Mbabi: Dipa dia kalolo dia kudi Nzambi

YEHOWA udi usankila mu midimu yende ya bufuki. (Musambu wa 104:31) Milowo idi difuka dimukuatshisha mmiumvuija mu Genese 1:31: “Nzambi wakamona bintu bionso biakenzeye ne biakadi bimpe be!”

Yehowa kakalama disanka edi anu buende nkayende to. Wakapesha Yezu disanka dia mudimu dia kuikala muena mudimu munene, anyi tshiamu tshia mudimu, tshiakambuluisha bua kufuka bintu bikuabu. (Yone 1:3; Kolosai 1:16, 17) Bu “muena mudimu munene,” Yezu uvua pende “dîba dionso ne disanka kumpala kua [Yehowa].”​—Nsumuinu 8:30, 31, NW.

Kadi mbabi ya dienza bintu kayena anu mu diulu to. “Mmibaka mu bukua-bantu,” ke mudi Eugene Raudsepp mufunde mu mukanda wende wa How Creative Are You? Ki ntshintu tshia ku mpukapuka to, bualu muntu uvua mufukibue ku tshimfuanyi tshia Nzambi. (Genese 1:26) Nunku Yehowa uvua mupe bukua-bantu mbabi mivule ya dienza bintu.​—Yakobo 1:17.

Nunku, kabiena bikemesha to bu mudi Bible wakula biakane bua kuimba, kuja, kuluka bilamba, kulamba, mudimu wa bianza, ne madikolela makuabu a dienza bintu. (Ekesode 35:25, 26; 1 Samuele 8:13; 18:6, 7; 2 Kulondolola 2:13, 14) Bezalele, muenji wa mudimu wa bianza, wakatumika ne nzanzu yende bua “kuenza biamu” bua kuambuluisha mu dibaka dia tabernakle. (Ekesode 31:3, 4, NW) Mulami Jabale udi pamu’apa muenji wa ntenta wa kumpala, ndongoluelu wa mbabi bua nsombelu wa bendakanyi. (Genese 4:20) Davidi kavua anu muimbi ne muenji wa misambu to, kadi uvua kabidi mulubuluji wa biombelu bipiabipia bia mijiki. (2 Kulondolola 7:6; Musambu wa 7:17; Amosa 6:5) Miriame uvua pamu’apa mufuikakaje maja a difesto divua divuluka dipikudibua dia mu tshishima ku Mbuu Mukunze.​—Ekesode 15:20.

Misangu ya bungi mbabi ntshiuma mu dilubuluja ntendelelu mulelela. Ne mbabi yonso Yezu wakatumika ne bifuanyikijilu ne malongesha menza ne bintu bua kumanyisha mukenji wende. Balondi bende badi bia muomumue babalomba bua benze “mudimu bikole bua kuamba ne kulongesha dîyi.” (1 Timote 5:17, NW) Eyowa, mudimu wabu wa buambi ki ntshibidilu patupu to. Mmudimu wa mpatshi udi ulomba ndongeshilu ya mbabi. (Kolosai 4:6) Ebi bidi nangananga ne mushinga padi muntu ulongesha bana bende.​—Dutelonome 6:6, 7; Efeso 6:4.

Nunku, Yehowa udi wabanyangana ne bakuabu disanka didi mbabi imupetesha. Ndipa kayipu dia kalolo!