“Bu matuku a mutshi”

KUKADI bidimu bipite pa binunu bisatu, Mozese wakafunda ne: “Bungi bua bidimu bietu mbua makumi muanda mutekete, nansha makumi muanda mukulu, pawikala ne bukole. Kadi bungi buabio budi amu makenga ne ntatu.”​—Musambu 90:10, (89 Mukenji Mulenga).

Nansha mudiku malubuluka mu malu a luondapu, bule bua muoyo wa muntu budi’anu muvuabu mu matuku a Mozese. Nansha nanku, bantu kabakushal’anu ne muoyo wa lupitapita wa mushindu’eu to. Mu mukanda wa Bible wa Yeshaya, Nzambi wakamba ne: “Bualu bua bu mudi matuku a muoyo wa mutshi mbu mudi matuku a bantu banyi, ne bantu banakusungula nebasanke musangu mule mu mudimu wa bianza biabo.”​—Yeshaya 65:22.

Umue wa ku mitshi idi ishala ne muoyo mutantshi mule mu miaba ivuabo bafundile Bible ng’wa olive. Mutshi mukuata foto apa ng’umue wa ku mitshi ya olive mivule itshidi isasa mu Ngalileya ikâdi ne binunu bivule bia bidimu. Ntshikondo kayi tshialua bantu kuikala ne muoyo mule nunku? Mulayi umue umu’eu udi usapula ne: netshikale tshikondo tshidi Nzambi ufuka “muulu mapiamapia ne buloba bupiabupia.”​—Yeshayi 65:17, NW.

Mukanda wa Buakabuluibua udi kabidi ulaya dibanjijibua dia “diulu dipiadipia ne buloba bupiabupia.”​—mbulamatadi mupiamupia wa mu diulu ne nsangilu mupiamupia wa bantu ‘pakupula Nzambi tshinsonji tshionso ku mêsu kuabo, ne lufu kaluena luikalaku kabidi, nansha madilu nansha didiabakena, nansha bisama kabiena bikalaku kabidi.’​—Buakabuluibua 21:1, 4, NW.

Dilaya dia Nzambi edi nedikumbane mu katupa kîpi emu. Nenku, nansha matuku a mutshi wa olive neamueneke bu dituku dia mêba 24 tshianana. Ne netuikale ne dîba dikumbane dia kubabidila menemene midimu yonso ya bianza bietu.