“Disumbisha luepu” ku Mozambique

FRANCISCO COANA, muena komité wa ditunga dia Mozambique, wakapitshisha bidimu dikumi mu “tumponya tua dishidimununangana.” Udi ulonda bualu buende bumona ebu: “Mvua mumanye se: tuvua ne bua kupitshisha tshikondo kampanda apa, ke bua tshinyi ngakebeja mutangidi wa tshijengu né mvua mua kutungunuka bu mpanda-njila wa pa tshibidilu. Kadi mmunyi mumvua mua kudifila bua mêba a bungi mu mudimu wa patoke, bualu bantu pabuipi ne buonso mu tumponya bavua Bantemu ba Yehowa? Ngakandamuna se: nenye ku Milange, tshimenga kampanda tshidi ku mutantshi wa kilometre 47, bua kupetangana ne bantu ba kuyisha.

“Nansha mutuvua katuyi bapeshibue njila kudi mbulamatadi bua kupatuka mu kamponya, mukenji eu kabavua bawulonda ne dîsu dikole to. Ndi mua kuvuluka pamvua mbuela mu dîtu, ntua binu panshi, ne nsambila bua mushindu wa kuyisha bantu ba muaba awu. Mu katupa kîpi, Yehowa wakandamuna.

“Ngakapetangana ne muntu uvua ne dikalu, ne ngakumvuangana nende. Wakitaba se: bingadima bitupa bisatu pa binayi bia hektare wende wa buloba kumpala kua dilua dia muvu wa mvula, bu mafutu uvua ne bua kumpesha dikalu diende. Nunku ngakapitshisha dinda dionso ndima madimi ende. Yehowa wakabenesha ndongoluelu eu, bualu ndekelu wa bionso ngakapeta dikalu dianyi.

“Tshipeta tshivua se: ngakapeta mushindu wa kuya ku tshimenga tshialabale tshia Milange ne kutungunuka biakane ne bumpanda-njila buanyi mu budimi ebu bua bufuke. Bualu mudimu wetu uvua mukandika, mvua ne bua kufuikakaja ntumikilu kampanda bua kutuadija diakula ne bantu pa bulelela. Ne mikanda ne bibejibeji bifinya muinshi mua nzumiji wanyi, ngakangata ndambu wa luepu mu tshibombi ne kuditua mu bungenda-mushinga bua disumbisha luepu. Pamutu pa kuwusumbisha ku meticais 5 (mfranga ya mu Mozambique), ngakawutua mushinga wa meticais 15. (Bu wowo ne mushinga mutambe bukese, bantu bavua mua kuwusumba wonso, ne tshivua mua kuikala ne luepu lua kusumbisha bua kuyisha bipitshidile!) Mayukidilangana anyi avua enjibua mu mushindu mufuane udi ulonda eu:

“‘Muoyo webe awu! Lelu, ndi nsumbisha luepu.’

“‘Mushinga kayi?’

“‘Meticais dikumi ne itanu.’

“‘Tòo, tòo. Mmushinga mupite bukole!’

“‘Eyowa, ndi mutuishibue se: mmushinga mupite bukole. Kadi biwikala wela meji se: mmushinga mukole mpindieu, indila kakese newikale ne mushinga munekesha matuku atshilualua. Ukavuaku mumanye se: bakadianjila kubimanyisha mu Bible anyi?’

“‘Tshitu muanji kubibala mu Bible wanyi nansha musangu umue.’

“‘Eyowa, bidi bisanganyibuamu. Tuala Bible webe, bua nkuleje.’

“Pa nunku diyukidilangana divua difikisha too ne ku ditumika ne Bible wende, nunku wanyi uvua ushala mufinya muinshi mua nzumiji wanyi. Mvua ntela Buakabuluibua nshapita 6, pa bidi bitangila nsombelu mikole ne dipangika dia biakudia. Bu meme mua kumvua diandamuna dilenga, mvua mpatula mukanda wa Bulelela budi bufikisha ku muoyo wa kashidi anyi wa Lumu luimpe luanusankisha ne ntuadija dilonga dia Bible dia pa tshibidilu.

“Tshipeta tshivua se: ngakafika ku dituadija kasumbu ka basankididi 15 ba bulelela mu Milange. Kadi, kabiakanenga bua bamfumu ba mbulamatadi kumanyabo midimu yetu. Dimue edi mvua ndombola dilonga dia Bible, bampulushi kubuela mu tshimpitshimpi mu nzubu wa mulongi wa Bible ne kutukuatabo. Buonso buetu, pa kusangisha ne bana batekete ba mu dîku edi bakaya netu ku buloko bua muaba awu. Kunyima kua kupitshisha ngondo umue muaba awu, buonso buetu bakatupingajilula ku kamponya.”

Malu aa kaakakepesha mitalu ya bana betu to. Pamutu pa nunku, Francisco ne dîku diende, pamue ne binunu ne binunu bia bana babo bavua mu tumponya, badi mpindieu batendelela ne bamanyisha [lumu luimpe] mu budikadidi mu Mozambique.