Difika dilenga mu mpuilu wa distrike wa “Ditshina dia Nzambi”!

EYOWA, tshikondo tshiasemenyi pabuipi bua mpuilu ya distrike ya Bantemu ba Yehowa bua tshidimu tshia 1994. Bituadijile ku Kabalashipu 1994 too ne mu Tshiongo 1995, programme wa mpuilu wa matuku asatu neenzeke mu bimenga nkama ne nkama pa buloba bujima​—diambedi, ku Amerike wa ku Nord, pashishe ku Mputu wa ku Est ne ku Ouest, Azi, Amerike wa pankatshi ne wa ku Sud, mu Afrike, ku Australie, ne mu bidiila bia mbuu.

Ntshiena-bualu kayipu tshidi tshilenga ku muoyo​—tshia “Ditshina dia Nzambi”! Edi ki nditshina dia patupu, didi nadi muntu kampanda udi muoyo wende mu njiwu nansha, apo, nditshina dia Nzambi, ditshina didi dipetesha ditalala ne disanka mu tshieledi tshia lungenyi. Lusumuinu kampanda lua mu Bible ludi luamba ne: “Difutu dia kudihuekesha ne dia ditshina dietu dia Yehowa didi bubanji, butumbi ne muoyo.” (Nsumuinu 22:4, Mukanda wa Nzambi) Mmunyi mudi ditshina dia Nzambi mua kupetesha “bubanji, butumbi ne muoyo”? Ebi nebimueneke patoke pakonkononyibua tshiena-bualu etshi munkatshi mua matuku asatu, muenzeka miyuki, diela bantu nkonko, manaya a tshilejilu ne drama.

Mupostolo Paulo wakafunda ne: katuena ne bua ‘kulengulula didisangisha dietu nkayetu to.’ (Ebelu 10:25) Bantemu ba Yehowa badi bitabuja se: didisangisha edi didi ne mushinga, pa kudisangisha misangu isatu ku lumingu bua dilonga dia mu tshisumbu ne ntendelelu. Kadi, mpuilu wa distrike wa ku tshidimu ne ku tshidimu udi wa pa buende. Bantemu ba Yehowa mbamuindile ne disanka dionso, ne badi batungunuka ne kuakula bualu buende ngondo mivule kunyima kua dienzeka diende. Nansha wewe muikale muena tshitendelelu kayi tshionso, tudi tukubikila ne disanka bua kudisanga kudibu mu mpuilu wabo ne kusanka bua malanda masheme a bena nkristo ne mamanyisha a mu nyuma adi apetesha muoyo. Muena mu tshisumbu tshia Bantemu ba Yehowa wa muaba uwudi musombele, neikale ne disanka dia kukumanyisha muaba ne dîba dienzeke mpuilu eu muaba udi pabuipi nebe.