Nkonko ya babadi

Pakadia Eva, ne pashishe Adama, tshimuma tshia mutshi wa kujingulula malu mimpe ne malu mabi, tshivua tshimuma tshia “pomme” tshiakadiabu anyi?

Katuena bamanye to. Bantu bavule batu bela meji ne: ‘tshimuma tshikandika’ tshivua tshimuma tshia pomme, ne mu kupita kua siekele mivule bazodi mbatshizole misangu ya bungi anu mushindu’eu. Kadi Bible kêna utêla dîna dia mutshi anyi tshimuma tshiawu to. Eva wakatshibikila anu bu ‘tshimuma tshia mutshi udi munkatshi mua budimi.’​—Genese 3:3.

Tshidi tshitamba kukoka ntema ntshiena-bualu “Pomme” tshidi tshisanganyibua mu mukanda wa Auxiliaire pour une meilleure intelligence de la Bible:

“Kudi difuikakaja divule dia meji pa bidi bitangila disunguluja dia mutshi ne tshimuma biumvuija kudi muaku wa mu tshiena-Ebelu tap·puʹach. Muaku eu pa nkayawu udi ufunkuna [mutshi] udi usungulujibua ku dipembu, anyi muenyi wawu. Udi ufumina ku muaku na·phachʹ, udi umvuija ‘kupupa; kupuyakana; kuluangana bua kueyela.’ (Gen. 2:7; Yobo 31:39; Yel. 15:9) Pa bidi bitangila bualu ebu, M. C. Fisher wakafunda ne: ‘Diwusuikakaja [ku muaku na·phachʹ] didi dimueneka diambedi mu ngumvuilu wa muaku bu disambuka mikalu, kadi ngenyi ya “kueyela” ne “kununka mupuya” idi yumvuangana. Muaku mukuabo mufuanangane nawu udi ne diumvuija dia muomumue udi puah udi umvuija miaku yonso ibidi “kupupa” (kua lupepele) ne “kununka mupuya muimpe, kuikala ne dipembu.”’​—Mukanda wa Theological Wordbook of the Old Testament, mufunda kudi R. L. Harris, 1980, Vol. 2, dib. dia 586.

“Mbamana kutêla bimuma bia bungi pamutu pa pomme, tshilejilu bimuma bia oranje, sitron, koing ne abriko. . . . Kadi, muaku tuffah mufuanangane nawu wa mu tshiena-Arabe udi bangabanga umvuija ‘pomme,’ ne bidi bimueneka ne: mêna Tappuah ne Beth-tappuah a miaba mu tshiena-Ebelu (adi pamu’apa abikidibua nunku bua disanganyibua dia tshimuma etshi pabuipi nayi) akalamibua mu tshiena-Arabe mu ditumika ne muaku eu [tuffah]. (Yosh. 12:17; 15:34, 53; 16:8; 17:8) Miaba eyi kayivua mu bibandabanda to kadi ivua mu ditunga dia mukunakuna, muvua muvu mu kabujima wa nkatshinkatshi. Kupita apu, lungenyi lua se: kuakenzeka mashintuluka a muvu ki nduakulekela luonso to. Mitshi ya pomme idi idiunda mu Izalele lelu’eu ne nunku idi imueneka mikale mu diumvuangana menemene ne dilonda dia Bible. Nansha William Thomson, wakapitshisha bidimu bivule mu Syrie ne mu Palestine mu siekele mupite, wakamanyisha ne: wakasangana tshidiminu tshia mitshi ya pomme mu rejon ya Ashkelon mu Mpata ya Philistie.​—Mukanda wa The Land and the Book, mufundulula kudi J. Grande, mu 1910, mabeji a 545, 546.

“Mutshi wa pomme (Pyrus malus) udi nangananga mutêla mu Musambu wa Solomo, mudi biambilu bia dinanga bia mulami nyanende wa Silamite bifuanyikija ne dileji dilengele dia mutshi wa pomme ne busheme bua tshimuma tshiawu. (Mus. wa Sol. 2:3, 5) Ku luende luseke, udi ufuanyikija mueyelu wende ne dipembu dia pomme. (Mus. wa Sol. 7:8; tangila kabidi 8:5.) Mu Nsumuinu (25:11) mêyi makanyine, makula dîba dikumbanyine mmafuanyikija ne ‘bimuma bia pomme bia or mu bitekelu bia argent.’ Ditedibua dikuabo dimuepele dia tshimuma tshia pomme didi mu Yoele 1:12. Tshilele tshimuangalaka tshia se: tshimuma tshikandika mu Edene tshivua pomme katshiena ne nshindamenu muaba nansha umue mu Mifundu to. Bia muomumue, tshiambilu ‘pomme wa dîsu’ tshidi tshisanganyibua mu nkudimuinu wa King James Version (Mis. 17:8; Nsu. 7:2; ne mu mvese mikuabo) kadi ki ntshiambilu tshia mu tshiena-Ebelu nansha, nkudimuinu watshi wa ku muaku ku muaku udi ‘kamonyi ka dibulunge dia dîsu [dia muntu kampanda].’”​—Mukanda wa Étude perspicace des Écritures, Volime 2, mabeji 607, mupatula mu 1988 kudi Watchtower Bible and Tract Society of New York, Inc.