Buebe wewe, muoyo udi ne mushinga kayi?

MUPIANKUNDE mulume kampanda wakatupika bua kudishipa kumbukila ku tshisasa tshia muanda-mukulu tshia nzubu wa kuulu wa bibambalu bivule. Uvua mubale mukanda kampanda uvua umvuija ditupika bua kudishipa ne: “kaditu dikengesha anyi dinyingalaja peshi dikuatshisha buôwa to; bishilangane, didi diumvuika dimpe.” Mufundi wa mukanda eu, mupatula mu Japon, uvua wamba ne: uvua anu ufila “didishipa bu dimue dia ku masungula a mu nsombelu.”

Ki ng’anu bantu badi badishipa badi kabayi baleja kanemu bua muoyo lelu’eu to. Bendeshi ba mashinyi pabo badi baleja kanemu kakese bua muoyo. Bakuabu batu bendesha nansha buobo bakòle maluvu, bavule bavudija mpukapuka ya dienzeka dia njiwu mibutudi.

Bakuabu badi baleja mushindu udibu ne kanemu kakese bua muoyo wabu pa kuzangika didisankisha. Banu ba makanya ki mbasue bua kulekela makanya, nansha mudi dinua mua kukebesha lufu ne dikale dibikidibua bu didishipa dia ku kakese ku kakese. Pamutu pa kulama bunonoke mu bulongolodi ebu budiine ne kasuki mu malu a bitupa bia lulelu, bavule badi bipatshila njila mukondakane utu misangu ya bungi ufikisha ku lufu.

Kabayi nansha babimanye, bakuabu badi bajimija bimue bidimu ku budiavi, bunuavi, didibidija mubidi dikese, ne dikeba dia masanka. Mufundi muena Japon Shinya Nishimaru wakadimuija ne: “Ndilu kayi mukontolola utu unyanga ntumikilu wa mubidi, ne dipatshila dia biuma ne masanka didi dikepesha bule bua muoyo wa bantu.” Bamue batu batua ku tshia bantu ba kale bavua bamba ne: “Tudie bietu, tunue bietu, bua makelela tufuafua.”​—Yeshaya 22:13; 1 Kolinto 15:32.

Eyowa, dipangika dia kanemu bua muoyo nditangalake lelu’eu. Nunku, mbikumbanyine kuebeja ne: Buebe wewe muoyo udi ne mushinga kayi? Muoyo udi ne bua kukubibua nansha bia munyi anyi? Ne kudiku tshintu kampanda tshidi ne mushinga kupita muoyo wetu wa mpindieu anyi?