NSHAPITA 2
Mmunyi muudi mua kulama kondo ka muoyo kimpe?
‘Nuikale ne muoyo mukese muimpe.’—1 PETELO 3:16.
1, 2. Bua tshinyi kaleji nord kadi ne mushinga? Mmunyi mutudi mua kukafuanyikija ne kondo ka muoyo?
MUENDESHI wa mazuwa udi wendesha mazuwa pa mâyi manene adi ne mavuala a bungi. Muntu kampanda udi wendakana mu tshipela. Muendeshi wa ndeke udi upitshila pamutu pa mavuba adi amueneka bu adi kaayi ne ndekelu. Udiku mumanye lutatu ludi nalu bantu basatu aba anyi? Yonso wa kudibu udi mua kukenga bikole bikalaye kayi ne kaleji nord to.
2 Kaleji nord nkamu katu misangu ya bungi ne kalonda bu dîba, kadi kambuluisha bua kuleja muntu luseke lua nord. Koku kimpe ne padibu benza naku mudimu bimpe ku diambuluisha dia karte ka matunga, kadi mua kupandisha bantu. Mu imue mishindu tudi mua kufuanyikija kaleji nord ne kondo ka muoyo kadi kikale tshintu tshimpe tshidi Yehowa mutupeshe. (Yakobo 1:17) Tuetu katuyi ne kondo ka muoyo, tudi mua kujimina bibi bitambe. Tuetu benze naku mudimu bimpe, kadi mua kutuambuluisha bua kupeta njila muimpe ne kumulonda. Kadi tuanji kumonayi tshidi kondo ka muoyo kumvuija ne mudimu udiku nawu. Pashishe, netukonkonone malu aa: (1) Mushindu utudi mua kulongesha kondo ka muoyo, (2) tshitudi ne bua kunemekela kondo ka muoyo ka bakuabu ne (3) masanka atudi tupeta patudi tulama kondo ka muoyo kimpe.
KONDO KA MUOYO NTSHINYI? KADI NE MUDIMU KAYI?
3. Muaku wa mu tshiena Greke udibu bakudimune “muoyo mukese” udi umvuija tshinyi? Udi uleja bukole kayi bua pa buabu budi nabu bantu?
3 Muaku wa mu tshiena Greke udibu bakudimune mu Bible ne: “muoyo mukese” anyi kondo ka muoyo udi umvuija “kudimanya.” Tuetu tudi bashilangane ne bifukibua bikuabu bionso bia pa buloba bualu Nzambi mmutupeshe bukokeshi bua tuetu kudimanya. Tudi mua kudikonkonona ne kudilumbuluisha mu mushindu kampanda. Kondo ka muoyo kadi anu bu mulumbuluishi udi munda muetu, kadi kakonkonona bienzedi bietu, meji etu ne mapangadika etu. Kadi mua kutuambuluisha bua kuangata dipangadika dimpe anyi kutudimuija bua katuangatshi dipangadika dibi. Pashishe kadi mua kutukolesha ku muoyo patudi tuangata dipangadika dimpe anyi kutupisha patudi bangate dipangadika dibi.
4, 5. (a) Ntshinyi tshidi tshituleja ne: Adama ne Eva bavua ne kondo ka muoyo? Ntshinyi tshiakabafikila pakashipabu mukenji wa Nzambi? (b) Fila bilejilu bia bantu ba kale ba lulamatu bavua kondo kabu ka muoyo kambuluishe.
4 Nzambi uvua mupeshe bantu kondo ka muoyo anu pakabafukaye. Adama ne Eva bakaleja muvuabu ne kondo ka muoyo. Bundu buvuabu bumvue bobu bamane kuenza mpekatu budi buleja ne: bavua ne kondo ka muoyo. (Genese 3:7, 8) Diakabi, kondo kabu ka muoyo kakavua mua kubambuluisha panyima pa bobu bamane kuenza bubi to. Bavua bashipe mukenji wa Nzambi ku bukole. Nunku bakasungula bua kulua bantomboji anyi baluishi ba Yehowa Nzambi. Bu muvuabu bantu bapuangane, bavua bamanye tshivuabu benze, ne kabavua kabidi ne mushindu wa kupingana tshianyima to.
