NSHAPITA WA 1
“Edi ndinanga dia Nzambi”
‘Edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’—1 YONE 5:3.
1, 2. Ntshinyi tshidi tshikusaka bua kunanga Yehowa Nzambi?
UDI munange Yehowa Nzambi anyi? Biwikale ukadi mudilambule kudiye, newandamune ne: Eyowa. Mbipepele bua tuetu kunanga Yehowa. Tudi tumunanga bualu yeye ke wakadianjila kutunanga. Ke tshidi Bible ujadika padiye wamba ne: “Tuetu tudi ne dinanga, bualu bua [Yehowa] wakadianjila kutunanga.”—1 Yone 4:19.
2 Yehowa mmuenze malu adi aleja mudiye mutunange. Mmutupeshe buloba buimpe butambe bua tuetu kusombapu. Udi utukumbajila majinga etu a ku mubidi. (Matayo 5:43-48) Kadi udi nangananga utuambuluisha bua kumutendelela bimpe. Mmutupeshe Dîyi diende. Pashishe udi utuambila bua kumusambila ne utujadikila ne: neatuteleje ne neatupeshe nyuma muimpe bua kutuambuluishaye. (Musambu 65:2; Luka 11:13) Kadi bualu bua mushinga mukole, wakatuma Muanende munanga bua kutusungilaye ku mpekatu ne ku lufu. Malu aa adi aleja ne: Yehowa mmutunange bikole be!—Yone 3:16; Lomo 5:8.
3. (a) Ntshinyi tshitudi ne bua kuenza bua kushala mu dinanga dia Nzambi? (b) Ndukonko kayi lua mushinga lutudi ne bua kudiela? Diandamuna dialu didi penyi?
3 Yehowa mmusue bua tushale mu dinanga diende bua kashidi. Kadi tuetu ke badi ne bua kusungula bua kushalamu anyi kubenga kushalamu. Dîyi diende didi diamba ne: ‘Nudilame mu dinanga dia Nzambi too ne ku muoyo wa tshiendelele.’ (Yuda 21) Padibu bamba ne: “Nudilame,” bidi biumvuija ne: bua kushala mu dinanga dia Nzambi, tudi ne bua kuenza bualu kampanda. Tudi ne bua kuleja mutudi petu bamunange mu mishindu misunguluke. Ke bualu kayi, tudi ne bua kudiela lukonko lua mushinga elu: ‘Ntshinyi tshindi ne bua kuenza bua kuleja mundi munange Nzambi?’ Diandamuna dia lukonko elu didi mu mêyi a mupostolo Yone a ne: ‘Edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ (1 Yone 5:3) Mbimpe tukebe bua kumanya tshidi mêyi aa umvuija bualu tudi basue kuleja Nzambi mutudi bamunange bikole.
“EDI NDINANGA DIA NZAMBI”
4, 5. (a) “Dinanga dia Nzambi” didibu bakuila muaba eu ndinanga kayi? (b) Umvuija muwakatuadija kunanga Nzambi.
4 Ntshinyi tshivua mupostolo Yone musue kuamba pakakulaye bua “dinanga dia Nzambi”? Dinanga didibu bakuila muaba eu ndinanga ditudi banange Nzambi, ki ndidiye mutunange to. Udiku muvuluke dîba diwakatuadija kunanga Yehowa anyi?
5 Anji vulukabi musangu wa kumpala uwakalonga malu malelela adi atangila Yehowa ne tshidiye mulongolole bua kuenza; vuluka kabidi muwakatuadija kupeta ditabuja. Wakafika ku diumvua ne: nansha muuvua muledibue mu bubi, Yehowa mmukupeteshe mushindu wa wewe kupeta bupuangane buvua Adama mujimije ne kupeta muoyo wa tshiendelele ku diambuluisha dia Kristo. (Matayo 20:28; Lomo 5:12, 18) Wakafika ku diumvua ne: Yehowa mmukunange bikole bualu wakitaba bua Muanende kuluaye kukufuila. Nunku muoyo wakakusaka bua kunanga Nzambi bualu mmuleje mudiye mukunange bikole.—1 Yone 4:9, 10.
