“Ndi mulame ditabuja”

MUYUKI MULONDA KUDI BALUNDA BA BRUNELLA INCONDITI

“DISAMBOMBO adi divua ne luendu lutekete bua kutua ku tshibungubungu ne divua dituku dikole. Mvua nkayanyi mu tshibambalu, tshiyi kuoku ne ditekemena nansha dikese. Tshibu tshivua tshingenza ku mesu, ndimona bu mvua ngenda mu kulware mualabale peshi tshiendedi tshia mu nzubu. Malu wonso avua apitakana bimpe too ne pakunzulula muntu kampanda tshiibi mu tshimpitshimpi ne bukole buonso bu wampanda mpala, ne ngakakeba mua kudiopoka, kadi tshiakapeta nansha disoso dimue.”

Kanyinganyinga kakole kavua kapungije mutshima wa Brunella Inconditi, nsongakaji wa bidimu 15. Wakapangila disanka divuaye ne bua kulabula mu dituku dia mushinga mukole dia muoyo wende. Ku ntuadijilu wa tshidimu atshi, bu muvua dinanga diende bua Yehowa ne bua Bible dienda dikola, wakalambula muoyo wende kudi Yehowa. Mu Kashipu 1990 uvua ne bua kutambuishibua mu mpuilu wa distrike wa Bantemu ba Yehowa “Muakulu mukezuke,” mulongolola ku Montreal, Canada. Kadi, ditabuja dia Brunella divua ne bua kubuejibua mu diteta divua ne bua kumutatshisha mu matuku wonso a muoyo avua mamushadile.

Matuku abidi kumpala kua yeye kuleja patoke dilambula dia bumuntu buende kudi Yehowa pa kuangata batismo mu mâyi, bakamanyisha Brunella muvuaye mukuatshike disama dia leucémie peshi kansere ka mu mashi. Mu tshibambalu tshia lupitadi tshia diondopa bana, ba-minganga bakajinga kutuadija kumuondopa pamue ne pamue, nunku Brunella wakashala mu lupitadi.

Miaku yende idi ikemesha ba-minganga

Brunella uvua mumanye se: mashi ntshintu tshia tshijila ku mesu kua Yehowa Nzambi. (Lewitiki 17:11) Baledi bende, tatuende Edmondo ne mamuende Nicoletta, bavua bamanyishe ne: mu kuondopibua kuende, muanabo wa bakaji kêna ne bua kuedibua mashi nansha kakese. “Brunella wakajinga bua ba-minganga bumvue ende mêyi, nansha muvuaye kayi muanji kukulumpa,” ke mudi tatuende uvuluka. “Ne dîyi diumisha wakabambila ne: kêna wanyisha ngondopilu wonso wa dishipa dîyi-dituma didi mu Bible dia ‘kuepuka mashi.’”​—Bienzedi 15:20, NW.

Mu dia 10 Kashipu 1990, ba-minganga basatu ne mukaji kampanda mupeshanganyi wa mibelu bakapetangana ne baledi ba Brunella ne ba-ministre babidi ba mu tshisumbu tshia Bantemu ba Yehowa. Mateta avua masokolole ne: Brunella uvua usama leucémie lymphoblastique peshi kansere kapite bubi kadi kashipa celile ya mashi. Ba-minganga bakumvuija mishindu ivuabo bakengela kutumika nayi bua kuluisha disama. Ne mbabi yonso bakajadika se: bivua bikole bua kutshimuna disama edi. Mukulu kampanda wa tshisumbu udi uvuluka ne: “Bienzedi bia Brunella ne dipangadika diende dia kutumikila Nzambi biakalenga mitshima ya ba-minganga ne mukaji mupeshanganyi wa mibelu. Bakakemeshibua bikole pa kumona dinanga dia baledi bende ne diambuluisha divua balunda bende ba mu tshisumbu bamutuadila. Bakanyisha kabidi ngumvuilu ne kanemu bituakabaleja bua mmuenenu wabu.

Ba-minganga bakapangadija bua kubenga kutumika ne mashi. Bavua ne bua kuondopa Brunella ne manga kampanda, avua ne bua kumukebela bisama bishadile. Ditumika ne manga menza mu biapu divua ne bua kukepesha dijiwula celile ya mashi ditu dienzeka pa tshibidilu ku ngondopilu eu. “Ba-minganga bakanemeka bionso bivua bitangila majinga a ku mubidi, a dinangibua ne a mu nyuma a Brunella,” ke mudi Nicoletta umvuija. “Patuakabalomba bua kuya kutangila munganga mupiluke mu diondopa dia kansere ka mu mashi kudi bana kabiyi kutumika ne mashi, bakitaba.” Malanda masheme a disuangana avua asuikakaja Brunella ne buondopi ba mu lupitadi.

Bipatshila bia mu nyuma

Nansha muvua diondopibua dia kumpala dipatule bimue bipeta bimpe, diteta dia Brunella ditshivu’anu ku ntuadijilu wadi. Mu Kasuabanga 1990 disama diende diakatuuya, nunku wakatambuishibua kakuyi njingakanyi. Mumane kuelangana meji pa bionso bivua bienzeke mu ngondo mikese ivua ifuma ku dipita, Brunella wakitaba ne: “Kabivua bipepele to. Bidi bikengela bukole bua bungi, ne kueleela meji pa bintu bidi bikankamija. . . . Ditabuja dianyi divua dibueja mu diteta, kadi ngakashala mukandamane, ne ndi’anu mpangadija bua kudifila kashidi mu mudimu wa bumpanda-njila [ministre wa ku dîba ne ku dîba].”