5 Kadi bantu ba bungi bapange bupuangane mbashilangane ne Adama ne Eva bualu badi batumikila kondo kabu ka muoyo. Tshilejilu, Yobo wakamba ne: “Nennanukile kukuata buakane buanyi ne tshiena mbulekela nansha. Mutshima wanyi kawena umpisha bua dituku dimue dia ku matuku anyi onso.”a (Yobo 27:6) Bushuwa, Yobo uvua ne kondo ka muoyo kimpe. Uvua ukateleja bimpe ne witaba bua kamulombole mu bienzedi biende ne mapangadika ende. Ke bualu kayi uvua mua kuamba ne disanka dionso ne: kondo kende ka muoyo kakavua kamupisha, kamufikisha ku dinyingalala anyi ku diumvua bundu to. Mona dishilangana didi pankatshi pa Yobo ne Davidi. Dituku dikuabu pavua Davidi kayi munemeke Shaula mukalenge muela manyi wa Yehowa, “mutshima wa Davidi wakanyingalala” anyi kuzakala bikole. (1 Samuele 24:5) Bu muvua kondo ka muoyo ka Davidi kamufikishe ku dizakala, biakamuambuluisha bua kubenga kuenzulula bualu bua muomumue pashishe.
6. Ntshinyi tshidi tshileja ne: bantu bonso batu ne kondo ka muoyo?
6 Anu batendeledi ba Yehowa ke badi ne kondo ka muoyo anyi? Mupostolo Paulo wakamba ku bukole bua nyuma muimpe ne: ‘Bualu bua penza bisamba bia bende bidi kabiyi ne mikenji bilele bidi mikenji miambe, bobu kabayi ne mikenji, badi badielela mikenji. Badi baleja mudimu wa mikenji mifunda mu mitshima yabu, muoyo mukese wabu udi umanyishangana nayi ne meji abu adi abapisha anyi ababingisha.’ (Lomo 2:14, 15) Imue misangu, nansha bantu batu kabayi bamanye mikenji ya Yehowa batu bumvua kondo kabu ka muoyo kabasaka bua kuenza malu adi umvuangana ne mikenji yende.
7. Bua tshinyi kondo ka muoyo kadi mua kunyanguka imue misangu?
7 Kondo ka muoyo kadi mua kunyanguka imue misangu. Bua tshinyi? Tupinganayi ku tshilejilu tshietu tshia kaleji nord. Bobu bakateke pabuipi ne tshiamu kampanda tshia nzembu, tshidi mua kukoka kalonda kadi munda muaku ne kukapangisha bua kuleja luseke ludi nord. Bia muomumue, kondo ketu ka muoyo kadi mua kutupambuisha tuetu bakanyange ne majinga mabi a mutshima wetu. Tuetu bakuate naku mudimu katuyi tulonda tshidi Dîyi dia Nzambi diamba, katuakumanya mua kujingulula tshidi tshimpe ne tshidi tshibi mu malu a mushinga to. Bua kondo ketu ka muoyo kutuambuluishaku, bidi bikengela nyuma wa Yehowa atulombole. Paulo wakafunda ne: ‘Muoyo mukese wanyi udi umanyishangana nanyi mu nyuma muimpe.’ (Lomo 9:1) Kadi mmunyi mutudi mua kumanya ne: kondo ketu ka muoyo kadi kapetangana ne nyuma muimpe wa Yehowa? Tudi ne bua kukalongesha.
MUSHINDU WA KULONGESHA KONDO KA MUOYO
8. (a) Mmunyi mudi mutshima mua kunyanga kondo ka muoyo? Ntshinyi tshitudi ne bua kutabalela bikole mu mapangadika etu? (b) Bua tshinyi muena Kristo kena ne bua kuikala anu ne kondo ka muoyo kimpe nkayaku? (Bala diumvuija didi kuinshi kua dibeji.)
