Bible: Ntshinyi tshidi mushinga wende menemene?

BIBLE mbualu busokoka, mmukanda mufunda bua kubenga kuujingulula,” ke mudi muena nzubu kampanda wamba. Mukuabo pende udi uleja ne: “Ndi mumanye ne: Bible mmukanda wa mushinga, kadi tshiena mumanye bivule pa bidi biwutangila to. Mbikole bua kuujingulula.”

“Bena nkristo bavule mbamanye . . . bikese pa Bible,” ke muvua tshikandakanda tshia The Toronto Star tshiambe. Inabanza kampanda muena Katolike wakumvuija ne: “Ndi ngumvua bimpe pandi ne Bible. Kuikala nende kudi kumpa ditalala munda.” “Bible udi bu kaleji-nord kadi kalombola muntu udi mu mbuu musapalala ne mutomboka ku muaba wa dikubibua,” ke mudi mulobi kampanda wamba. Mu miaku ya kampanda uvua kale muena Hindu, “Bible nDîyi dia Nzambi ne ndipa kudi bukua-bantu ne mbuanga bua makadi a mu nyuma.”

Mmuenenu pa mushinga mulelela wa Bible mmivule ne mmishilangane. Nunku, kadi, ntshinyi tshidi mushinga wende menemene?

Bible ke mukanda udi ne mushinga mupite bungi ne udi mutangalake miaba yonso bua katshia ne katshia. Mu mabeji ende mudi mandamuna ku ntatu ya bungi mijingakane idi muntu mumane kututakena nayi anyi yatutakenayi anu nayi. Diakanangana ne nsombelu dia mibelu yende kadiena kufuanyikija. Mêyi-maludiki pa bikadilu bilenga adiye nawu mmatambe buimpe. Mukenji wende udi ne buenzeji ne udi ukuatshisha. Mukanda eu wa mushinga kawuyi kufuanyikija udi ukumbanyina kupeta muaba muimpe mu tshitekelu tshietu tshia mikanda ne kuutekela ntema mikole ne difukuna.

Tudi mua kubulula Bible ne dishindika dionso ne: udi menemene mukanda mujalame, wa kueyemenyibua, ne mulelela. Malu akenzeka adi mafundamu mmajadikibue mu malu a kale a bantu. Misangu mivule, bintu bipeta muinshi mua buloba bidi bituisha ne: Bible mmujadikibue ne mmulelela. Bujalame bua muoyo wa bafundi 40 ba Bible anyi batue ku 40 budi bubasunguluja bu bantu bena bululame ne bena muoyo mutoke. Diumvuangana dia malu adi mu Bible didi dileja se: mfuki wende ki mbantu nansha. Mianda milondamu mmilelela. Bantu badiye utêla mbalelela. Dileja miaba ne miaba mine ivua malu menzekele bidi bitelamu mbilelela. Kuambikila apu, Bible udi ne milayi ya pa buayi idi kabiyi divila ileja Yehowa Nzambi bu Muenji wa Bible.​—2 Petelo 1:21.

Mushidimunyi wetu Munene uvua muenze ne: dimanya disua ne malongolola biende bimanyike kudi aba badi basua kubimanya. Bushuwa, mu miaku mitanduke, Yehowa udi utuambila ne: disua diende ndia se: bantu ba mishindu yonso balonge Dîyi diende ne “bafike ku dimanya dijalame dia bulelela.” (1 Timote 2:3, 4, NW; Nsumuinu 1:5, 20-33) Ke tshimue tshia ku bintu bia mushinga mukole mutambe bitudi mua kuenza mu matuku a muoyo wetu. Kupeta dimanya dijalame mmufunu utudi ne bua kututakena nawu. Ke muvua bena nkristo ba kumpala bajingulule. Umue wa kudibo wakasakibua bua kuamba ne: “Disambila dianyi didi nunku: mbua dinanga dienu divule amu kuvula, dienze dimanya dilelela ne diumvua dionso, bua numone mua kusunguluja tshidi tshipite bulenga.”​—Filipe 1:9, 10, Mukenji Mulenga; Kolosai 1:9, 10.

Bible ntshiamu tshinene tshia Mufuki tshia kumanyisha natshi disua ne dilongolola diende kudi dîku dia bantu, ne udi umvuija mushindu udi muntu pa nkayende mua kupeta muaba mu dilongolola adi. Udi ulonda mianda ya kale, ne udi utupesha mundidimbi mutanduke wa matuku adi kumpala. Bible udi ne dilongesha diakane ne udi utuludika ku tshitudi anyi ku tshitudi katuyi ne bua kuitabuja. (Bienzedi 17:11; 2 Timote 3:16, 17) Udi ufila mêyi ne mikandu pa nsombelu udi muntu ne bua kuikala nende, ne udi uludika bantu mu njila wa dilubuluka ne wa disanka. (Matayo, nshapita 5-7) Udi uzangika Bukalenga bua Nzambi bu ditekemena dimuepele bua bukua-bantu buonso ne udi uleja mushindu udi mbulamatadi wa Nzambi muikale tshiamu tshia kusantuisha natshi dîna diende ne kubingisha dikala diende ku mutu kua bionso. Bible udi umvuija njila utudi tukengela bua kuipatshila malanda mashemakane ne a dinanga ne Mufidi wetu wa muoyo, Yehowa.

Kuambikila apu, Bible mmukanda umuepele wakufikisha ku difutu ditambe bunene diapeta bua kashidi bukua-bantu​—muoyo wa kashidi mu mparadizu pa buloba bu bantu bapuangane. (Lomo 6:23) Muana umuepele wa Yehowa udi utuambila ne: “Etshi tshidi tshiumvuija muoyo wa kashidi, balonge mua kukumanya wewe Nzambi umuepele mulelela ne eu uudi mutuma, Yezu Kristo.” (Yone 17:3, NW) Bushuwa, mukanda wa mushinga bungi nunku udi ne bua kutusaka ku dilonga tshitudi ne bua kuenza bua kupeta difutu dia muoyo wa kashidi. Bible mmukanda mufunda bua kujinguludibua, anu bu mualeja tshiena-bualu tshidi tshilonda.