Yehowa neapandishe buloba

TSHIPALU kampanda tshia ndeke pa tshimue tshia ku bidiila bia Maldives tshitu tshikangibua bua mêba a bungi dituku dionso. Mbua tshinyi? Bualu dîba ditu mâyi uula atu asapalala muaba utu ndeke ibukila ne itulukila, avuija dituluka dia ndeke bualu bua njiwu. Bamue bashikuluji badi batshina se: buondoke bua mbuu ku bidiila bia Maldives budi mua kubanda ku metre bu umue mu siekele walua. Nansha mudi bungi ebu bumueneka bukese, dibanda dia mushindu’eu didi mua kubutula butubutu matunga muanda mutekete a bidiila. Eyowa, bilondeshile tshikandakanda tshia UN Chronicle, dibanda dia buondoke bua mbuu dia metre 2 didi kakuyi mpata mua kujiika mulongolongo mujima eu wa bidiila, bidiila bitue ku 1 200!

Ntshinyi tshidi mpokolo wa dibanda dia buondoke bua mbuu? Bilondeshile Programe wa Mianda ya Kapepe wa UN (Matunga Masanga), dinyanguka dia kapepe kadi kanyungulula buloba kudi “dikuatshika luya dia tshipapu tshia buloba” didi dialabaja mbuu mu rejon ya luya lukole, dienguluja mabue a mashika adi pa nsongo ya mikuna ne makuabu, ne nunku didi dibandisha buondoke bua mbuu. Biro bia Panos bia ku Londres bidi biamba ne: dinyanguka dia kapepe “didi mua kuikala dituadijije tshipupu tshia ku kakese ku kakese tshia dibulunge-buloba dijima tshidi tshishintulula mikalu ya buloba ne mbuu.”

Dikalaku dia dikuatshika luya dia dibulunge-buloba dijima ditshiena dijula milandu munkatshi mua bashikuluji. Kadi, tudi mua kuikala ne dishindika dia se: malu a kapepe kaakupumbisha dilongolola dia Nzambi nansha. “Buloba budi bujadikibue,” ke mudi Bible wamba. “Kabuena mua kunyungishibua.” (1 Kulondolola 16:30) Yehowa udi ne bukokeshi pa kapepe ka buloba, ne tudi mua kusanka se: mu katupa kîpi emu neapandishe buloba ne bukua-bantu ku kabutu.​—Musambu wa 24:1, 2; 135:6; 2 Petelo 3:13.

[Mêyi a dianyisha bua tshimfuanyi mu dibeji 31]

Dizola dishindamene pa foto wa NASA