Bamanyishi ba Bukalenge badi balonda

Wakalonda kuondo kende ka muoyo kalongesha kudi Bible

DAVIDI, mukalenge wa bena Izalele wakalomba diambuluisha kudi Nzambi mu masambila pakambaye ne: “Kadi meme nengende mu muoyo wanyi mutoke. Ô umpikule ne undeje bulenga buebe.” (Musambu wa 26:11) Nzambi wakamuleja bulenga bualu wakalama muoyo mutoke wende. Yehowa wakabenesha Yezu pende bualu wakenza disua dia Tatuende wa mu diulu, ne wakabenesha nsonga kampanda wa bidimu bipite pa 15 ku Colombie, wakalonda kuondo kende ka muoyo kalongesha kudi Bible, ne wakapangadija bua kuenza disua dia Nzambi. Muana wa balume eu udi ulonda ne:

“Pangakatuadija kulonga Bible pamue ne Bantemu ba Yehowa, mvua mulongi wa mu kalasa ka [bena ekleziya] Katolike. Kadi, kuondo kanyi ka muoyo kavua kantatshisha pamvua mbuela mu Misa, nenku, ngakaya kudi mutangidi wa tulasa (yeye muine uvua muakuidi), mufidi wa mibelu ne kudi mutangidi wa kasumbu kanyi, ngakabalomba bua kumpeshabu dianyisha bua tshikadi mbuela mu Misa. Nansha mua kampeshabu dianyisha edi, bamue bantu bungi bushadile pa dikumi bakateta bua kumbuejamu ku bukole. Disuya edi diakadiunda kunyima kua batismo wanyi bu umue wa ku Bantemu ba Yehowa. Tatuanyi wakankanyina bua kungipata ku nzubu bu buobo ne bua kungipata mu kalasa. Uvua upangadija mu lungenyi luende bua meme kubuela mu université ne kupeta pashishe, mudimu wa ku mubidi.

“Muludiki wa tulasa wakafila mibelu misangu ne misangu bua muntu yonso wabenga kutumikila mikenji ya [ekleziya] Katolike. Pakafika tshikondo tshia Misa wa kumpala wa ku tshidimu ne ku tshidimu, ngakasokoma too ne pakajikaye. Pashishe, ngakapesha muludiki wa tulasa (muakuidi awu) broshire wa L’école et les Témoins de Jéhovah, meme e kumuambila ne: bu mundi umue wa ku Bantemu ba Yehowa, tshiena mua kubuela mu Misa to. Wakamba ne: ‘Mbimpe udianjila kukeba kalasa kakuabo.’ Mvua mumanye se: kuipatshibua mu kalasa kuvua kumvuija kuipatshibua ku mbelu kudi tatuanyi. Kadi, ngakasambila Yehowa ne kutungunuka ne kufila bumanyishi kudi balongi nanyi.

“Tshikondo tshia diikisha tshiakafika. Pashishe, kupingana mu kalasa kunyima kua diikisha, kuvua tshiakabidi tshikondo tshia kubuela mu Misa. Muludiki wa kalasa ne bakuidi bakuabo bavua pambelu kumpala kua nzubu wa Mvidi Mukulu, bindile bua kuteleja bedi ba komfesiyo. Mvua ne ditshina dikole. Ngakabuelamu ne kusomba panshi, kadi, kuondo kanyi ka muoyo kakantatshisha bikole. Pakatuadijabu kuimba misambu, ngakadiebeja ne: ‘Ntshinyi tshindi ngenza muaba eu? Yehowa udi Nzambi wanyi. Tshiena ne bua kuikala muena buôwa ne kumuela mâyi ku makasa nansha. Tshiena mua kumulekela nansha kakese. Kakundekela to.’ Ngakasambila bua kupeta dikima. Pashishe, ngakapatuka mu nzubu wa Mvidi Mukulu ne kuimana mu mulongo wa bedi ba komfesiyo. Pangakafika kumpala kua muakuidi- muludiki, ngakamuambila ne: ‘Mulongeshi, tshiena mulue kuela komfesiyo to.’ Yeye e kuamba ne: ‘Ke tshimvua ngela meji.’ Ngakamuambila ne: ndi, ku budisuile, muindile bionso bidi ne bua kungenzekela, bualu, kuondo kanyi ka muoyo kakena kampesha dianyisha bua kubuela mu Misa nansha. Tshiena mua kupetula malu a mu Bible amvua mulonge to.

“Wakandengamena, kufukunya mimuemue ne kuamba ne: ‘Ndi nkuela ka-lumbandi. Nuenu Bantemu buonso, nudi bakanyine ka-lumbandi. Buenu, Nzambi udi pa muaba wa kumpala ne nudi badiakaje bua kutumikila mikenji yende kanuyi nutshina tshidi mua kunuenzekela. Tungunukayi ne kuenza nunku. Nudi nuenza bilenga. Ndi ntekemena bua bena katolike buonso kuikalabu benza anu bu munutu penu nuenza, baleja mitalu ne dinanga bia mushindu’eu bua Nzambi. Bituadijile ku mpindieu, udi muanyishibue bua kubenga kudifila mu midimu yetu ya malu a Nzambi.’ Ndisanka kayipu dimvua nadi! Yehowa wakabenesha dipangadika dianyi dikole dia kutumikila kuondo kanyi ka muoyo kalongesha kudi Bible.

“Dituku diakalonda, muludiki wa tulasa wakambila balongi buonso ne: ‘Bitendelelu bikuabo bidi kumpala kuetu. Bua tshinyi katuenaku bu buobo mu dileja mitalu, dinanga diondoke bua Nzambi ne dijinga dia kumusadila ku mutu kua bionso? Ebu mbualu kampanda budi ne bua kuikala mu mitshima yetu.’

“Ndekelu wa bionso, muludiki eu wa tulasa bakamutuma ku Roma, ne muludiki mupiamupia kavua nansha mumanye ne: tshivua mbuela mu Misa. Tatuanyi wakumbuka ku nzubu, e kunshiya mudikadile bua kukumbaja tshipatshila tshianyi tshia mudimu wa ku dîba ne ku dîba kunyima kua meme mumane kupeta diplome.”

Yehowa wakabenesha nsongalume eu wakalonda kuondo kende ka muoyo kalongesha kudi Bible. Bia muomumue, neabeneshe aba badi bakeba bua kuenza disua diende.​—Nsumuinu 3:5, 6.