma tshitangija kundi. Ne lukasa luonso ngakamupesha mfranga yonso ivua mu kabuta kanyi. ‘Mbionso anyi?’ ke muakangebejaye. Ngakamuambila ne: mvua umue wa ku Bantemu ba Yehowa ne se: Bantemu ba Yehowa kabatu badinga. Wakanyenga kabuta kanyi, kumona kalata kanyi ka Société Watch Tower ne pashishe kungambila ne: ‘Mbimpe, Watch Tower. Indila apa.’

“Pashishe, wakakudimuka kudi mukaji umvua muyukidilangane nende mu taksi. Ne lukasa luonso wakapatula shenete wende mu nshingu ne kumupesha mfranga ivua mu kabuta kende. Pakamona mulume mule wa kafiondo eu broshire mu bianza biende bivua bizakala, wakela meji ne: tuvua bende pamue, ne nanku kumuambilaye bua kushala nanyi.

“Pinapo, bantomboji bakuabo bavua ne bingoma, ne luonji luonso bakatuadija kubunda bena-ngendu netu. Bakatuta ne kunyenga bintu bia kanyemesha ne mulume mukuabo uvua netu mu luendu. Muivi umue wakadiela pa shenete wa mu nshingu wa mukaji muibidi. Bu muvuaye utua nkanana, bakamututa bikole ku mutu ne pa tshiadi ne tshitaku tshia tshingoma too ne pakafuaye. Mukaji muisatu wakapatulabo mu mashinyi bakamukuma disashi pa tshiadi. Bia luse, wakafua pende. Amu meme ne mukaji uvua nanyi ke bakashala kakuyi dijiwuka nansha dimue.

“Pakaluabo kutuambula ku shòò kudi muena mashinyi kampanda uvua upita, mukaji eu ne buôwa bukole uvua anu wambulula ne: ‘Bantemu ba Yehowa bampandishi!’”