8 Bidi bimueneka ne: bamue bantu batu badikonkonona ne bangata dipangadika bilondeshile tshidi tshibaluila mu lungenyi. Pashishe badi mua kuamba ne: “Ke tshidi kondo kanyi ka muoyo kangambile bua kuenza.” Majinga a mutshima atu makole ne adi mua kunyanga too ne kondo ka muoyo. Bible udi wamba ne: ‘Mutshima udi upita bintu bionso kudinga muntu, ne udi utamba kunyanguka; mmuntu kayi udi mua kuumanya?’ (Yelemiya 17:9) Ke bualu kayi katuena ne bua kuteka malu adi mutshima wetu ujinga pa muaba wa kumpala to. Kadi tudi ne bua kuanji kukeba bua kuenza tshidi mua kusankisha Yehowa Nzambi.b
9. Ditshina dia Nzambi ntshinyi? Ntshinyi tshididi dienzela kondo ketu ka muoyo?
9 Patudi tuangata mapangadika bilondeshile kondo ketu ka muoyo kalongesha ne Bible, tudi tuleja mutudi tutshina Nzambi pamutu pa kulonda majinga etu. Tuangate tshilejilu tshia Nehemiya ngovena uvua mulamate Nzambi. Nehemiya uvua ne bukokeshi bua kuambila bena mu Yelushalema bua kumufuta makuta a bitadi. Kadi kakenza nanku to. Bua tshinyi? Wakamona ne: kuenza nanku nkukengesha bantu ba Nzambi ne Yehowa kavua mua kusanka bua bualu abu to. Wakamba ne: “Meme tshiakenza nunku bualu bua ditshina dia Nzambi.” (Nehemiya 5:15) Mbimpe kutshina Nzambi ne muoyo mujima anyi kudienzeja bikole bua kubenga kunyingalaja Tatu wetu wa mu diulu. Ditshina edi neditusake bua kukeba mibelu ya mu Dîyi dia Nzambi patudi basue kuangata mapangadika.
10, 11. Ntshinyi tshidi Bible wamba bua dinua dia maluvu makole? Ntshinyi tshitudi ne bua kuenza bua Nzambi atulombole mu bualu ebu?
10 Tshilejilu, tuakule bua maluvu makole. Ba bungi ba kutudi batu badiebeja padibu kumpala kua maluvu muaba udi bantu ba bungi ne: Ndi ne bua kunua anyi tshiena ne bua kunua? Tshia kumpala, tudi ne bua kulongesha kondo ketu ka muoyo. Ntshinyi tshidi Bible wamba bua bualu ebu? Bushuwa, Bible kena ukandika kunua maluvu pa nnuinu to. Kadi udi uleja ne: Yehowa mmuenze bimpe padiye mutupeshe mvinyo anyi maluvu. (Musambu 104:14, 15) Tshidi Bible ukandika ndikuatshika dia maluvu ne bisankasanka. (Luka 21:34; Lomo 13:13) Bible udi uleja ne: dikuatshika dia maluvu mbubi bunene anu bu mudi kuenda masandi.c—1 Kolinto 6:9, 10.
11 Mikenji ya mushindu eu ke idi ilongesha kondo ka muoyo ka muena Kristo. Nunku patudi tuangata dipangadika dia kunua maluvu mu fete kampanda, tudi ne bua kudiebeja ne: ‘Mfete wa mushindu kayi udibu balongolole? Malu adiku mua kunyangukamu bualu bantu ki mbakokeshe bua kudikanda anyi? Ntu ne tshibidilu kayi bua maluvu? Ntu muanange bikole, tshiyi ngumvua bimpe pandi tshiyi muanue anyi? Ntuku nganua pantu mubike bibi bua kusanguluka anyi? Ntuku nkokesha bua kunua anu pa nnuinu tshiyi nkuatshika anyi?’ Patudi tuela meji ku mêyi a mu Bible ne nkonko idiwu mua kujula, mbimpe tulombe Yehowa bua atulombole. (Musambu 139:23, 24) Patudi tuenza nunku, tudi tumulomba bua atulombole ne nyuma wende. Tudi kabidi tulongesha kondo ketu ka muoyo bua kikale kumvuangana ne mêyi a Nzambi. Kadi kudi bualu bukuabu butudi katuyi mua kupua muoyo patudi tuangata mapangadika.
BUA TSHINYI TUDI NE BUA KUNEMEKA KONDO KA MUOYO KA BAKUABU?
12, 13. Ngamue malu kayi adi enza bua kondo ka muoyo ka muena Kristo kashilangane ne ka mukuabu? Ntshinyi tshitudi ne bua kuenza bua bualu ebu?