6. Mmunyi mutudi mua kuleja dinanga dilelela? Dinanga dia Nzambi divua dikusake bua kuenza tshinyi?
6 Kadi tshiuvua umvua atshi tshivua anu ntuadijilu wa dinanga diebe dilelela dia Yehowa. Kunanga muntu kakuena kumvuija anu kudiumvua ne: tudi bamunange to. Kunanga Yehowa kakuena kumvuija anu kuamba patupu ne: “Ndi munange Yehowa” to. Anu mutubi bua ditabuja, dinanga dilelela didi ne bua kumuenekela ku bienzedi. (Yakobo 2:26) Tudi tuleja mutudi banange muntu nangananga patudi tumuenzela malu adi amusankisha. Nunku pawakananga Yehowa Tatuebe wa mu diulu bikole, muoyo wakakusaka bua kuenza malu adi amusankisha. Ukadi mutambule anyi? Bikalabi nanku, dinanga dikole ne lulamatu kudi Yehowa bivua bikusake bua kuangata dipangadika dia mushinga mukole. Wakadilambula kudi Yehowa bua kuenza disua diende ne kutambula bua kuleja didilambula edi patoke. (Lomo 14:7, 8) Bua kukumbaja mutshipu eu, udi ne bua kuenza tshidi mupostolo Yone wamba pashishe.
‘TUTUMIKILE MIKENJI YENDE’
7. Tela imue mikenji ya Nzambi. Kuyitumikila kudi kumvuija tshinyi?
7 Yone udi wamba ne: tudi tuleja mutudi banange Nzambi patudi ‘tutumikila mikenji yende.’ Mikenji ya Nzambi mmikenji kayi? Yehowa mmutuelele mikenji misunguluke mu Dîyi diende. Tshilejilu, udi utukandika bua kukuatshika maluvu, kuenda masandi, kutendelela mpingu, kuiba ne kushima. (1 Kolinto 5:11; 6:18; 10:14; Efeso 4:28; Kolosai 3:9) Kutumikila mikenji ya Nzambi kudi kumvuija kuenza malu adi apetangana ne tshidi Bible wamba.
8, 9. Mmunyi mutudi mua kumanya tshidi mua kusankisha Yehowa nansha mu malu adi Bible kayi utuleja tshia kuenza patoke? Fila tshilejilu.
8 Kadi bua kusankisha Yehowa katuena ne bua kutumikila anu mikenji misunguluke idiye mutuelele to. Yehowa ki mmutuelele mikenji bua kalu ne kalu konso katudi ne bua kuenza dituku dionso nansha. Nunku tudi tupetangana ne malu dituku dionso edi adi Bible kayi utuleja patoke tshia kuenza to. Dîba adi, mmunyi mutudi mua kumanya tshidi mua kusankisha Yehowa? Mu Bible mudi malu adi aleja mushindu udi Nzambi wela meji. Patudi tulonga Bible, tudi tumanya malu adi Yehowa musue ne adiye mukine. (Musambu 97:10; Nsumuinu 6:16-19) Tudi tufika ku dijingulula meji ne bienzedi bidiye wanyisha. Patudi tumanya Yehowa bikole, tumanya kabidi njila yende bimpe, netulekele meji ende atulombola bua kuangata mapangadika mimpe ne kuenza malu makane. Dîba adi nansha mu malu adi Bible kayi utuleja patoke tshia kuenza, netujingulule ‘mudi disua dia Yehowa.’—Efeso 5:17.
