Mmushinga kayi udi nawu Bible?

NZUBU wa Tshilaminu tshia mikanda wa ditunga dia Grande-Bretagne mmuitabe matuku adi panshi aa bua kutula dolare ya bena Amerike bu 1 600 000 bua nkudimuinu wa mu anglais wa William Tyndale wa Mifundu ya tshiena-Greke ya Buena-nkristo. Mupatula kukadi bidimu 468, udi dipatuka dimuepele dijima dia kumpala dia Bible wa Tyndale diakapanduka ku madikolela a kalanda musenga akenjibua bua kumubutula. Bible eu wakalejibua patoke mu Londres.

Bible wa Tyndale wakasumbibua ku Université wa Bristol Baptist mu Angleterre, kuvuaye mulama bituadijile mu 1784. Profesere Roger Hayden, mulombodi tshindondi wa komité wa université eu wakamba ne: “Eu mmukanda wa ditunga, wa dishidimuna ne wa Buena-nkristo wa mushinga munenanenayi ne tuvua tujinga bua umuangalake bikole, bu mutuvua bawulame mu bibambalu bikolesha.”

Bua siekele mivule Bible uvua utamba kupetshibua mu muakulu wa Latin ne uvua ubadibua anu kudi bamfumu ba ekleziya ne kudi bamanyi bapiluke ba mukanda. Anu bu John Wycliffe uvua kumpala kuende, Tyndale uvua usua bua kupetesha Bible uvua mua kubadibua ne kumvuibua kudi buonso. Dimue edi wakambila mfumu kampanda wa ekleziya uvua umuluisha ne: ‘Biandama Nzambi ne muoyo bidimu bia bungi kumpala, nengenze bua se: nsongalume udi wendesha tshikasu tshia ngombe amanye bivule pa Mifundu kunupita nuenu.’

Eu uvua mudimu wa njiwu, bualu bamfumu ba ekleziya bavua baluisha ne lukinu luonso madikolela kayi wonso bua kupetesha bantu ba tshianana Mifundu. Bu tshipeta, Tyndale wakanyema Angleterre mutangile ku Allemagne. Wakakudimuina kuinaku “Dipungila Dipiadipia” kumbukila ku tshiena-Greke tshia kumpala. Bible bu 3 000 yakapatudibua ne kutumibuayi mu musokoko ku Angleterre. Muepiskopo wa Londres wakasumba Bible yonso yakapetaye ne kuyoshaye patoke mu lupangu lua ekleziya wa Saint Paul. Ndekelu wa bionso, bakakuata Tyndale, bakamulumbuluisha, ne kuambabu ne: mmubunde tshibawu tshia butontolodi. Mu 1536, bakamufiekela mu nshingu ne kumoshabu ku mutshi. Mmushindu kayipu udibi bikemesha bua kumona se: Bible wakakinyibua bikole kudi bamfumu ba ekleziya udi mpindieu ne mushinga mupite bukole nunku!

Bantemu ba Yehowa badi benza madikolela ne tshisumi tshionso bua kupetesha dimanya dijalame dia mu Bible kudi buonso badi badikeba. Kusakidila ku dipatula ne diabanya nkudimuinu mikuabu, mbapatule kumbukila ku miakulu ya ku ntuadijilu nkudimuinu wa Bible mujima udi mujalame ne mupepele bua kubala. Too ne mu 1995 mbapatule Bible mipite pa 74 000 000 ya nkudimuinu wa Les Saintes Ecritures​—Traduction du monde nouveau mu miakulu 12. Bushuwa, mushinga mulelela wa Bible kayi wonso mmukenji wende mufidi wa muoyo.

[Tshimfuanyi mu dibeji 32]

William Tyndale

[Mêyi a dianyisha]

Wa ku tshimfuanyi tshia kale tshitapa mu Bibliothèque Nationale