12 Bidi mua kutukemesha imue misangu bua mushindu udi kondo ka muoyo ka bamue bena Kristo kashilangane ne ka bakuabu. Muena Kristo udi mua kumona tshilele kampanda tshibi kadi mukuabu utshimona tshimpe. Tshilejilu, muena Kristo udi mua kumona ne: kunua maluvu ne balunda bende dilolo kampanda bua kusanka pamue ki nkubi to, kadi mukuabu pende umona bualu abu bubi. Bua tshinyi badi bamona malu mu mishindu mishilangane? Mmunyi mutudi mua kuangata mapangadika bilondeshile dishilangana edi?
13 Bantu mbashilangane bua malu a bungi. Tudi bakole mu mishindu mishilangane. Tshilejilu, bamue ba kutudi badi baluangana ne butekete kampanda buvuabu nabu kale, ne pamuapa ki mbuanji anu kujika to. (1 Bakelenge 8:38, 39) Kadi pikalabi ne: butekete bua muntu au mbua maluvu, udi mua kuikala kayi nansha musue kumvua batela bualu bua maluvu to. Muntu wa mushindu eu yeye mulue kuebe, kondo kende ka muoyo kadi mua kumusaka bua kubenga kunua maluvu. Bidi mua kukutonda anyi? Neusuminyine anu bua kunuaye maluvu anyi? Tòo. Nansha wewe mumanye tshidiye ubengela anyi kuyi mutshimanye, dinanga dia muanenu au didi ne bua kukusaka bua kunemeka dipangadika diende.
14, 15. Mmu tshilumbu kayi muvua bena Kristo ba kumpala ne tondo tua mioyo tushilangane? Paulo wakabambila bua kuenza tshinyi?
14 Mupostolo Paulo uvua mumone ne: bena Kristo ba mu tshikondo tshiende bavua ne tondo tua mioyo tushilangane. Bamue bena Kristo bavua bumvua bibi bua bimue biakudia bivuabu balambula mpingu. (1 Kolinto 10:25) Kondo ka muoyo ka Paulo kakavua kabenga biakudia bia mushindu eu bivuabu bapanyisha mu tshisalu to. Buende yeye, mpingu kayivua ne mushinga to, ne kayivua ne bua kuikala ne biakudia to, bualu Yehowa ke mufuki wabi ne muenabi. Kadi Paulo uvua mumanye ne: bantu bonso kabavua ne lungenyi lua muomumue ne luende mu bualu abu to. Bamue bavua mua kuikala batendelela mpingu bikole kumpala kua kuluabu bena Kristo. Buabu bobu, tshintu tshionso tshivua tshitangila bualu bua mpingu tshivua tshibi. Mmunyi muakakosa Paulo tshilumbu atshi?
15 Paulo wakamba ne: ‘Butudi nabu tuetu bantu bakole, mbua kutuala matekete a badi batekete, ki mbua kudisankisha nkayetu. Bua Kristo kabidi kakadisankisha.’ (Lomo 15:1, 3) Paulo wakamona ne: tudi ne bua kuteka majinga a bana betu kumpala kua etu anu bu muvua Kristo muenze. Anu bua tshiotshi tshilumbu atshi, Paulo wakalua kuamba ne: kena mua kudia munyinyi anyi kuenza bualu buonso budi mua kulenduisha muntu udi Kristo mufuile.—1 Kolinto 8:13; 10:23, 24, 31-33.
16. Bua tshinyi bantu badi kondo kabu ka muoyo kabakandika bua kuenza bualu kampanda kabena ne bua kulumbuluisha badi ne kondo ka muoyo kashilangane ne kabu?
16 Kadi bantu badi kondo kabu ka muoyo kabakandika bua kuenza bualu kampanda, kabena ne bua kulumbuluisha bena Kristo nabu mu malu adi atangila kondo ka muoyo, bakeba bua bantu bonso benze anu mudibu bobu basue to. (Lomo 14:10) Kondo ketu ka muoyo kadi ne bua kutulumbuluisha anu tuetu benaku, katuena ne bua kulumbuluisha naku bakuabu to. Tuvuluke mêyi a Yezu aa: ‘Kanulumbuludi malu adi munda mua bantu bakuabu, nunku bobu kabena balumbulula malu adi munda muenu.’ (Matayo 7:1) Bena mu tshisumbu bonso kabena ne bua kukokangana bua malu adi atangila kondo ka muoyo to. Kadi badi ne bua kudienzeja bua kukeba dinanga ne buobumue, kukoleshangana pamutu pa kutatshishangana.—Lomo 14:19.