9 Tshilejilu, kakuena mukenji musunguluke mu Bible udi utukandika bua kutangila filme ya malu a mvita ne a dishipangana anyi ya malu a tshiendenda ku televizion to. Nansha nanku, katuena ne bua kuatangila to. Tudi bamanye mudi Yehowa uamona. Bible udi utuambila ne: “Muoyo [wa Yehowa] mmubenge munangi wa mvita” anyi tshikisu. (Musambu 11:5, MMM) Udi wamba kabidi ne: “Nzambi nealumbuluishe bena masandi bajike ne bena masandi babake.” (Ebelu 13:4) Patudi tuela meji pa mêyi aa, tudi tujingulula bimpe tshidi disua dia Yehowa. Nunku, netubenge kujikija lutetuku pa kutangila bintu bionso bidi Nzambi wetu mukine. Tudi bamanye ne: Yehowa udi usanka patudi tubenga mishindu ya kujikija lutetuku idi mua kunyanga bikadilu bietu idi bena panu bamona bu idi kayiyi mua kuenzela bantu bibi.a
10, 11. Bua tshinyi tudi basungule bua kutumikila Yehowa? Ditumikila dietu didi ne bua kuikala dia mushindu kayi?
10 Ntshinyi tshidi tshitamba kutusaka bua kutumikila mikenji ya Nzambi? Bua tshinyi tudi basue kuenza malu adi apetangana ne disua diende dituku dionso? Katuena tutumikila Nzambi anu bua katunyoki anyi bua kuepuka ntatu idi ifikila bantu badi kabayi benza disua diende to. (Galatia 6:7) Kadi tudi tumona ditumikila Yehowa bu mushindu muimpe wa kuleja mutudi bamunange. Tudi basue bua Yehowa atuanyishe anu bu mutu muana musue bua tatuende amuanyishe. (Musambu 5:12) Yeye ke Tatu wetu, ne tudi bamunange. Kakuena tshintu tshidi mua kutupetesha disanka dipite ditudi tumvua patudi tumanya ne: tudi tuenza malu adi ‘atupetesha diakalengele kudi Yehowa.’—Nsumuinu 12:2.
11 Nunku katuena tutumikila Nzambi bu bantu benzeja ku bukole anyi bua kupeta malu kampanda to, ne katuena ne bua kusungula mikenji itudi ne bua kutumikila.b Katuena ne bua kusungula bua kutumikila anu mikenji idi itusankisha, idi kayiyi mitukolele anyi idi kayiyi mua kutukebela ntatu to. Kadi tudi ‘tutumikila mu mitshima.’ (Lomo 6:17) Dîba adi netuambe petu anu bu mufundi kampanda wa Musambu wa mu Bible ne: “Nendisankishe mu mikenji yebe, indi nnanga.” (Musambu 119:47) Bushuwa, tudi banange kutumikila Yehowa. Tudi bamanye ne: mmukumbane bua tuetu kumutumikila ne muoyo mujima ne ke tshidiye utulomba. (Dutelonome 12:32) Tudi basue bua Yehowa ambe bua bualu buetu tshidi Dîyi diende diamba bua Noa. Didi diamba bua muntu eu wa lulamatu uvua munange Nzambi ne mumutumikile munkatshi mua bidimu bia bungi ne: “Noa wakenza nunku; wakenza mianda yonso yakamuambila Nzambi.”—Genese 6:22.
12. Ndîba kayi didi ditumikila dietu disankisha mutshima wa Yehowa?
12 Ntshinyi tshidi Yehowa umvua patudi tumutumikila ne muoyo mujima? Dîyi diende didi diamba ne: tudi ‘tusankisha mutshima’ wende. (Nsumuinu 27:11) Ditumikila dietu didiku bushuwa mua kusankisha mutshima wa Mukalenge wa diulu ne buloba anyi? Eyowa; ne Yehowa udi ne tshidi tshimusaka bua kusanka. Yehowa mmutufuke ne bukokeshi bua kusungula tshia kuenza. Mbuena kuamba ne: tudi ne budikadidi bua kusungula bua kutumikila Nzambi anyi kubenga kumutumikila. (Dutelonome 30:15, 16, 19, 20) Patudi tuitaba bua kutumikila Yehowa Tatu wetu wa mu diulu ne patudi tumutumikila bualu tudi bamunange ne muoyo mujima, bidi bimuenza disanka. (Nsumuinu 11:20) Patudi tuenza nanku, tudi tuangata dipangadika dimpe ditambe.
