NSHAPITA 6

Mutudi mua kusungula mishindu mimpe ya kujikija lutetuku

“Nuenze malu onso bua kutumbisha Nzambi.”—1 KOLINTO 10:31.

1, 2. Ndipangadika kayi ditudi mua kuangata pa bidi bitangila mishindu ya dijikija dia lutetuku?

FUANYIKIJABI ne: udi musue kudia tshimuma, kadi udi umona ne: ntshibole muaba mukese. Neusungule tshinyi ku malu asatu adi alonda aa: Neutshidie tshionso tshijima, too ne muaba udi mubole anyi? Neutshimanshe tshionso tshijima anyi? Neukose tshitupa tshidi tshibole ne kudia tshidi tshimpe anyi?

² Mu mushindu kampanda, dijikija lutetuku didi anu bu tshimuma etshi. Imue misangu udi mua kujinga bua kujikija lutetuku kadi umona ne: mishindu ya bungi ya kujikija lutetuku idiku lelu idi ne malu mabi anyi mmibole. Nunku, newenze tshinyi? Bamue bantu badi mua kuitaba mishindu yonso ya dijikija dia lutetuku idi bena pa buloba ebu benza nansha yoyi mibi. Bakuabu badi babenga mishindu yonso ya dijikija lutetuku bualu badi batshina bua kabalu kuenza bualu budi mua kubanyanga. Banga pabu badi basungula bimpe mishindu ya kujikija lutetuku idi imueneka mimpe ne babenga idi mibi. Mmishindu kayi ya dijikija lutetuku iudi ne bua kusungula bua wewe kushala mu dinanga dia Nzambi?

3. Ntshinyi tshituakonkonona mu nshapita eu?

³ Ba bungi ba kutudi badi mua kusungula bualu buisatu. Tudi bamanye mudi dijikija lutetuku diambuluisha, kadi tudi basue kusungula mishindu ya dijikija lutetuku idi mimpe. Ke bualu kayi tudi ne bua kukeba bua kumanya mishindu ya kujikija lutetuku idi mimpe ne idi mibi. Kadi tuanji kumanya tshidi mishindu ya kujikija lutetuku itudi tusungula mua kuenzela ntendelelu utudi tutendelela Yehowa.

“NUENZE MALU ONSO BUA KUTUMBISHA NZAMBI”

4. Bua tshinyi didilambula dietu didi ditangila too ne mishindu ya kujikija lutetuku itudi tusungula?

⁴ Kukadi ndambu wa bidimu, muanetu mukuabu mukulakaje uvua mutambule mu 1946 wakamba ne: “Ntu mudifundile tshipatshila tshia kuteleja muyuki wonso wa ntambu ne ntema anu bu ne: meme ke udi utambula.” Bua tshinyi? Udi umvuija ne: “Kuvuluka didilambula dianyi misangu yonso kudi kungambuluisha bua kushala mulamate Nzambi.” Kabiyi mpata udi witaba lungenyi lua muanetu eu. Paudi uvuluka ne: uvua mulaye Yehowa bua kumuenzela mudimu matuku ebe onso a muoyo, bidi bikusaka bua kutantamena ntatu. (Muambi 5:4; Ebelu 10:7) Nunku kuelangana meji pa didilambula dietu kakuena kutangila anu mudimu wa kuyisha to, kadi kudi kutangila kabidi malu makuabu onso bu mudi dijikija dia lutetuku. Mupostolo Paulo wakajadika bualu ebu pakambilaye bena Kristo ba mu tshikondo tshiende ne: “Binuadia anyi binuanua, anyi malu onso anudi nuenza, nuenze malu onso bua kutumbisha Nzambi.”—1 Kolinto 10:31.

