‘Kanunyingaladi bu bakuabo to’

UKADIKU mumane kumona mushindu utu tshilongo tshinyika mutu watshi panshi anu bu tshitekesha mu mikolo kunyima kua dipanduka ku tshipepele tshikole anyi? Mu mushindu kampanda ndimona didi ditua ku muoyo. Bualu bua dikema, mvula mukole udi pamu’apa mua kusaka nyama ne bantu bungi kabuyi kubadika​—bifukibua bikole kupita ne kule tshilongo kayi tshionso—​ku diasa lubilu mu dikeba tshisokomenu. Kadi, tshilongo ntshimane anu muaba awu, ntshiela miji, tshiakama tshipepele tshikole tshitambe. Mpindieu, ntshiotshi etshi katshiyi tshinyanguke, tshiname kadi katshiyi tshitshibuke, tshikale tshileja bukole budi kabuyi bukumbanangane ne muenekelu watshi mutekete. Udi mua kukatshila, paudi utshibandila, bu tshiotshi mua kupetulula dikanda diatshi ne kujululula muulu, mutu watshi mulengele wa kunanga.

Mu nsombelu mivule ke mudibi bua bantu. Mu bikondo ebi bisaluke, tudi tuakamangana buonso ne mpepele mikole ya mishindu kayi yonso. Ntatu ya mfranga, tunyinganyinga, dinyanguka dia makanda a mubidi, dijimija dia munangibue kampanda mu lufu​—mvunde ya mushindu’eu itu ikuata yonso wa kutudi tshikondo kampanda anyi kansanga, ne imue misangu katuena nansha ne mushindu wa kuyepuka anu bu mudi tshilongo katshiyi mua kuditula nkayatshi ne kunyema bua kukeba tshisokomenu. Bidi bitua ku muoyo pa kumona bantu badi mua kumueneka bu batekete baleja bukole bua kalanda musenga ne bananukila mateta makole a mushindu’eu. Mmunyi mutubo bafika ku dienza nunku? Misangu ya bungi nsapi udi ditabuja. Yakobo muanabo ne Yezu Kristo wakafunda ne: “Udi mumanye bimpe ne: padi ditabuja diebe ditshimuna mu diakamangana ne mateta a mushindu’eu, tshipeta tshidi nzanzu bua kunanukila.”​—Yakobo 1:3, nkudimuinu wa Today’s English Version.

Nsapi mukuabo udi ditekemena. Tshilejilu, padi lufu lukuata munangibue kampanda, ditekemena didi mua kuenza dishilangana dinenanenayi kudi badi ne muoyo. Mupostolo Paulo wakafundila bena nkristo ku Tesalonika ne: “Katuena basue nuikale mu dipanga pa bidi bitangila aba badi balale mu lufu; bua kanunyingaladi bu bakuabo badi kabayi ne ditekemena.” (1 Tesalonika 4:13, NW) Nansha mutu bena nkristo banyongopala bua lufu, kudi dishilangana. Badi ne dimanya dijalame pa bidi bitangila ngikadilu wa bafue ne pa bidi bitangila ditekemena dia dibiishibua ku lufu.​—Yone 5:28, 29; Bienzedi 24:15.

Dimanya edi didi dibapetesha ditekemena. Ne ditekemena adi, ku luadi luseke, ku kakese ku kakese didi dituyisha tshinyongopelu tshiabo. Didi dibambuluisha bua kunanukila, ne bua kutamba kunanukila. Kunyima, anu bu tshilongo kunyima kua tshipepele tshikole, badi mua kujululula mitu yabo muulu kumbukila ku tshinyongopelu ne kupetululula disanka ne disulakana mu nsombelu.