‘MIKENJI YENDE KAYENA ITUNEMENA BUJITU’
13, 14. Bua tshinyi tudi mua kuamba ne: ‘mikenji ya Nzambi kayena itunemena bujitu’? Fila tshilejilu.
13 Mupostolo Yone udi utukolesha ku muoyo bua malu adi Yehowa utulomba padiye wamba ne: ‘Mikenji yende kayena itunemena bujitu.’ Muaku wa mu tshiena Greke udibu bakudimune “bujitu” mu 1 Yone 5:3 udi umvuija “kupita dikanda.”c Yehowa kena utulomba malu adi matupite makanda anyi adi mua kututshiokesha to. Kena utuelela mikenji itudi tuetu bantu bena mapanga katuyi mua kukokesha bua kutumikila to.
14 Tuangate tshilejilu bua kumvua bualu ebu bimpe. Mulunda webe udi ukulomba bua umuambuluishe bua kumuangala. Udi ne bintu bia bungi bia kuambula. Bimue bia kudibi mbipepele ne muntu umue udi mua kubiambula kakuyi bualu, kadi bikuabu bidi ne bujitu bua bungi ne bikengela anu bantu babidi bua kubiambula. Mulunda webe au udi ukusunguila bintu bia wewe kumuambuisha. Udiku mua kukuambila bua kuambula bintu bidi ne bujitu bua bungi biudi kuyi mua kukokesha anyi? Tòo. Kena mua kuenza nanku to, bualu mmumanye ne: udi mua kudienzela bibi paudi uteta bua kubiambula. Bia muomumue, Nzambi wetu wa dinanga kena mua kutuelela mikenji idi mua kutukolela bua kuyitumikila to. (Dutelonome 30:11-14) Kena mua kutulomba bua kuambula bujitu budi butupite dikanda to. Yehowa mmumanye malu atudi mua kukokesha bua kuenza bualu ‘mmumanye buntu buetu, udi uvuluka ne: tudi dimfuenkenya.’—Musambu 103:14.
15. Bua tshinyi tudi bajadike ne: mikenji idi Yehowa utuelela mbua diakalenga dietu?
15 Mikenji ya Yehowa ki mmipite bujitu to, kadi idi itupetesha diakalenga. (Yeshaya 48:17) Ke bualu kayi Mose wakambila bena Isalele ne: ‘Yehowa wakatuelela mikenji eyi, bua tuetu tutshine Yehowa Nzambi wetu, bua yeye atuenzele bimpe matuku onso, bua tuetu tuikale ne muoyo utudi nawu lelu eu.’ (Dutelonome 6:24) Tudi petu ne bua kuikala bashindike ne: Yehowa mmutupeshe mikenji yende bualu mmutunange ne mmusue bua tuikale ne diakalenga bua kashidi. Bidi nanku bualu Yehowa kena mua kutulomba bua kuenza bualu budi mua kutuenzela bibi to. Yehowa udi Nzambi udi ne meji adi kaayi ne ndekelu. (Lomo 11:33) Mmumanye tshidi mua kutupetesha diakalenga. Yehowa udi kabidi dinanga. (1 Yone 4:8) Bu mudi dinanga dikale ngikadilu wende munene, malu onso adiye wamba ne adiye wenza adi aleja anu dinanga. Diodi ke didi dimusaka bua kuelela bantu bende mikenji yonso idiye mubelele.
16. Bua tshinyi tudi anu mua kutumikila Nzambi nansha mudi malu mabi a pa buloba ebu ne mibidi yetu bitusaka bua kushipa mikenji yende?