5. Mmunyi mudi Lewitiki 22:18-20 utuambuluisha bua kumvua didimuija didi mu Lomo 12:1?

⁵ Malu onso audi wenza adi alenga kutendelela kuudi utendelela Yehowa. Mu mukanda uvua Paulo mufundile bena Kristo ba mu Lomo, wakakula miaku idi ne mushinga wa bungi bua kushindika bualu ebu mu mioyo yabu. Wakababela ne: ‘Nufile mibidi yenu bu mulambu udi ne muoyo, wa tshijila, udi usankisha Nzambi bimpe; bualu ebu budi kutendelela kuenu kudi ne meji.’ (Lomo 12:1) Mubidi webe udi Paulo wamba muaba eu udi ukongoloja meji, muoyo ne bukole. Udi ne bua kuenzela Nzambi mudimu ne bintu bionso ebi. (Mâko 12:30) Paulo udi ubikila mudimu muenza ne muoyo mujima ne: mmulambu. Muaku eu mulambu udi ne didimuija munda muawu. Mu mikenji ya Mose, Nzambi kavua witaba milambu ya nyama milema anyi ivua isama to. (Lewitiki 22:18-20) Bia muomumue, mudimu udi muena Kristo wenzela Nzambi wowu munyanga kudi tshintu kampanda, Nzambi kena uwitaba to. Bualu ebu budi mua kuenzeka bishi?

6, 7. Muena Kristo udi mua kunyanga mubidi wende mushindu kayi? Ntshinyi tshidi mua kumuenzekela?

⁶ Paulo wakadimuija bena Kristo ba mu Lomo ne: ‘Kanufidi bitupa bia mibidi yenu ku bubi.’ Wakabambila kabidi bua ‘kufuisha bienzedi bia mubidi.’ (Lomo 6:12-14; 8:13) Ku ntuadijilu kua mukanda wende, wakafila bimue bilejilu bia “bienzedi bia mubidi.” Wakamba bua bantu bena mapanga ne: ‘Mukana muabu mudi muule tente ne milawu.’ ‘Makasa abu adi aya lubilu bua kumatshisha mashi.’ ‘Ditshina dia Nzambi kadiena ku mêsu kuabu.’ (Lomo 3:13-18) Muena Kristo udi unyanga mubidi wende padiye wenza mudimu ne ‘bitupa’ biawu bua kuenza malu mabi. Tshilejilu, muena Kristo yeye witaba bua kumona malu mabi bu mudi a bantu butaka anyi kutangila filme ya malu a mvita ne dishipangana, udi ‘ufila [mêsu ende] ku bubi’ ne udi unyanga mubidi wende mujima. Bualu buonso budiye wenza bua kutendelela Yehowa kabuena kabidi bua tshijila to, ne Nzambi kena ubuitaba to. (Dutelonome 15:21; 1 Petelo 1:14-16; 2 Petelo 3:11) Nunku mbimpe tusungule mishindu mimpe ya kujikija lutetuku.

⁷ Bushuwa, mushindu wa kujikija lutetuku udi muena Kristo usungula udi mua kumukebela diakabi anyi diakalenga. Ke bualu kayi tudi ne bua kusungula mishindu ya kujikija lutetuku idi kayiyi mua kunyanga mulambu utudi tupesha Nzambi. Tumonayi mutudi mua kumanya mishindu ya kujikija lutetuku idi mimpe ne idi mibi.

“NUKINE MALU ADI MABI”

8, 9. (a) Tela bitupa bibidi bia mishindu ya kujikija lutetuku. (b) Mmishindu kayi ya dijikija lutetuku itudi ne bua kubenga? Bua tshinyi?

⁸ Mu tshikoso, tudi mua kutapulula mishindu ya dijikija lutetuku mu bitupa bibidi. Tshia kumpala ntshia mishindu ya dijikija lutetuku idi bena Kristo kabayi ne bua kuitaba. Tshibidi ntshia mishindu idi bena Kristo mua kuitaba anyi kubenga kuitaba. Tutuadijayi ne tshia kumpala.

⁹ Anu mutuvua bamone mu nshapita wa 1, imue mishindu ya dijikija lutetuku idi ne malu adi Bible ukandika patoke. Tshilejilu, kutangila filme idi ne malu a mvita ne a dishipangana, malu a bademon, ya bantu butaka anyi idi isaka bantu ku dienza malu a bundu ku Internet anyi ku televizion ne kuteleja misambu idi ne malu aa. Bu mudi mishindu ya dijikija lutetuku eyi mikale ileja malu adi ashipa mikenji ya mu Bible, bena Kristo balelela kabena mua kuyitaba nansha kakese to. (Bienzedi 15:28, 29; 1 Kolinto 6:9, 10; Buakabuluibua 21:8) Paudi ubenga mishindu ya dijikija lutetuku idi mibi, udi uleja Yehowa muudi ‘mukine malu mabi’ ne muoyo mujima ne muudi “umuka ku malu mabi.” Udi uleja kabidi muudi ne ‘ditabuja didi kadiyi ne lubombo.’—Lomo 12:9; Musambu 34:14; 1 Timote 1:5.

