Udi ne mushinga mukole ku mêsu a Nzambi!

“Ne dinanga bua bikondo bikena bijadika ndi mukunange. Ke bua tshinyi ndi nkukoka ne bulenga-bunangi.”​—YELEMIYA 31:3, NW.

1. Mmunyi muvua mmuenenu wa Yezu kumpala kua bantu ba tshianana ba mu matuku ende mushilangane ne wa Bafarizeyi?

BADI mua kumona ditabalela dia dinanga ku mêsu ende. Muntu eu, Yezu, kavua bu bamfumu babo ba bitendelelu; uvua ubatabalela. Uvua umvuila bantu aba luse bualu “bavua bapungile ne batangalake bu mikoko idi kayiyi ne mulami.” (Matayi 9:36, NW) Bamfumu babo ba bitendelelu bavua balombibue bua kuikala balami ba dinanga, baleji-mpala ba Nzambi muena dinanga ne mulekeledianganyi wa bilema. Bishilangane, bavua bapetula bantu ba tshianana, babangata bu bena milongo mipuekele​—ne bu bantu bela milawu!a (Yone 7:47-49; fuanyikija ne Yehezekele 34:4.) Mbimueneke patoke se: mmuenenu wa kansungasunga wa mushindu’eu udi kayi mu Mifundu uvua mushilangane menemene ne mmuenenu wa Nzambi bua bantu bende. Uvua muambile Izalele, tshisamba tshiende ne: “Ne dinanga bua bikondo bikena bijadika, ndi mukunange.”​—Yelemiya 31:3, NW.

2. Mmunyi muakateta basambi ba Yobo basatu bua kumutuisha se: kavua muakanyine ku mêsu a Yehowa?

² Bafarizeyi kabavua ba kumpala ku ditabijija mikoko minangibue ya Yehowa se: kayivua ne mushinga. Tuangate tshilejilu tshia Yobo. Ku mêsu a Yehowa uvua muakane ne ukena kudiwula, kadi “bamusambi” basatu bakamba se: Yobo uvua muenzavi, mutontolodi muena bubi úvuá ne bua kufua kayi ushiya tshimanyinu nansha tshimue tshia dikalaku diende. Bakamba se: Nzambi kavua mua kuangata ne mushinga buakane bua Yobo, bu muvua Nzambi kayi nansha weyemena banjelu bende ne wangata diulu mene bu dikena dikezuke!​—Yobo 1:8; 4:18; 15:15, 16; 18:17-19; 22:3.

3. Mbinganyi bidi Satana utumika nabi lelu’eu bua kutuisha bantu se: ki mbakanyine ne ki mbanangibue?

³ Lelu’eu, Satana utshidi’anu utumika ne ‘bienzedi bia budimu’ ebi bua kufikisha bantu ku didiumvua se: ki mbanangibue ne ki mbakanyine. (Note kuinshi kua Efeso 6:11, NW) Bushuwa, utu misangu mivule upambuisha bantu pa kulengelela budiambi ne lutambishi biabo. (2 Kolinto 11:3) Kadi utu kabidi usanka padi bena butekete babenga kudiangata nkayabo ne mushinga. Bidi nangananga nanku mu tshikondo etshi tshikole tshia “matuku a ku nshikidilu.” Bantu bavule lelu’eu badi bakolela mu mêku mudi kamuyi “disuangana dia ku tshifukilu”; bavule badi dituku dionso ne bua kuakamangana ne bena luonji, badisui ne bena mutu mukole. (2 Timote 3:1-5) Bidimu bivule bia tshinyangu, ditapululangana dia makoba, nkinu, anyi dinekesha malu bidi mua kuikala bituishe bantu ba mushindu’eu se: ki mbakanyine ne kabena mua kunangibua. Mulume kampanda wakafunda ne: “Tshitu ngumvua dinanga bua muntu kayi yonso anyi ndiumvua munangibue nansha. Mbinkolele bua kuitabuja se: Nzambi utu untabalela menemene.”

4, 5. (a) Bua tshinyi lungenyi lua kudiangata bu muntu ukena muakanyine kaluena mu diumvuangana ne Mifundu? (b) Ntshimue tshia ku bipeta bibi kayi tshidi tshipatuka ku ditabuja se: madikolela etu ki mmakanyine nansha kakese?

