Nkonko ya babadi

Mmuenenu kayi utudi ne tshia kuikala nende ku ntambu ya bena nkristo?

N’lukonko lua mushinga, bualu nansha mudi bavule ba ku babadi betu bamana kutambuishibua, ludi lututangila tuetu ne badi batambuishibua kabidi. Tuanji kuakula bua badi batambuishibua, binyibua bajima mu mâyi. Badi ne bua kuikala ne mmuenenu kayi?

Mu Matayi 28:19, 20, Yezu wakambila balondi bende bua kuya ne kuvuija bantu bayidi, pa kubalongesha ne kubatambuisha. Kêna muleje batismo bu bualu bua mpampakenu mikole, tshienzedi tshisonsola kudi milowo ya tshitupa tshîpi. Ntshiidia tshia mushinga bu mudibi bimueneka ku tshilejilu tshia Yezu. Luka 3:21 (NW) udi wamba ne: “Yezu pende wakatambula ne bu muvuaye usambila, diulu diakunzuluka.” Eyowa, Tshitembelu tshietu tshiakangata batismo ne mushinga, ne mmuenenu wa masambila. Katuena mua kumufuanyikija wenda wenza misaalu ya ditshimuna kunyima kua dipatuka mu mâyi, wenda ukupa maboko ne mbila ya ditshimuna, pabi ke muakenza bamue matuku adi panshi aa. Tòo, Yezu yeye wakakudimuka kudi Tatuende mu disambila ku mêsu a Yone nkayende.

Ku lukuabo luseke, Bible kêna wamba ne: batismo mbualu bua dibungama ne kanyinganyinga, budi bulomba ngimanyinu ya pa buayi anyi diamba ku muoyo dia mifundu, bu mudibi bilombibua kudi imue ekleziya ya Bukua-buena-nkristo lelu. Ela meji ku dituku dia Pantekoste, pakatambuishibua binunu bia bena Yuda ne aba bavua badikudimune ku buena-Yuda batismo wa buena nkristo. Bakaavua balonge Mikenji ya Nzambi ne bafike ku dishemesha malanda nende. Nenku tshivuabo ne bua kuenza nkulonga ne kuanyisha Masiya, Yezu. Diakamue pakenzabo nenku, bakatambuishibua.

Bienzedi 2:41 (NW) udi wamba ne: “Aba bakakidila dîyi diende ne mutshima mujima bakabatijibua.” Nkudimuinu wa Weymouth udi wamba ne: “Nenku, aba, bakanyisha dîyi diende ne disanka bakatambuishibua.” Bakapeta disanka mu lumu ludi lusankisha ludi lutangila Masiya, bulelela, disanka diabo dia mu mutshima diakafikisha too ne ku batismo muine, batismo kumpala kua babandidi basanguluke nkama ne nkama. Nansha banjelu mu diulu bavua babandila ne basanka. Vulukayi miaku ya Yezu: ‘Ndi nuambila ne, Nunku kabidi disanka didi ku mesu kua banjelo ba Nzambi bualu bua muntu umue mubi wakukudimuna mutshima wende.’​—Luka 15:10.

Tudi buonso mua kuleja mu mishindu kabukabu mushinga ne disanka bisuikakaja ku batismo. Mu imue ekleziya aba badi batambuishibua badi baluata nkanzu mitoke anyi mifike. Bualu bulomba ebu kabuena bushindamena pa Mifundu nansha kakese. Kabidi, bilamba bia tshiowedi bidi bitamba kuleja patoke bitupa bia mubidi kabiena bikumbanyine ni mbua balume ni mbua bakaji. Bu muvuabi biamba, padi muena nkristo mupiamupia upatuka mu mâyi, kêna ne tshia kuenza misaalu ya pa buayi anyi kuenza bu udi mupeta ditshimuna dinene. Bena mu buena-muntu bua Buena-nkristo bakuabo badi ne disanka bualu muntu mupiamupia mmutambuishibue. Udi ne bua kujingulula se: dileja dia ditabuja edi didi anu tshiidia tshia kumpala mu lubilu lule lua muoyo mutoke bua kupeta dianyisha dia Nzambi.​—Matayo 16:24.

Tuetu, bu babandidi ku batismo wa patoke, tudi tuabanyangana disanka mu tshikondo etshi, nangananga padi muena dîku dietu anyi umue wa ku balongi betu utambuishibua. Kadi, bua kuabanyangana tshishiki [disanka edi], tudi ne tshia kuteleja muyuki wa badi batambuishibua wonso, kuteleja mandamuna abu a patoke ku nkonko mibeela, ne kuikala ne ntema ku disambila. Kuenza nunku nekutuambuluishe bua kulama mmuenenu muimpe pa batismo muine; netumumone bu mudi Nzambi umumona. Kunyima kua batismo, disanka dietu kadiena dilomba dileja dia ditshimuna, kasumbu ka bilongo anyi difesto bua kutumbisha udi mutambuishibue to. Kadi tudi mua kusemena kudi muanetu wa balume anyi wa bakaji mupiamupia bua kumuleja disanka bua tshiidia tshia mpatshi tshidiye muele ne bua kumujingila dilua dilenga dia musangelu mu dîku dietu dia bena nkristo.

Nunku, mu tshikoso, tuetu buonso ne aba badi binyibua mu mâyi, tudi ne bua kuangata batismo ne mushinga udi ukengela. Ki ntshikondo tshia kudilekelela mu dikedidia, kuenza mafesto anyi kuya mu tuseku to. Kadi ki nkabidi tshikondo tshia dibungama anyi kanyinganyinga to. Tudi ne kabingila bua kusanka se: bantu bapiabapia mbadisangisha kutudi mu njila wa muoyo wa kashidi. Ne tudi mua kujingila ne musangelu wonso bana betu balume ne bakaji bapiabapia dilua dilenga.

[Tshimfuanyi dibeji dijima mu dibeji 31]