MASANKA ATUDI TUPETA PATUDI TULAMA KONDO KA MUOYO KIMPE
17. Ntshinyi tshidi tshienzekela kondo ka muoyo ka bantu ba bungi lelu?
17 Mupostolo Petelo wakafunda ne: “Nuikale ne muoyo mukese muimpe.” (1 Petelo 3:16) Kondo ka muoyo kimpe ku mêsu kua Yehowa Nzambi ndibenesha dinene ditambe. Kakena bu ka bantu ba bungi lelu eu to. Paulo wakakula bua bantu ‘badi boshibua mu muoyo mukese wabu ne tshiamu tshipia ne kadilu.’ (1 Timote 4:2) Padi tshiamu tshia kapia tshiosha mubidi, tshidi tshivuija muaba au mupape, kawuyi umvua kabidi mudilu to. Bantu ba bungi badi ne kondo ka muoyo kenze bu kakadi kafue, mbuena kuamba ne: kakatshiyi kabadimuija bua malu mabi anyi kaabenga, peshi kakatshiyi kabafikisha ku diumvua bundu anyi ku dinyingalala padibu benza bibi. Bantu ba bungi lelu kabatshitu kabidi badipisha to.
18, 19. (a) Kudipisha ne kumvua bundu kudi ne dikuatshisha kayi? (b) Tshia kuenza ntshinyi padi kondo ka muoyo katungunuka ne kutupisha bua bubi butuvua benze ne bamane kunyingalala?
18 Mu bulelela, patudi tudiumvua bapile, mbuena kuamba ne: kondo ketu ka muoyo kadi katuambila mutudi benze bualu bubi. Padi didipisha edi ditufikisha ku dinyingalala, Nzambi udi mua kutufuila luse nansha tuetu benze bubi bunene. Tshilejilu, mukalenge Davidi wakadipisha bua malu mabi avuaye muenze, ne Nzambi wakamufuila luse bualu wakanyingalala ne muoyo mujima. Dikina dia bualu bubi buvuaye muenze ne dipangadika dia kutumikila kabidi mikenji ya Yehowa diakamufikisha ku didimuena mudi Yehowa ‘muimpe, ne mudi mutshima wende musue kubuikidila bantu mibi yabu.’ (Musambu 51:1-19; 86:5) Kadi netuenze tshinyi bituikala anu tudipisha ne tumvua bundu nansha tuetu bamane kunyingalala bua bubi buetu?
19 Misangu mikuabu kondo ka muoyo katu kashala kalumbuluisha muntu udi muenze bubi, katungunuka ne kumupisha kunyima kua matuku a bungi nansha padibi kabitshiyi ne mushinga. Dîba adi, tudi ne bua kujadikila muoyo wetu udi utupisha ne: Yehowa ‘mmupite mitshima yetu bunene’ ne mmumanye malu onso adimu. Tudi ne bua kueyemena dinanga diende ne kuitaba ne: mmutubuikidile anu mututu tuambila bakuabu bua kuenza. (1 Yone 3:19, 20) Kadi tumanye ne: kondo ka muoyo kimpe kadi kapetesha ditalala dia mu mutshima ne disanka ditudi katuyi mua kupeta pa buloba apa to. Bantu ba bungi bavua benze bubi bunene mbapete disulakana ne lelu eu badi benzela Yehowa Nzambi mudimu ne kondo ka muoyo kimpe.—1 Kolinto 6:11.
20, 21. (a) Mbapatule mukanda eu bua tshinyi? (b) Mbudikadidi kayi butudi tuetu bena Kristo nabu? Mmunyi mutudi ne bua kuenza nabu mudimu?
