“Miji idi kayiyi mua kutudibua”
MUNKATSHI mua bintu bidi ne muoyo bidi bitambe bualabale ne bia kale mudi mitshi ya sekoya ya ku Californie. Bikemeshanganyi bilebile ebi bidi ne bule bua metre bu 90 ku bukulumpe buabi ne bidi mua kunenga bidimu bipite pa 3 000.
Nansha mudi dimona sekoya dikale dikuatshisha buôwa, ndongoluelu wende wa miji ukena umueneka udi bia muomumue ukemesha. Sekoya udi ne miji mipindakajangane idi mua kulambakana mu tshipapu tshia bualabale bua ektare 1,2 anyi 1,6. Ndongoluelu munenanenayi eu wa miji udi upetesha nshindamenu muondoke nansha padiku mvula wa nkoka anyi mpepele mikole. Kudiku nansha mushindu wa sekoya kukananenaye tshikumina tshikole!
Mukalenge Solomo wakasungula ndongoluelu mukole wa miji ya mutshi mu ngakuilu [wende] wa mu tshimfuanyi mu lumue lua ku nsumuinu yende. “Muntu nansha umue kêna mua kudijadika ku butuangaji bua malu mabi,” ke muakambaye, “kadi bantu bimpe badi ne miji idi kayiyi mua kutudibua,” (Nsumuinu 12:3, Nkudimuinu wa The New English Bible) Eyowa, bantu babi mbimane pa muaba wa busenu. Dilubuluka kayi dionso didibu mua kuenza didi anu dia musangu muîpi, bualu Yehowa wakalaya ne: “ditekemena dia bantu babi nedijimine.”—Nsumuinu 10:28.
Edi ndidimuija bua aba badi badiamba mudibu bena nkristo, bualu Yezu wakamba ne: bamue nebikale babule “miji” munda muabo ne nebikale ne bua kulenduka. (Matayo 13:21) Kupita apu, mupostolo Paulo wakafunda pa bidi bitangila bantu bikala “batenkakajibua eku ne kuaka kudi lupepele lua dilongesha [dia dishima] kayi dionso.” (Efeso 4:14, NW) Mmunyi mudi bualu ebu mua kuepukibua?
Amu bu mudi miji ya sekoya itantamana mu bualabale buonso mu buloba budishi budi muinshi, bia muomumue mitshima ne bieledi bia lungenyi bietu bidi bikengela kukebakeba mu bualabale buonso mu Dîyi dia Nzambi ne bikoke mâyi mafidi a muoyo. Ebi nebituambuluishe bua kudiundisha ditabuja dishindame diela miji. Bushuwa, netumvue buenzeji bua mateta mafuanangane ne mvula wa nkoka. Tudi pamu’apa mua kuzakala, bu mutshi, kumpala kua bipumbishi. Kadi bikala ditabuja dietu dishindame bimpe netufile tshijadiki tshia se: tudi ne “miji idi kayiyi mua kutudibua.”—Fuanyikija ne Ebelu 6:19.