10. Mmeji kayi mabi atudi katuyi ne bua kuela bua dijikija dia lutetuku? Bua tshinyi?

¹⁰ Kadi bamue badi mua kuela meji ne: kutangila malu a bundu kakuena mua kubenzela bualu. Badi badiambila ne: ‘Ndi mua kutangila malu aa ku televizion kadi meme tshiena mua kuenza to.’ Wewe wela meji mushindu eu udi udidinga ne udi udikebela diakabi. (Yelemiya 17:9) Tuetu tujikija lutetuku ne malu adi Yehowa mukandike, tudiku mua kuamba ne: tudi ‘tukina malu mabi’ ne muoyo mujima anyi? Kutangila malu mabi, kuabala mu mikanda anyi kuateleja misangu ne misangu kudi mua kutushiya mu tshipua-muoyo. (Musambu 119:70; 1 Timote 4:1, 2) Tshibidilu etshi tshidi mua kunyanga bienzedi bietu anyi mushindu utudi tumona malu mabi adi bakuabu benza.

11. Leja mudi Galatia 6:7 mukumbane pa bidi bitangila dijikija dia lutetuku.

¹¹ Diakabi, ke tshitudi tumona lelu eu. Bamue bena Kristo mbafike ku dienda masandi bualu bavua ne tshibidilu tshia kutangila malu a bantu butaka. Mbadimuene nkayabu ne: ‘Tshintu tshionso tshidi muntu ukuna, ntshiotshi tshiapolaye.’ (Galatia 6:7) Kadi kudi mushindu wa kuepuka diakabi edi. Wewe ubueja malu adi mimpe mu lungenyi luebe, newenze malu mimpe mu nsombelu webe.—Bala malu adi mu kazubu kadi kamba ne: “Mmishindu kayi ya dijikija lutetuku indi ne bua kusungula?”

ANGATA MAPANGADIKA BILONDESHILE MÊYI A MU BIBLE

12. Mmunyi mudi Galatia 6:5 upetangana ne dijikija lutetuku? Ntshinyi tshidi mua kutuambuluisha patudi tuangata mapangadika?

¹² Tuakulayi mpindieu bua tshitupa tshibidi tshia mishindu ya dijikija lutetuku idi ne malu adi Dîyi dia Nzambi kadiyi dikandika patoke. Bua mishindu ya dijikija lutetuku eyi, muena Kristo nkayende ke udi ne bua kusungula idiye umona mimpe. (Galatia 6:5) Kadi kudi tshintu tshidi mua kutuambuluisha bua kuyisungula. Bible udi ne mêyi adi mua kutuludika anyi mibelu idi mua kutuambuluisha bua kumanya tshidi meji a Yehowa. Patudi tubala mêyi ne mibelu eyi, netufike ku dijingulula ‘mudi disua dia Yehowa’ mu malu onso too ne a mishindu ya dijikija dia lutetuku itudi tusungula.—Efeso 5:17.

13. Ntshinyi tshiatusaka bua kubenga mishindu ya kujikija lutetuku idi kayiyi isankisha Yehowa?

¹³ Tudi bamanye ne: bena Kristo bonso kabena ne bujinguludi bua muomumue to. (Filipoi 1:9) Pashishe tuetu bonso katutu banange anu mishindu ya muomumue ya kujikija lutetuku to. Ke bualu kayi katuena ne bua kutekemena bua bena Kristo bonso bangate dipangadika dia muomumue to. Nansha nanku, patudi tulekela mêyi a mu Bible ashintulula meji etu ne muoyo wetu, netuepuke mishindu yonso ya dijikija lutetuku idi mua kunyingalaja Yehowa.—Musambu 119:11, 129; 1 Petelo 2:16.

14. (a) Mbualu kayi butudi katuyi ne bua kupua muoyo patudi tusungula dijikija dia lutetuku? (b) Ntshinyi tshitudi ne bua kuenza bua kuteka ntendelelu wa Yehowa pa muaba wa kumpala?