Ku ntuadijilu kua 1991, Brunella wakasama tshiakabidi disama dimue dimue adi. Wakamba kufua pavuabo bamuondopa ne manga, kadi wakumvua bimpe, e kukemeshabi bantu ne kubatuadilabi buonso disanka. Mu Tshimungu kumvuaye bimpe nanku nanku, ke kupitshisha ngondo mujima mu bumanyishi bua patoke bu mpanda-njila muambuluishi. Disama diende e kutuadija kabidi bikole, mu Kasuabanga 1991 bitupa bivule bia mubidi wende bivua bitekesha bikole kudi kansere. Mu lupitadi lukuabu, kasumbu kakuabu ka ba-minganga kakatuadija kumuondopa ne nkeke ya biamu bia mu nzubu wa mîdima.

Nansha mu nsombelu eyi mipite bukole, Brunella wakashala mukandamane ne kudifundila bipatshila bia mu nyuma. Pakamuyukidilabo pa disama diende, ba-minganga bakamuambila se: nkumushadile anu ngondo isambombo ya muoyo. Mpindieu kunyima kua tshidimu ne tshitupa, Brunella utshivua udifundila bipatshila bua matuku atshilualua. “Uvua udikolesha bua kukumbaja bipatshila biende kayi mua kujimija dîba,” ke muakajadika mukulu kampanda wa tshisumbu. “Ditabuja dia Brunella mu Mparadizu mulaya kudi Nzambi diakamukankamija mu tshikondo tshia diteta diende. Wakakola mu nyuma nansha mutshivuaye ne bidimu bikese. Bienzedi ne mmuenenu wende biakakolesha bena mu tshisumbu ku muoyo ne kukoka mitshima ya bavua bamumanye, pamue ne buondopianganyi ba mu lupitadi. Mamuende udi uvuluka ne: “Brunella kavua udiabakena nansha kakese. Pavuabo bamukonka muvuaye udiumvua, uvua wandamuna ne: ‘Bimpe,’ peshi ne: ‘Kakuena bubi nansha bumue, kadi wewe?’”

Nsombelu mulenga mu matuku atshilualua

Brunella uvua upangadija bua kubuela mu mpuilu wa distrike wa Bantemu ba Yehowa “Batuadi ba butoke” mu Kashipu 1992. Kadi, matuku makese kumpala kua mpuilu kutuadija, Brunella wakabuela mu lupitadi, ne muoyo wende wakatuadija kumunyema. Nansha nanku, wakabuela mu mpuilu, musombele mu nkuasa wa bibómbó, ne muangate dipangadika dikole dia kulonda drame wa Tuenzayi bidi biakane ku mesu kua Yehowa.

Wakalukila ku nzubu bua kushala ne bena dîku diende mu matuku makese a muoyo avua mamushadile. “Tòo ne ku ndekelu, uvua uditatshisha bikole bua bakuabu kupita buende yeye muine,” ke mudi Nicoletta wamba. “Uvua ubakankamija bua kulonga Bible, ubambila se: ‘Netuikale muaba umue mu Mparadizu.’”

Brunella wakafua mu dia 27 Kashipu 1992, mukuate bikole ditekemena diende dia dibiishibua bua kupingana ku muoyo mu Mparadizu pa buloba. Utshivua utuadijilaku bua kukumbaja bipatshila biende; kadi wakapangadija bua kutungunuka ne muoyo wende mulambula Yehowa pa kumusadila kunyima kua dibiishibua diende. Matuku makese patupu kumpala kua lufu luende, Brunella wakafunda mukanda udi ulonda eu, wakabadibua pavuabo benza muyuki wa dijiikibua diende.

“Balunda banyi basuibue:

“Tuasakidilayi bua kulua kuenu. Dikalaku dienu muaba eu didi diumvuija bivule bua dîku dianyi.

“Bua aba bavua pabuipi nanyi menemene​—tuvua bapetangane ne ntatu kabukabu. Bikondo bia lunsuya bivua bitufikile, kadi kuvua kabidi bikondo bia disanka. Bivua mvita mikole ne ya musangu mule, kadi tshiena ndiumvua bu ndi mupangile to. Anu mudi Mifundu yamba, ‘Ndi muluangane mvita milenga, ngajikiji luendu luanyi, ndi mulame dibatuja.’​—2 Timote 4:7; NW.

“Ndi kabidi mulonge bivule, ne ndi mukole bia bungi [mu nyuma], balunda banyi ne aba bavua bannyungulula bakadimuena kushintuluka kuanyi. Ndi musue kuela aba buonso bavua bantuadile diambuluisha tuasakidila.

“Nuenu badi ne ditabuja mu bulongolodi bupiabupia ne kudi Yehowa, nudi bamanye se: nekuikale dibiishibua, anu mudi Yone 5:28, 29 wamba. Nunku, shalayi bakuate bulelela bikole, netuikale mua kumonangana tshiakabidi.

“Ndi musue kuela aba badi bamanye ntatu yonso yimvua muakame tuasakidila. Yonso wa kunudi ndi mmuakidila bikole ne mmutua mishiku. Ndi mununange buonso buenu.”

Brunella kakashila bunsonga buende peshi disama diende muaba bua kupumbishadi diditshipa diende kudi Nzambi nansha. Tshilejilu tshiende tshia ditabuja ne muoyo wende mukole bidi bikankamija bansonga ne bantu bakole bua kuimansha tshintu kayi tshionso tshidi mua kubapumbisha bua kunyema lubilu bua muoyo.​—Ebelu 12:1.