20 Mbapatule mukanda eu bua kukuambuluisha bua wikale ne disanka ne ulame kondo ka muoyo kimpe mu matuku adi mashadile bulongolodi bua Satana ebu. Kawena wakula bua mikenji yonso ne mêyi onso a mu Bible audi mua kuelela meji ne kutumikila mu malu onso audi utuilangana nawu ku dituku ne ku dituku to. Pashishe kawena uleja malu onso adi atangila kondo ka muoyo patoke to. Tshipatshila tshia mukanda eu ntshia kukuambuluisha bua kulongesha kondo kebe ka muoyo ne kumanya mua kutumikila Dîyi dia Nzambi dituku dionso. ‘Mikenji ya Kristo’ mmishilangane ne mikenji ya Mose bualu ya Kristo idi ilomba bantu bua kutumikila kondo kabu ka muoyo bikole pamutu pa kulonda mikenji mifunda. (Galatia 6:2) Yehowa mmupeshe bena Kristo budikadidi bua bungi. Dîyi diende didi dituvuluija bua katuangatshi budikadidi ebu bu “tshibuikilu tshia malu mabi.” (1 Petelo 2:16) Kadi budikadidi ebu budi butupetesha mushindu wa kuleja mutudi banange Yehowa.
21 Kulonga ne kusambila bua kumona mua kutumikila mêyi a mu Bible ne kukumbaja mapangadika ebe nebikuambuluishe bua kutungunuka ne kuenza tshiuvua mutuadije kuenza pawakamanya Yehowa bua musangu wa kumpala. Neulongeshe ‘meji’ ebe paudi ‘uibidija.’ (Ebelu 5:14) Kondo kebe ka muoyo kaudi mulongeshe ne Bible nekakuambuluishe mu nsombelu webe wa dituku dionso. Anu mutu kaleji nord kambuluisha bantu badi benza ngendu, kondo kebe ka muoyo nekakuambuluishe bua kuangata mapangadika adi asankisha Tatu webe wa mu diulu. Eu ke mushindu muimpe uudi mua kudilama mu dinanga dia Nzambi.
[Mêyi adi kuinshi]
a Mu Mifundu ya tshiena Ebelu kabena batelamu muaku “kondo ka muoyo” to. Kadi badi bakulamu bua kondo ka muoyo mu bilejilu bu mudi tshitudi batele etshi. Misangu ya bungi padibu bakula bua “muoyo” anyi “mutshima,” badi bakula bua tshidi muntu munda muende menemene. Mu bilejilu bu etshi muoyo anyi mutshima udi uleja kondo ka muoyo. Muaku wa mu tshiena Greke udibu bakudimune “muoyo mukese” anyi kondo ka muoyo udi usangibua misangu mitue ku 30 mu Mifundu ya tshiena Greke.
b Bible udi uleja ne: kuikala ne kondo ka muoyo kimpe nkayaku ki nkukumbane to. Tshilejilu Paulo wakamba ne: ‘Tshiena mumvue munda tshindi mua kudipisha natshi, kadi tshiena mbingishibua bua bualu ebu; kadi udi undumbuluisha udi Mukalenge.’ (1 Kolinto 4:4) Nansha bantu badi bakengesha bena Kristo (anu bu muvua Paulo wenza pende ku kale) badi mua kuikala ne kondo ka muoyo kakayi kabalumbuluisha to, bualu badi bela meji ne: Nzambi udi wanyisha malu adibu benza. Mbimpe kondo ketu ka muoyo kikale kimpe kutudi tuetu ne ku mêsu kua Nzambi.—Bienzedi 23:1; 2 Timote 1:3.
c Tumanye ne: baminganga ba bungi badi bamba ne: bua ba kanuayi, kunua pa nnuinu ki nkunua ndambu to, buabu bobu nkubenga kunua nansha tukese.
NEWANDAMUNE MUNYI?
▪ Kumanya ne: Yehowa udi umona malu atudi tuenza dîba dionso kudi kuenzela kondo ketu ka muoyo tshinyi?—Ebelu 4:13.
▪ Mmunyi muvua kondo ka muoyo ka Yosefe kamuambuluishe bua kenji bubi?—Genese 39:1, 2, 7-12.
▪ Bua tshinyi kondo ka muoyo kimpe kadi ne mushinga bua kusemena kudi Yehowa?—Ebelu 10:22.
▪ Bua tshinyi tudi ne bua kunemeka too ne kondo ka muoyo ka bantu badi kabayi bena Kristo?—2 Kolinto 4:1, 2.
[Tshimfuanyi mu dibeji 21]
Kondo ka muoyo kalongesha ne Bible kadi mua kukuambuluisha bua kuangata dipangadika dia kunua maluvu makole anyi kubenga kuanua
[Tshimfuanyi mu dibeji 22]
Kondo ka muoyo kimpe kadi mua kutulombola dituku dionso ne kutupetesha disanka ne ditalala dia mu mutshima