¹⁴ Patudi tusungula mushindu wa kujikija lutetuku, tudi kabidi ne bua kutabalela bungi bua dîba didiwu utuangata. Malu adi mu dijikija lutetuku diudi usungula adi aleja tshiudi mumone tshimpe, kadi bungi bua dîba diudi upitshishaku budi buleja tshiudi wangata ne mushinga. Bua bena Kristo, malu a ntendelelu wa Nzambi ke adi ne mushinga wa bungi. (Matayo 6:33) Kadi ntshinyi tshiudi ne bua kuenza bua kujadika ne: udi muteke ntendelelu wa Nzambi pa muaba wa kumpala? Mupostolo Paulo wakamba ne: ‘Nudimuke bienu bu munudi nuenda; kanuendi bu badi kabayi ne meji, kadi nuende bu bena meji; nudisumbile tshikondo patshiditshiku.’ (Efeso 5:15, 16) Nunku kudikosela bungi bua mêba audi ne bua kupitshisha ku dijikija dia lutetuku nekukuambuluishe bua kupeta dîba dia kuenza ‘malu adi makane’ anyi adi ne mushinga wa bungi, tuambe ne: malu adi akuambuluisha bua kuikala ne ditabuja dikole.—Filipoi 1:10.

15. Bua tshinyi tudi ne bua kuikala ne budimu patudi tusungula mishindu ya dijikija dia lutetuku?

¹⁵ Tudi kabidi ne bua kuikala ne budimu bua bungi patudi tusungula mushindu wa dijikija lutetuku. Mbuena kuamba tshinyi? Tuanji kupingana ku tshilejilu tshietu tshia tshimuma. Bua kubenga kudia tshitupa tshidi tshibole kuyi mumanye, kuena ukosela anu muaba udi mubole au to, kadi neukoseku kabidi ne katupa kimpe. Ke mutudi kabidi ne bua kuikala ne budimu patudi tusungula mishindu ya dijikija lutetuku. Muena Kristo udi ne meji kakubenga anu mishindu ya dijikija lutetuku idi Bible ukandika patoke to, kadi udi kabidi ubenga idi imueneka bu mimpe anyi mikale ne malu adi mua kutunyangila malanda etu ne Yehowa. (Nsumuinu 4:25-27) Kulamata bikole ku tshidi Dîyi dia Nzambi diamba nekukuambuluishe bua kubenga mishindu ya dijikija lutetuku idi mibi.

“MALU ONSO ADI A BUTOKE BUA MUTSHIMA”

16. (a) Mmunyi mutudi mua kuleja ne: tudi ne meji a buena a Yehowa bua tshidi tshimpe ne tshibi? (b) Ntshinyi tshidi mua kutuambuluisha bua kutumikila Nzambi mu malu onso?

¹⁶ Padi bena Kristo basungula mishindu ya dijikija lutetuku, batu banji kukeba bua kumanya mudi Yehowa uyimona. Bible udi utuleja meji a Yehowa ne mikenji yende. Tshilejilu, mukalenge Solomo wakatela malu a bungi adi Yehowa ukina bu mudi: ‘ludimi ludi lushima, bianza bidi bimatshisha mashi a badi kabayi ne tshilumbu panshi, mutshima udi upangidija mianda ya meji mabi ne makasa adi aya lubilu kudibu benza malu mabi.’ (Nsumuinu 6:16-19) Mmunyi mutudi mua kuikala ne meji a buena a Yehowa? Mufundi wa musambu wa 97 wakamba ne: “Nuenu badi bananga Yehowa, nuikale ne malu mabi lukuna.” (Musambu 97:10) Mishindu ya dijikija lutetuku iudi usungula idi ne bua kuleja muudi mukine ne muoyo mujima malu adi Yehowa mukine. (Galatia 5:19-21) Vuluka ne: malu audi wenza mu musokoko ke adi aleja tshiudi menemene kupita audi wenza munkatshi mua bantu. (Musambu 11:4; 16:8) Nunku biwikala ne dijinga dikole dia kuleja muudi ulonda meji a Yehowa bua tshidi tshimpe ne tshibi mu malu ebe onso, neusungule mishindu ya dijikija lutetuku idi ipetangana ne Bible. Wewe wenza nanku, newikale utumikila Nzambi mu malu onso.—2 Kolinto 3:18.

