Abrahama: Wakajikibua apa, kadi utshidi anu ne muoyo anyi?

Munkatshi mua siekele mivule, bena Yuda, bena Izlame ne bena nkristo batu baya ku muaba eu.

Udi pebe mua kuwukumbula mu tshimenga tshia kale tshia Hebron, ku sud kua Yeruzaleme. Muaba eu udi ubikidibua ne: Haram el-Khalil ne kabidi ne: Majambu a Ba-nkambua. Eyowa, eu mmuaba udi mumanyike kudi bavule bu muaba wakajikibua bankambua Abrahama, Izaka, ne Yakoba, ne kabidi bakaji babu Sara, Rebeka, ne Lea.

Uvuluke se: bilondeshile Bible, ku lufu lua mukajende munanga, Sara, Abrahama wakasumba nyongolo bu muaba wa kujika bantu ne tshimue tshitupa tshia buloba ku Machpelah, pabuipi ne tshimenga tshia Hebron. (Genese 23:2-20) Ku shòò, Abrahama wakajikibua pende muaba eu, anu bu muakenzekabi kabidi bua bakuabo bena dîku diende. Kunyima kua siekele mivule, pabuipi ne majambu aa majidila a ka-bukulu, Herode Munene wakiibaka nzubu munenanenayi wakaluabo pashishe kushintulula ne kualabaja kudi batshimunyi, bilondeshile abo mitabuja.

Ku tshibuelelu, kudi majambu asambombo (bivulukilu anyi nkita ya munda mutupu). Kazubu kadi kaleja dia Izaka, muana wa balume wa Abrahama. Ku luseke, mbatubule masoso mu buloba avuabo babuelela bua kufika muinshi menemene. Bakebuludi ba bintu bianguila muinshi mua buloba bakasangana bibambalu muvua mifuba ya kale kale.

Netuambe tshinyi bua Abrahama? Bikalaye mujikibue mu lubinga anyi mu nyongolo udi mpindieu muinshi mua dikolo edi, ukadi menemene mufue kukadi bidimu bivule, ki mmuomu anyi? Bantu bavule badi bakumbula muaba eu badi mua kupunga ku dîyi edi. Kadi, muprofete udi mutambe Abrahama wakamba mu ngumvuilu kampanda se: Abrahama utshidi anu ne muoyo. Mmu mushindu kayi awu? Ntshinyi tshidi mêyi aa mua kusakidila ku ditabuja diebe?

Biwasua, bala tshiena-bualu tshia “Bananga bebe bakafua​—Neubamone tshiakabidi anyi?” (Dibeji 5) Tshidi tshileja malu avua muprofete munene au muambe bua kumvuija mutshidi Abrahama ne muoyo. Mamanyisha aa adi mua kuikala ne mushinga munene kuudi ne kudi bena dîku diebe.