⁴ Lungenyi ludi lusaka muntu ku didiangata bu udi kayi muakanyine ndisendeka dia nshindamenu wa bulelela budi mu Dîyi dia Nzambi, dilongesha dia tshia-bupikudi. (Yone 3:16) Bikala Nzambi mufute mushinga mukole nunku​—muoyo wa mushinga mukole wa Muanende umuepele—​bua kupetesha mushindu wa kushala ne muoyo wa kashidi, bushuwa mmutunange; ne bulelela etshi ntshijadiki tshia se: utu utuangata ne mushinga!

⁵ Kabidi, mmushindu kayipu wikalabi bitekesha mu mikolo bua kudiumvua se: katuena tusankisha Nzambi, ne se: madikolela etu wonso kaena ne mushinga to! (Fuanyikija ne Nsumuinu 24:10.) Ne mmuenenu mubi eu, nansha dikankamijibua difila ne tshipatshila tshimpe, bua kutuambuluisha bua kulubuluja mudimu wetu kudi Nzambi padiku mushindu, didi pamu’apa mua kuangatshibua kudi bakuabo bu dipiishibua. Bidi mua kumuenek’anu bu dibambuluila dituishibua dietu nkayetu dia se: tshionso tshitudi tuenza ki ntshivule to.

6. Ntshinyi tshidi tshitambe buimpe tshidi mua kuakaja ngenyi mibi itudi tudielela nkayetu?

⁶ Biwikala umvua nyanji mibi ya mushindu’eu munda muebe, kubudi ditekemena to. Ku tshikondo ne ku tshikondo, bavule ba kutudi batu mu mushindu mubule meji baditalula. Ne vuluka se: Dîyi dia Nzambi ndilongolola bua “kululamija malu” ne bua “kushimbula ngumbu.” (2 Timote 3:16, NW; 2 Kolinto 10:4, NW) Mupostolo Yone wakafunda ne: “Ku etshi netumanye se: tudi bafumine ku bulelela, ne netutuyishe mitshima yetu kumpala kuende, bua bionso bidi mitshima yetu itupisha, bualu Nzambi mmutambe mitshima yetu ku bunene ne mmumanye bintu bionso.” (1 Yone 3:19, 20, NW) Nenku, lekela tuanji kukonkonona mishindu isatu idi Bible utulongesha se: tudi ne mushinga mukole ku mêsu a Yehowa.

Yehowa udi ukuangata ne mushinga

7. Mmunyi muakalongesha Yezu bena nkristo pa bidi bitangila mushinga wabo ku mêsu a Nzambi?

⁷ Wa kumpala, Bible udi buludiludi utulongesha se: yonso wa kutudi udi pa nkayende ne mushinga ku mêsu a Nzambi. Yezu wakamba ne: “Nyunyu ya mishamisha itanu, kabena bayipana ku tukuta tubidi anyi? Nansha umue ki mmuvulamina kudi [Nzambi, NW]. Kabidi nsuki ya ku mutu wenu mmibadika yonso. Lekelayi ditshina; nudi ne mushinga mupite wa mishamisha tshisumbu.” (Lukas 12:6, 7, Mukenji Mulenga) Mu matuku awu, mushamusha uvua nyunyu wa mushinga mutambe kuteketa kuyivuabo basumbisha bu biakudia, kadi yonso wa kudiyi kavua upuibua muoyo kudi wakayifuka. Nenku, tshishimikidi ntshishimikibue bua ditapulula dimpe: Pa bidi bitangila bantu​—badi ne mushinga mutambe kuvula—​Nzambi mmumanye malu abo wonso ku kanungu ku kanungu. Nsuki miena-dîna ya ku mutu kua yonso wa kutudi idi’anu bu mibadika!

8. Bua tshinyi bidi bilelela bua kuela meji se: Yehowa udi mua kubadika nsuki ya ku mutu wetu?

⁸ Nsuki mmibadika? Biwamona se: tshitupa etshi tshia tshimfuanyi tshia Yezu katshiena tshilelela, mona: Nzambi udi uvuluka ku kanungu ku kanungu basadidi bende bena lulamatu mu mushindu udiye mene mukumbane bua kubabiisha ku lufu​—kubafukulula mu kanungu mu kanungu, pa kusangisha kode jenetike wabo mujingakane ne bidimu biabo bionso bia bivulukidi ne malu abo mamona. Kubadika nsuki yetu (idi yamba kutua ku 100 000) pa kufuanyikija [ne bionso abi] bualu bukese patupu bua mponono!​—Luka 20:37, 38.

