Bamanyishi ba Bukalenge badi balonda
“Nzubu wa tshivulukilu tshia mmuenenu wa dieleshangana diboko”
PABUIPI ne mukalu wa Espagne ku sud menemene, kudi dibue ditumbuke dinenanenayi dia tshivulukilu didi dimanyike bu Dibue dia Gibraltar. Mu kupita kua bidimu nkama ne nkama, dibue edi nntemu ukena wakula wa milandu pa malu a tshididi ne matandu pankatshi pa matunga. Bishilangane, Dibue dia Gibraltar ndiambuluishe matuku adi panshi aa bu muaba wa dieleshangana diboko ne dileja buobumue bidi ku mpukapuka bimueneka lelu’eu mu bulongolodi ebu.
Ku mutantshi wa kilometre isatu bulubulu kumbukila ku Dibue dia Gibraltar, kudi tshimenga tshia La Línea, ku Espagne. Kuinaku diibaka Nzubu wa Bukalenge wa Bantemu ba Yehowa diakasangisha nkama ne nkama ya bena mudimu badisuile bavua bajinga ne mitalu yonso kufila dîba ne makanda biabo. Bu muvuabo benza mudimu wa diibaka nzubu muimpe bua ntendelelu wa Mutufuki, Yehowa Nzambi, nansha muaba muenda lumu eu wa Dibue dia Gibraltar wakavua muaba wa tshianana pa kuufuanyikija ne mudimu wa diibaka uvua wenda ulubuluka.
Bamanyishi ba Bukalenge ba mu tshitupa atshi tshia buloba mbatume luapolo ludi lulonda elu:
“Bena mudimu badisuile nkama tshitema ne musangelu wonso bakakuata mudimu butuku ne munya, bituadije ku iba mulolo wa Ditanu, mu dia 24 Kabitende 1993. Pa dîba muanda-mutekete wa dilolo mu dia lumingu, tshimanyinu tshipiatshipia tshiakashimikibua bua kufunkuna nzubu eu bu Nzubu wa Bukalenge wa Bantemu ba Yehowa. Pashishe, nzubu muimpe eu bakakuata nende mudimu bua muyuki wende wa patoke wa diambedi.
“Bantemu bavule bavua bafumina ku mutumba kua Gibraltar bakasambuka mukalu bua kuambuluisha bana babo ba ku Espagne. ‘Matapulukangana a malu a tshididi kaena apumbisha bu-wetu buetu pa buloba bujima nansha,’ ke muakumvuija umue wa ku bena mudimu badisuile, mmuena-muabo wa ku Gibraltar. Wakasakidila ne: ‘Kukadi kupite bidimu bivule, katshia Bantemu ba ku La Línea bavua kutukuatshisha bua kuibaka Nzubu wa Bukalenge wetu ku Gibraltar, nunku mpindieu tudi ne disanka dia kubaleja petu kalolo.’
“Bua kusakidila ku madikolela a bisumbu bibidi bia Bantemu ba Yehowa ne a bambuluishi nkama ne nkama bapiluke bavua bafumina ku rejon wa Andalousie, tshimenga tshia La Línea tshiakapangadija bua kufila tshitupa tshia buloba tshivua tshikengedibua. ‘Katshia ku kale, bamfumu ba bimenga bia Espagne batu pa tshibidilu bafila bitupa bia buloba bua diibaka dia nzubu ya ekleziya Katolike,’ ke muakumvuija mulombodi wa tshimenga tshia La Línea pavuaye ukumbula muaba wa luibaku. ‘Bua tshinyi kubenga kuenza bia muomumue bua ekleziya mikuabo? Ndi mutuibue bikole ku muoyo kudi didipua muoyo dia badisuile, ne ndi mmona ne: mbakanyine dikuatshisha dietu. Tudi tujinga bantu bavule badi ne mmuenenu wa mushindu’eu mu bulongolodi ebu bua lelu’eu budi bupanduluke.’
“Wakabikila Nzubu wa Bukalenge bu ‘nzubu wa tshivulukilu tshia mmuenenu wa dieleshangana diboko.’ Eyowa, bualu buvua butamba kukemesha ki mmushindu uvua nzubu muibakibue anyi bunene buende to. Apo, tshivua tshikemesha bantu bavule ba mu tshimenga mbualu bua se: wakibakiibua kudi badisuile munkatshi mua mêba 48 patupu!”
Bushuwa, Bantemu ba Yehowa ba ku La Línea ne ba ku miaba idi pabuipi mbaleje lulamatu ku miaku idi mu Galatia 6:10 (NW). Muinamu mupostolo Paulo wakabela bena ditabuja nende ne: “Bushuwa, patutshidi ne tshikondo tshikumbanyine muanda eu, tuenzele bantu buonso bimpe, kadi nangananga aba badi balela betu mu ditabuja.”