Mikandu itu ikutekesha mu mikolo anyi?

MIKANDU! Bushuwa, muntu nansha umue katu muyisue nansha; kadi, buonso buetu tudi ne bua kuyitaba mu tshitupa kampanda. Kadi, utu minga misangu uteketa mu mikolo bualu nsombelu webe udi umueneka mubumbakaja menemene anyi? Pamu’apa uvua mua kumvua bimpe bu wewe mushintulule mmuenenu webe. Pamutu pa kuditatshisha pa tshiudi kuyi mua kuenza, bua tshinyi kubenga kutshionkomoka ne budikadidi buonso buudi nabu?

Tshilejilu, ba bungi badi bapele ba biuma badi bajinga kuikala babanji. Kadi nansha mudi bupele butupangisha mua kuenza bintu bitudi mua kuenza, bintu bia mushinga mu nsombelu bidi kudi bantu buonso. Bapele ne bena biuma badi babuela mu dinanga, baselangana, bakolesha bana, badi ne bulunda bushemakane, ne bikuabo. Bipite mushinga, bapele ne bena biuma mbamanye Yehowa ne mbindile ne disanka dionso bulongolodi bupiabupia bulaya. Bapele ne bena biuma badi badiunda mu meji a bena nkristo ne dimanya, bidi bilenga kupita buima. (Nsumuinu 2:1-9; Muambi 7:12) Buonso​—bapele ne bena biuma—​badi mua kudienzela dîna dilenga kudi Yehowa. (Muambi 7:1) Mu matuku a Paulo, tshisumbu tshia bena nkristo tshivua tshienza mu tshibungi ne bantu ba mulongo mupuekele​—bamue ba ku buobo bavua bapika—​bavua bakuata mudimu bimpe ne budikadidi kayi buonso buvuabo bapeta bilondeshile bivua nsombelu ibapetesha.​—1 Kolinto 1:26-29.

Bumfumu buleja mu mifundu

Mu dibaka dia bena nkristo, mukaji udi ukokela bayende​—dilongolola edi ndienza bua dibenesha dia dîku dijima. (Efeso 5:22-24) Nunku mukaji adiumvue bu mupuekeshibue milongo anyi? Nansha kakese. Mulume ne mukaji nkasumbu. Bumfumu bua mulume, bukuate nabo mudimu mu mushindu wa buena wa Kristo, budi butekela mukaji mikandu mikese ne bumushila mpunga mivule bua akuate mudimu ne makole ne bipedi biende. (Efeso 5:25, 31) “Mukaji muakanyine” wa mu Nsumuinu nshapita wa 31 uvua muditua mu midimu ya bungi mimpe ne ivua ilomba lungenyi ne dipangadika dikole. Mbimueneke patoke ne: buende yeye, dikokela bayende kadivua dimutatshisha nansha.​—Nsumuinu 31:10-29, NW.

Bia muomumue, kakuena muaba nansha umue bua mukaji kupita kumutu kua balume badi bakumbaje malu malomba mu tshisumbu tshia bena nkristo to. (1 Kolinto 14:34; 1 Timote 2:11, 12) Bakaji bena nkristo badi ne bua kudiumvua bibi muinshi mua mikandu anyi? Tòò. Ba bungi badi ne dianyisha bua kumona luseke alu lua mudimu wa bena nkristo luenzeka mu njila wa teokrasi. Badi ne disanka bua kubabidila ku butangidi ne bulongeshi bua bakulu basungula ne badi baditua mu mudimu wa muoyo wa buambi ne wa kuenza balongi. (Matayi 24:14 ; 28:19, 20) Mu budimi ebu, bakaji bena nkristo badi batamba kuenza bia bungi; ne bidi bibapetesha butumbi ku mêsu kua Yehowa Nzambi.​—Musambu wa 68:11; Nsumuinu 3:35.