Mmushinga kayi utudi nawu ku mêsu a Yehowa?

9. (a) Ng’imue ngikadilu kayi idi Yehowa wangata ne mushinga? (b) Bua tshinyi udi wela meji se: ngikadilu ya mushindu’eu idi ne mushinga kudiye?

⁹ Muibidi, Bible udi utulongesha tshidi Yehowa wangata ne mushinga mutudi. Bua kuamba bimpe, udi usanka bua ngikadilu yetu mimpe ne madikolela etu. Mukalenge Davidi wakambila muanende Solomo ne: “Yehowa udi ufukuna mitshima yonso, ne udi ujingulula dinyikibua dionso dia ngenyi.” (1 Kulondolola 28:9, NW) Padi Nzambi ufukuna mitshima ya bantu miliyare mivule mu bulongolodi ebu bua tshikisu, budi buwule ne nkinu, ndisanka kayipu didiye ne bua kuikala nadi padiye upeta mutshima udi munange ditalala, bulelela ne buakane! (Fuanyikija ne Yone 1:47; 1 Petelo 3:4.) Ntshinyi tshidi tshienzeka padi Nzambi usangana mutshima udi muwule tente ne dinanga buende, udi ukeba kulonga malu ende ne wabanyangana dimanya adi ne bakuabo? Mu Malaki 3:16 (NW), Yehowa udi utuambila se: utu uteleja aba badi bayukidilangana ne bakuabo malu adi amutangila ne utu ne “mukanda wa tshivulukidi” bua buonso “badi mu ditshina dia Yehowa belela meji ku dîna diende.” Ngikadilu ya mushindu’eu itu ne mushinga mukole kudiye!

10, 11. (a) Mmunyi mudi bamue mua kuteta kuvila bijadiki bia se: Yehowa udi wangata ngikadilu yabo mimpe ne mushinga? (b) Mmunyi mudi tshilejilu tshia Abidja tshileja se: Yehowa utu wangata bungi kayi buonso bua ngikadilu mimpe ne mushinga?

¹⁰ Kadi, mutshima mudipishi udi mua kukandamena bijadiki bia mushindu’eu bia mushinga utudi nawu ku mêsu a Nzambi. Mutshima mudipishi udi mua kunungana ne: ‘Kadi kudi bakuabo bavule ba tshitembu mu ngikadilu ayi kumpita meme. Nkanyinganyinga kayipu kadi Yehowa ne bua kuikala naku padiye umfuanyikija nabu!’ Yehowa katu ufuanyikija bamusadidi bende, anyi katu muena malu makole, peshi katu ne mêyi-makulu akena majoboke nansha. (Galatia 6:4) Utu ubala mu mitshima ne butue buonso, ne wangata ne mushinga ngikadilu yonso mimpe.

¹¹ Tshilejilu, pakela Yehowa mukenji se: bukalenge butontolodi bua Mukalenge Yeroboame buvua ne bua kubutudibua butubutu, kumbushibua bu “tumvi,” Wakatuma dîyi se: anu umue wa ku bana balume ba mukalenge, Abidja, ke uvua ne bua kujikibua mushindu muimpe. Bua tshinyi? “Tshintu kampanda tshimpe kumpala kua Yehowa Nzambi wa Izalele tshiakasanganyibua mudiye.” (1 Bakalenge 14:10, 13, NW) Ebi bidi biumvuija se: Abidja uvua mutendeledi wa Yehowa muena lulamatu anyi? Tòo, bualu wakafua, anu bu muakenzekabi bua bena dîku diende bena bubi. (Dutelonome 24:16) Yehowa uvua wangata ne mushinga “tshintu kampanda tshimpe” tshiakamonaye mu mutshima wa Abidja ne kuenza malu mu diumvuangana natshi. Mukanda wa Matthew Henry’s Commentary on the Whole Bible udi wamba se: “Kadi, muaba udi usanganyibua tshimue tshintu tshimpe tshia mushindu’awu, Nzambi utu ukeba ngikadilu mimpe munda muetu, neamanye mua kuyisunguluja, nansha yoyi ndambu mukese, ne utu usanka bualu buayi.” Uvuluka se: biapeta Nzambi nansha ndambu mukese wa ngikadilu muimpe munda muetu, udi mua kumudiundisha mutantshi wonso utuenza madikolela bua kumusadila ne lulamatu.

