Mpuilu wa “Basamunyi bena disanka”: Neubuelemu anyi?

DISANKA! Muaku awu udi umvuika mupiamupia, peshi muenyi ku matshi, mu bikondo ebi biuwule tente ne ndululu anyi? Bushuwa, bikandakanda kabitu bifila tubingila tuvule bua disanka to. Mvita munkatshi mua bisa, dimuangalaka dia nzala, bulofua, dinyanguka dia kapepe dia njiwu, ditenkakana dia malu a tshididi, dibunda bibawu​—ebi mbintu bidi kabiyi mua kusankisha mutshima, ki mmuomu anyi?

Bantu ba bungi lelu’eu badi babotekela milowo kayi yonso ya mu nsombelu. Kadi disanka? Disanka mbadiumvuije bu “nyanji ya disangala; ditshionkomoka.” Bantu bavule kabena balabule disanka dilelela edi to, ne padibu badilabula, pa tshibidilu ditu dia katupa kîpi.

Kadi, bua matuku etu aa, Bible wakadianjila kulaya ne: ‘Mukalenge Yehowa udi wamba ne, Tangilai, bantu banyi nebasanke. Tangilai bantu banyi nebimbe misambu bua disanka dia mu mitshima yabo.’ (Yeshaya 65:13, 14) Mmunyi mudibi mua kuenzeka?

Bua kupeta diandamuna, tudi tukulomba bua kubuela mu umue wa ku mpuilu ya distrike ya Bantemu ba Yehowa yenzeka mu 1995. Tshiena-bualu tshia mpuilu eyi tshidi “Basamunyi bena disanka,” ne kabena balomba mfranga bua kumubuela. Programe wa mpuilu eu wa matuku asatu neenzeke ne miyuki mishindamene pa Bible, manaya a tshilejilu, mayukidilangana, ne malu mavule. Mu dipita dia programe, tshiena-bualu etshi netshizangikibue.

Mpuilu eyi idi ituadija mu Etats-Unis mu Kabalashipu ne neyitungunuke mu bimenga pa buloba bujima too ne ku ntuadijilu wa 1996. Pamu’apa, nekuenzeke umue pabuipi ne muaba uudi. Bua tshinyi kubenga kuebeja Bantemu ba Yehowa badi basombe pamue nebe? Tudi ne musangelu wonso tukulomba bua umubuele.