17. Kumpala kua kusungula mushindu wa dijikija lutetuku, nkonko kayi itudi ne bua kudiela?

¹⁷ Mbualu kayi bukuabu buudi ne bua kuenza bua kujadika ne: udi wenza malu mu diumvuangana ne meji a buena a Yehowa paudi usungula mishindu ya dijikija lutetuku? Diebeja ne: ‘Ntshinyi tshidi mushindu wa dijikija lutetuku eu mua kungenzela meme ne kuenzela malanda anyi ne Nzambi?’ Tshilejilu, kumpala kua kutangila filme kampanda diebeja ne: ‘Malu alejabu mu filme eu neenzele kondo kanyi ka muoyo tshinyi?’ Tukonkononayi mêyi a mu Bible adi akula bua bualu ebu.

18, 19. (a) Leja mudi mubelu udi mu Filipoi 4:8 utuambuluisha bua kusungula mishindu mimpe ya kujikija lutetuku? (b) Mmibelu kayi mikuabu ya mu Bible idi ituambuluisha bua kusungula mishindu mimpe ya dijikija lutetuku? (Bala diumvuija didi kuinshi kua dibeji.)

¹⁸ Tudi tupeta mubelu wa mushinga mu Filipoi 4:8 udi wamba ne: ‘Malu onso adi malelela, ne malu onso adi a buneme, ne malu onso adi makane, ne malu onso adi a butoke bua mutshima, ne malu onso adi malengele a dinanga, ne malu onso adi ne lumu luimpe; bikalaku buimpe ne bikalaku butumbi, nuelangane meji a malu aa.’ Mu mvese eu, Paulo kavua wakula bua dijikija dia lutetuku to, kadi uvua wakula bua dielangana meji mu mutshima wetu didi ne bua kuimanyina pa malu adi asankisha Nzambi. (Musambu 19:14) Kadi mêyi a Paulo aa adi kabidi mua kutangila malu a dijikija dia lutetuku. Mushindu kayi?

¹⁹ Udiebeje ne: ‘Filme indi ntangila, manaya andi nnaya ku video, misambu indi ngumvua anyi mishindu mikuabu indi njikija lutetuku idiku yuuja meji anyi ne “malu a butoke bua mutshima” anyi?’ Tshilejilu, paudi ujikija kutangila filme kampanda, mmalu kayi autu ushala nawu mu lungenyi luebe? Bikalawu malu mimpe ne akukuatshisha, umanye ne: filme au mmuimpe. Kadi bikala filme uudi ufuma ku ditangila ukusaka ku diela meji ku malu mabi, umanye ne: mmubi ne udi mua kukunyanga. (Matayo 12:33; Mâko 7:20-23) Bua tshinyi? Bualu kuela meji pa malu mabi kudi kunyanga ditalala diebe dia mu mutshima, kondo kebe ka muoyo kalongesha kudi Bible ne kudi mua kunyanga malanda ebe ne Nzambi. (Efeso 5:5; 1 Timote 1:5, 19) Bu mudi dijikija lutetuku dia mushindu eu dikunyanga, kuditabi nansha kakese to.a (Lomo 12:2) Enza anu bu mufundi wa misambu wakalomba Yehowa ne: ‘Ukudimune mêsu anyi bua kaatangidi malu a patupu.’—Musambu 119:37.

ENZA MALU ADI ASANKISHA BANTU BAKUABU

20, 21. Mmunyi mudi 1 Kolinto 10:23, 24 upetangana ne disungula dia mishindu mimpe ya kujikija lutetuku?

²⁰ Paulo wakafila mubelu wa mu Bible utudi ne bua kulonda patudi tuangata mapangadika adi atutangila anu tuetu nkayetu. Wakamba ne: ‘Malu onso adi mimpe a kuenza, kadi malu onso kaena atudiundisha. Muntu kakebi mua kudisankisha, kadi akebe mua kusankisha mukuabu.’ (1 Kolinto 10:23, 24) Mmunyi mudi mubelu eu upetangana ne disungula dia mishindu mimpe ya kujikija lutetuku? Udi ne bua kudiebeja ne: ‘Mushindu wa kujikija lutetuku undi musungule eu udi mua kuenzela bantu bakuabu tshinyi?’