12, 13. (a) Mmunyi mudi Musambu wa 139:3 uleja se: Yehowa utu wangata madikolela etu ne mushinga? (b) Mmu ngumvuilu kayi mudibi mua kuambibua se: Yehowa utu unyingulula midimu yetu?

¹² Bia muomumue, ke mutu Yehowa wangata madikolela etu ne mushinga. Mu Musambu wa 139:1-3 (NW), tudi tubala se: “Ô Yehowa, udi mumfukune ne udi mummanye. Wewe udi mumanye disomba ne dijuka bianyi. Udi mukonkonone ngenyi yanyi kumbukila kule. Luendu luanyi ne dilala dianyi udi mubipima, ne wamanyi njila yanyi yonso.” Nenku, Yehowa mmumanye midimu yetu yonso itudi tuenza. Kadi dimanya diende nditambe kumanya patupu pa mutu pa mutu. Mu tshiena-Ebelu, tshiambilu “wamanyi njila yanyi yonso” tshidi kabidi mua kuikala ne diumvuija dia “udi wangata ne mushinga mukole njila yanyi yonso” peshi “udi munange njila yanyi yonso.” (Fuanyikija ne Matayo 6:19, 20.) Mmunyi mudi Yehowa mua kunanga njila yetu yonso petu bikale bantu bapange bupuangane ne bena mpekatu?

¹³ Mu mushindu muakane, bilondeshile bamue bashikuluji, pakafunda Davidi ne: Yehowa uvua “upima bule” bua ngendu yende ne bikondo bivuaye wikisha, mu tshiena-Ebelu bidi biumvuija ku muaku ku muaku “kunyingulula” peshi “kupepula.” Mukanda kampanda udi wamba ne: “Bidi biumvuija . . . kupepula bisota bionso, ne kushiya ntete yonso​—kulama bionso bidi ne mushinga. Nenku, apa bidi biumvuija ne: Nzambi, mu ngakuilu wa tshimfuanyi, uvua umunyingulula. . . . Wakamuangalaja bisota bionso, peshi kutangila bivua bishala mbuena kuamba ne: bivua ne mushinga menemene.” Mutshima mudipishi udi mua kunyingulula midimu yetu mu mushindu mushilangane, kututobolola kakuyi luse bua bilema bietu bia kale ne kupepeja midimu mimpe itudi tukumbaja pa kuyangata bu idi kayiyi ne mushinga nansha mukese. Kadi, Yehowa udi utulekelela mpekatu yetu bituanyingalala ne muoyo mujima ne kuenza madikolela a tshisumi bua katuyenzuludi. (Musambu wa 103:10-14; Bienzedi 3:19) Udi utunyingulula ne uvuluka midimu yetu mimpe. Bushuwa, udi uyivuluka kashidi mutantshi wonso utudi tushala bamulamate. Kuyipua muoyo udi mua kukuangata bu dipanga buakane, ne musangu nansha umue katu mupange buakane!​—Ebelu 6:10.

14. Ntshinyi tshidi tshileja se: Yehowa udi wangata ne mushinga mudimu wetu wa bena nkristo?

¹⁴ Ng’imue ya ku midimu mimpe kayi idi Nzambi wangata ne mushinga? Tshintu kayi tshionso tshitudi tuenza mu didikija Muanende, Yezu Kristo. (1 Petelo 2:21) Nenku, bushuwa, mudimu udi mutambe mikuabo yonso ku mushinga, nkumuangalaja lumu luimpe lua Bukalenge bua Nzambi. Mu Lomo 10:15 (NW), tudi tubala se: “Mmushindu kayipu udi makasa a badi bamanyisha ngumu mimpe ya bintu bimpe malengele!” Nansha mutudi pamu’apa katuyi mua kuangata makasa etu mena-dîna bu “malengele,” muaku uvua Paulo mutumike nawu apa ng’wa muomumue ne udibo batumike nawu mu nkudimuinu wa tshiena-Greke wa Septante bua kufunkuna Rebeka, Rachel, ne Yozefe​—busatu buabo bakadisunguluja bua bulengele buabu. (Genese 26:7; 29:17; 39:6) Nenku, didifila dietu mu mudimu wa Nzambi wetu, Yehowa ndilengele ne didi ne mushinga mukole ku mêsu ende.​—Matayo 24:14; 28:19, 20.

15, 16. Bua tshinyi Yehowa udi wangata dinanukila dietu ne mushinga, ne mmunyi mudi mêyi a Mukalenge Davidi adi mu Musambu wa 56:8 azangika muanda eu?