Mikandu kudi bansonga

Bansonga batu pabo badilakana ne: nsombelu wabo mmubumbakaja bikole, bualu pa tshibidilu badi ku bukokeshi bua baledi babo. Kadi bukenji ebu mbufumine pabo mu Mifundu. (Efeso 6:1) Pamutu pa kufiika munda bua mikandu mibelela kudi baledi babo, bansonga bena nkristo ba meji badi baditonta pa budikadidi budibu nabu​—pa tshibidilu bu mudi budikadidi ku majitu makole. Nunku badi mua kubabidila makanda abo a bunsonga ne nsombelu kabukabu bua kudiakaja ku ya bukulumpe.

Mutangidi kampanda wa tshijengu wa kale ku Brésil udi uvuluka bimpe muana wa balume kansanga wa mvula 12 mu kasumbu kavua pa nkaya uvuabo belele mikalu mu bivuaye mua kuenza. Eu uvua muomekela bujitu bua kukontolola formilere uvua muditue mu mudimu wende wa bianza ne kavua utamba kutabalela kasumbu aku to, kadi wakapangadija bua nsongalume eu kumuambuluishaye. Uvua mumanye muaba uvua formilere yonso ne uvua mudiakaje bua kueleshangana nende diboko. Dijinga diende divua dikankamija, ne uvua muenzejanganyi wa mudimu wa lulamatu mu budimi. Nsongalume au udi mpindieu mukulu muteka pa mudimu.

Kudi nsombelu ya bungi idi mua kuela mikalu ku budikadidi bua muntu. Bamue mbakande kudi bubedi. Bakuabo badi mu mêku matapuluke ne budikadidi buabo mbukalamija kudi malomba a muena dibaka udi kayi muena kuitabuja. Nansha mudi aba badi ne mikandu mua kujinga dishintuluka, badi anu mua kusankishibua bua nsombelu yabo. Tshibejibeji etshi tshikadi tshilonda miyuki mivule ya bantu ba mushindu’eu bavua dikankamija kudi bakuabo bualu bakeyemena Yehowa ne bakababidila bimpe bitambe nsombelu yabo.

Wakula bua nsombelu wa mushindu umue mu matuku ende, mupostolo Paulo wakamba ne: “Wewe wakadi muhika hawakabikidibua, anyi? Bualu ebu kabukutatshishi. Kadi biwamanya mua kupeta budishikaminyi, wenza nunku.” (1 Kolinto 7:21) Mmuenenu kayipu wa pankatshikatshi! Imue nsombelu itu ishintuluka. Bansonga batu bakola. Bena dibaka batu bakandamena, imue misangu batu bafika ku diitaba bulelela. Tutu bamanye bimpe ne: nsombelu ya mfranga itu ishintuluka. Babedi badi mua kusangala. Mu mikuabo nsombelu, malu kaena mua kushintuluka too ne pafika bulongolodi bupiabupia bua Yehowa. Nansha nanku, tshituapeta ntshinyi mu kusuyakana bualu katuena mua kuenza bidi bakuabo mua kuenza?

Ukadiku mubandile dibuuka dia nyunyu muulu ne mukatshile bulenga ne budikadidi bua dibuuka diayi anyi? Pamu’apa uvua ujinga ne: uvua mua kuikala ubuuka mushindu awu. Eyo, kuena mua, ne kuakukumbana nansha kakese bua kubuuka anu bu mutu nyunyu wenza! Kadi mbimueneke ne: kutu udiabakena to. Kupita apu, udi usanka mu makokeshi ebe adi Nzambi mukupeshe. Udi ulubuluka nansha muudi unyunguluka pa tshipapu tshia buloba. Bia muomumue, nansha tuetu bikale mu nsombelu kayi, tuetu baditonte pa bitudi mua kuenza pamutu pa kudisuya pa bitudi katuyi mua kuenza, nsombelu neikale wa disankishibua, ne netupete disanka mu mudimu wa Yehowa.​—Musambu wa 126:5, 6.

[Tshimfuanyi mu dibeji 28]

Utuku umvua ne: baledi bebe mbakuele mu lupangu anyi?