²¹ Kondo kebe ka muoyo kadi mua kukuitabila bua kujikija lutetuku ne mushindu kampanda uudi umona ne: ‘mmuimpe.’ Kadi wewe mumone ne: kondo ka muoyo ka bena Kristo nebe kadi kabakandika mushindu wa dijikija lutetuku au, mbimpe uulekele. Bua tshinyi? Bualu anu bu muvua Paulo muambe, kuena musue ‘kuenzela bana benu ba mu Kristo bibi’ anyi ‘kuenzela Kristo bibi’ paudi wenza bualu buonso budi mua kupangisha bena Kristo nebe bua kushala balamate Nzambi. Tumikile mubelu eu wa ne: “Kanuikadi balenduishi” ba bana benu. (1 Kolinto 8:12; 10:32) Bena Kristo balelela lelu badi batumikila mubelu muimpe wa Paulo wa kutua bakuabu mushinga padibu babenga mishindu ya kujikija lutetuku idi mua kuikala “mimpe” kadi kayiyi ‘idiundisha’ bakuabu.—Lomo 14:1; 15:1.

22. Bua tshinyi bena Kristo badi ne bua kuitaba dishilangana dia ngenyi mu malu adi atangila muntu nkayende?

²² Kadi kudi mushindu mukuabu wa kuenza malu adi asankisha bakuabu. Muena Kristo udi kondo kende ka muoyo kamukandika malu kampanda kena ne bua kukeba bua bena mu tshisumbu bonso balonde anu mishindu ya dijikija lutetuku idiye yeye umona ne: ke idi mimpe to. Yeye wenza nanku, udi anu bu muntu udi wendesha mashinyi mu njila kadi ukeba bua bantu bonso badi ne mashinyi mu njila au bikale ne lubilu lua muomumue ne luende. Ngelelu wa meji wa mushindu eu ki mmuimpe to. Bua dinanga dia buena Kristo, muanetu udi kondo kende ka muoyo kamukandika mushindu kampanda wa dijikija lutetuku udi ne bua kunemeka bena Kristo nende badi baumona muimpe padiwu kauyi ubengangana ne mibelu ya mu Bible. Dîba adi, ‘bupole buende budi bumanyika kudi bantu bonso.’—Filipoi 4:5; Muambi 7:16.

23. Ntshinyi tshidi mua kukujadikila ne: udi musungule mushindu muimpe wa kujikija lutetuku?

²³ Mu tshikoso, mmunyi muudi mua kujadika ne: mushindu wa dijikija lutetuku uudi musungule mmuimpe? Kuitabi mishindu yonso ya dijikija lutetuku idi ileja malu mabi adi Dîyi dia Nzambi dikandika. Londa mibelu ya mu Bible idi mua kukuambuluisha bua kusungula mishindu ya kujikija lutetuku idi Bible kayi ukandika. Epuka idi mua kunyanga kondo kebe ka muoyo, ne lekela idi mua kulenduisha nangananga bena Kristo nebe. Wewe muenze nunku, neutumbishe Nzambi ne wewe ne bena mu dîku diebe anyi dienu nenushale mu dinanga diende.

[Mêyi adi kuinshi]

[Kazubu/Tshimfuanyi mu dibeji 67]

MMISHINDU KAYI YA DIJIKIJA LUTETU INDI NE BUA KUSUNGULA?

Dîyi dia kulonda: “Nukine malu adi mabi; nulamate malu adi mimpe.”—Lomo 12:9.

Nzambi udiku mua kusanka bingikala . . .

▪ nteleja misambu idi ne mêyi adi ampangisha bua kulama malu adi makane mu lungenyi luanyi anyi?—1 Kolinto 6:9, 10.

▪ ngidikija ngakuilu mubi ne bienzedi bibi bia bantu bandi mmona mu filme anyi?—Luka 6:40.

▪ nnaya pa muaba wa muntu muena tshikisu anyi muenzavi mu manaya andi nnaya ku video anyi?—Musambu 11:5, 7.

▪ mpesha bantu bakuabu mibelu ya mu Bible bua kusungula mishindu ya kujikija lutetuku, kadi meme mbenga kuyitumikila anyi?—Lomo 2:21.

[Kazubu mu dibeji 70]

Kumpala kua kusungula mushindu wa kujikija lutetuku, bena kristo badi ne bua kudiebeja ne:

▪ Neunyange malanda anyi ne Nzambi anyi?

▪ Ntshinyi tshidiwu mua kungenzela?

▪ Ntshinyi tshidiwu mua kuenzela bantu bakuabu?

[Tshimfuanyi mu dibeji 68]

Kulonda tshidi Bible wamba patudi tusungula mishindu ya kujikija lutetuku kudi kutuambuluisha bua kushala mu malanda mimpe ne Yehowa