¹⁵ Mukuabo ngikadilu udi Nzambi wangata ne mushinga ndinanukila dietu. (Matayo 24:13) Vuluka se: Satana mmusue bua wewe kulekela Yehowa. Dituku dionso diudi ushala ne lulamatu kudi Yehowa ndikuabo diudi muambuluisha bua kufila diandamuna kudi Satana muyobodianganyi. (Nsumuinu 27:11) Dinanukila ditu imue misangu bualu bukole butambe. Ntatu ya masama, ntatu ya mfranga, tunyinganyinga tua mu mpampakenu, ne bimue bipumbishi bidi mua kuvuija dituku dionso didi dipita diteta. Dinanukila kumpala kua mateta a mushindu’eu didi mu mushindu wa pa buawu ne mushinga mukole kudi Yehowa. Ke bua tshinyi Mukalenge Davidi wakalomba Yehowa bua alame binsonji biende mu “mulangi wa tshiseba” wa tshimfuanyi, webeja ne dieyemena dionso ne: “Kabienaku mu mukanda webe anyi?” (Musambu wa 56:8, NW) Eyowa, Yehowa udi wangata ne mushinga mukole ne udi uvuluka binsonji bionso ne makenga bitudi tunanukila mu dilama lulamatu luetu kudiye. Binsonji ne makenga pabi bidi ne mushinga mukole ku mêsu ende.

¹⁶ Pa kumona ngikadilu yetu mitambe bulenga ne madikolela etu, mmunyipu mudibi bimueneka patoke se: Yehowa udi usangana bivule bia kuangata ne mushinga munda mua yonso wa kutudi! Bulongolodi bua Satana nansha butuangata mushindu kayi, Yehowa udi yeye utuangata ne mushinga mukole ne bu bimue bia ku “bintu bimpe bia mu matunga wonso.”​—Hagai 2:7, NW.

Tshidi Yehowa muenze bua kuleja dinanga diende

17. Bua tshinyi mulambu wa tshia-bupikudi wa Kristo udi ututuisha se: Yehowa ne Yezu mbanange yonso wa kutudi pa nkayende?

¹⁷ Muisatu, Yehowa udi wenza bivule bua kuleja dinanga diende kutudi. Bushuwa, mulambu wa tshia-bupikudi wa Kristo udi diandamuna ditambe bunene ku mashimi a Satana a se: katuena bakanyine peshi banangibue to. Katupu muoyo se: lufu lua tshinyangu luakafua Yezu pa mutshi wa tshinyongopelu ne dibungama ditambe bunene diakananukila Yehowa pa kumona lufu lua Muanende munanga ntshijadiki tshia dinanga diende kutudi. Kabidi, dinanga adi nditangila yonso wa kutudi pa nkayende. Ke muakangata mupostolo Paulo dinanga adi, bualu wakafunda ne: “Muana wa Nzambi . . . wakannanga ne kudifila bualu buanyi.”​—Galatia 2:20, NW.

18. Mmu ngumvuilu kayi mudi Yehowa utukoka kudi Kristo?

¹⁸ Yehowa mmufile tshijadiki tshia mudiye mutunange pa kutuambuluisha muntu pa nkayende bua kubabidila masanka a ku mulambu wa Kristo. Mu Yone 6:44 (NW), Yezu udi wamba ne: “Muntu nansha umue kêna mua kulua kundi, bikala Tatu udi muntume kayi mumukoke.” Ku diambuluisha dia mudimu wa buambi, udi utangila yonso wa kutudi, ne ku diambuluisha dia spiritu munsantu wende, udi Yehowa utumika nende bua kutupetesha mushindu wa kujingulula ne kutumikila malelela a mu nyuma, nansha mutudi ne mikalu ne mapanga bupuangane, Yehowa nkayende udi utukoka kudi Muanende ne ku ditekemena dia muoyo wa tshiendelele. Pa nanku, Yehowa udi mua kutuambila bu muakambilaye Izalele ne: “Ne dinanga bua bikondo bikena bijadika, ndi mukunange. Ke bua tshinyi ndi nkukoka ne bulenga-bunangi.”​—Yelemiya 31:3, NW.

19. Bua tshinyi muabi utudi nawu wa masambila udi ne bua kutujadikila dinanga didi nadi Yehowa kudi yonso wa kutudi pa nkayende?