16 Kabiena biumvuija ne: kutumikila Nzambi mbualu butekete to. Tudi ne bua kukandamena malu mabi a pa buloba ebu budi ku “bukokeshi bua Mubi.” (1 Yone 5:19, MML) Tudi kabidi ne bua kuluangana ne majinga a mubidi wetu mupange bupuangane utu utusaka ku dishipa mikenji ya Nzambi. (Lomo 7:21-25) Kadi dinanga ditudi banange Nzambi didi ditshimuna bionso ebi. Yehowa udi ubenesha bantu badi bamuleja mudibu bamunange padibu bamutumikila. Udi upesha bantu ‘badi batumikila mêyi ende’ nyuma muimpe. (Bienzedi 5:32) Nyuma eu udi utupetesha ngikadilu mimpe idi ituambuluisha bua kuikala batumikidi ba Nzambi.—Galatia 5:22, 23.
17, 18. (a) Ntshinyi tshituakonkonona mu mukanda eu? Mmalu kayi atudi ne bua kuvuluka patudi tuenza dikonkonona edi? (b) Nshapita udi ulonda neakuile pa bualu kayi?
17 Mu mukanda eu netukonkonone mêyi a Yehowa, imue mikenji yende ne malu makuabu a bungi adi aleja tshidi disua diende. Patudi tukonkonona mikenji eyi, tudi ne bua kuvuluka malu a bungi adi ne mushinga. Tuvuluke ne: Yehowa kena utuenzeja bua kutumikila mêyi ne mikandu yende to, kadi mmusue ditumikila dietu difumine mu mutshima. Tuvuluke kabidi ne: Yehowa udi utulomba bua kuenza malu adi mua kutupetesha masanka mpindieu ne muoyo wa tshiendelele mu matuku atshilualua. Tumonayi kutumikila Yehowa ne muoyo mujima bu mushindu muimpe wa kuleja mutudi bamunange bikole.
18 Yehowa mmutupeshe kondo ka muoyo bua tuetu kujingulula tshidi tshimpe ne tshidi tshibi bualu mmutunange. Kadi bua kondo ketu ka muoyo kutulombolaku bimpe, tudi ne bua kukalongesha. Ke bualu butualonga mu nshapita udi ulonda.
[Mêyi adi kuinshi]
a Bala nshapita 6 wa mukanda eu bua kumanya mishindu mimpe ya kujikija lutetuku.
b Nansha banjelu babi badi pabu mua kutumikila ku bukole. Tshilejilu, pavua Yezu mutumine bademon dîyi bua kupatuka munda mua bamue bantu, bakatshina bukokeshi buvuaye nabu ne kumutumikila nansha muvuabu kabayi basue.—Mâko 1:27; 5:7-13.
c Mu Matayo 23:4, mbenze mudimu ne muaku eu bua kuleja “majitu manene,” a mikenji ne bilele bia bantu bivua Bafalese ne bafundi belela bantu. Wowu muaku eu ke udibu bakudimune mu Bienzedi 20:29, 30 ne: “luonji” bua kuleja batontolodi bena luonji bavua “bamba malu a mashimi” bua kudinga bakuabu bua babalonde.
NEWANDAMUNE MUNYI?
▪ Yehowa udi utulomba ditumikila dia mushindu kayi? Bua tshinyi bidi bua diakalenga dietu?—Dutelonome 5:28-33.
▪ Ditumikila dietu didi ne mushinga kayi ku mêsu kua Yehowa?—1 Samuele 15:22, 23.
▪ Ndilongesha kayi ditudi tupetela ku mushindu udi Yezu utumikila Nzambi?—Yone 8:29.
▪ Bua tshinyi mbimpe tuetu kutumikila Yehowa?—Buakabuluibua 4:11.
[Tshimfuanyi dibeji dijima mu dibeji 4]
[Tshimfuanyi mu dibeji 6]
Didilambula ne ditambula ke ntuadijilu wa nsombelu wa ditumikila Yehowa