¹⁹ Pamu’apa, ku masambila nkutudi tujinguluila dinanga dia Yehowa mu mushindu wa bu-nyana busheme. Udi ulomba yonso wa kutudi bua “kumusambil’amu kumusambila.” (1 Tesalonike 5:17, NW) Utu umvua! Utu kabidi ubikidibua bu “Muteleji wa masambila.” (Musambu wa 65:2, NW) Kêna mupesha bukenji ebu kudi muntu kayi yonso to, nansha kudi Muanende muine. Anjibi kuela meji: Mufuki wa bionso udi utulomba bua kumubila mu masambila ne budikadidi buonso mu diakula. Milombo yebe idi pamu’apa mua kusaka Yehowa bua kuenza tshivuaye kayi mua kuenza.​—Ebelu 4:16; Yakobo 5:16; tangila Yeshaya 38:1-16.

20. Bua tshinyi dinanga dia Nzambi kutudi ki nkabingila ka didiangata nkayetu ne mushinga peshi kuikala badisui?

²⁰ Muena nkristo muena butshintshikidi nansha umue kêna mua kuangata dinanga ne kanemu bileja patoke kudi Nzambi bu kabingila ka kudiangata ne mushinga mutambe udiye nawo menemene. Paulo wakafunda ne: “Mu dina dia bulengele bundi mupete, ndi ngambila yonso wa kunudi ne: kanudiangatshi ne mushinga mupite pa unudi nawo, apo nudiangate ne mushinga muakane, muntu yonso bilondeshile pa ditaba didi [Nzambi, NW] mumupe.” (Bena Roma 12:3, Mukenji Mulenga) Nenku, nansha mutudi tutshionkomokela mu dinanga dia musangelu dia Tatuetu wa mu diulu, mbiakane bua tuikale ne nkatshinkatshi mu tshieledi tshia lungenyi ne tuvuluka se: bulenga-bunangi bua Nzambi ki mbutuakanyine.​—Fuanyikija ne Luka 17:10.

21. Mmashimi kayi a Satana atudi ne bua kutungunuka ne kukandamena, ne mpa bulelela kayi bua Nzambi patudi ne bua kuelela meji?

²¹ Muntu yonso wa kutudi enze muende muonso madikolela bua kukandamena ngenyi yonso idi Satana ulubuluja mu bulongolodi ebu bua kale budi buenda bufua. Abi bidi kabidi bilomba kumbusha lungenyi lua se: katuena bakanyine peshi banangibue. Bikala nsombelu mu ndongoluelu eu mmukulongeshe bua kudiangata bu tshipumbishi tshidi tshipangisha ditundubuka dia dinanga dia Nzambi dinenanenayi, peshi kuangata midimu yebe mimpe bu idi ne mushinga mukese mutambe bua kumonyibuayi kudi mêsu ende atu amona bintu bionso, anyi mpekatu yebe bu mitambe kualabala kakuyi nansha mushindu wa lufu lua Muanende wa mushinga mukole kuyijibikila, bushuwa mbakulongeshe mashimi. Imansha mashimi a mushindu’eu ne munyòtò wonso udi muakanyine! Tulamayi kashidi mu lungenyi mêyi mafundisha ku spiritu a mupostolo Paulo adi mu Lomo 8:38, 39 (NW): “Ndi mushindike se: nansha lufu, nansha muoyo, nansha banjelu, nansha mbulamatadi, nansha bintu bia lelu’eu, nansha bintu bitshivuavua, nansha makole, nansha butumbuke, nansha buondoke, nansha tshifukibua tshikuabo kayi tshionso kabiena mua kututapulula ku dinanga dia Nzambi didi mu Kristo Yezu, Mfumu wetu.”

[Mêyi adi kuinshi]

Udi wela meji bishi?

◻ Bua tshinyi Satana udi uteta kututuisha se: katuena bakanyine ne ki mbatunange?

◻ Mmunyi muakalongesha Yezu se: Yehowa udi wangata yonso wa kutudi ne mushinga?

◻ Mmunyi mutudi bamanye se: Yehowa utu wangata ne mushinga ngikadilu yetu mimpe?

◻ Mmunyi mutudi mua kuikala ne dishindika dia se: Yehowa udi wangata madikolela etu ne mushinga mukole?

◻ Mmunyi mudi Yehowa mufile tshijadiki tshia dinanga diende kudi muntu yonso pa nkayende?

[Tshimfuanyi mu dibeji 13]

Yehowa udi umona ne uvuluka yonso wa ku badi beleela meji ku dîna diende