Buela mu Mpuilu wa Distrike wa “Ditshina dia Nzambi”!
Ukadi mudilongolole bua kubuela mu Mpuilu wa Distrike wa 1994 wa “Ditshina dia Nzambi” wa Bantemu ba Yehowa anyi? Eyowa, neupete mabenesha pa kuikalamu munkatshi mua matuku wonso asatu! Ne mpuilu 25 idi milongolola mu teritware wa filiale wa Zaïre, kudi mua kuikala mpuilu pabuipi ne muaba uwudi musombele.
Ditshina kampanda didi mua kutekesha dikima ne kubutula ditekemena; kadi, diyuki dia mu Ditanu mu dinda nediumvuije ditshina dia Nzambi ne mabenesha mavule adi afuminaku. Bushuwa, programme wa mpuilu mujima neashindamene pa mabenesha aa.
Ditanu kunyima kua midi, nenuteleje mushindu udi ditshina dia Nzambi dikolesha mabaka ne nsombelu wa mu dîku, ne mushindu udidio mua kuambuluisha bansonga bua kushalabu bakandamane mu lulamatu luabu kudi Nzambi. Programme wa kunyima kua midi neakomeshibue ne diyuki didi dikolesha ku muoyo dia “Disamba badi mu dibungama.” Nenusanke ne mamanyisha malenga mafila munkatshi mua diyuki edi bua kuambuluisha aba badi bajimije bananga babu mu lufu.
Programme wa mu Disambombo nealeje mushindu udi ditshina dia Nzambi mua kukolesha dilamata dietu ku bulombodi bua Yehowa pa bidi bitangila tshisumbu ne mudimu wetu. Mu diyuki dia “Balayi Dîyi dia Nzambi, Bible Munsantu, ku dituku dionso,” bateleji nebapete mishindu ya kubala ne kulonga Bible. Programme wa mu Disambombo neakomeshibue ne tshiena-bualu tshidi tshikoka ntema tshia “Dituku dikuata buowa dia Yehowa dikadi pabuipi.”
Bumue bua ku malu a mu programme wa mu Dia lumingu mmuyuki udi ne tshiena-bualu tshia “Nekuikale dibiishibua dia bakane.” Mu miyuki yalonda, “Bapandishibue ne muoyo mu dikenga dinene,” diumvuija nedifidibue dia dilaya dia Yezu dia dikema didi ditangila aba bikala kabayi mua kufua kashidi.—Yone 11:26.
Programme wa mu Dia lumingu mu dinda neakomeshibue ne drama udi welesha meji wa minute 40-ne tshiena-bualu tshia Masungula awudi ne bua kuenza. Nebavuluije bateleji tshikondo tshia Yoshua ne nebamone dipangadika diende dikole dia kusadila Yehowa. Diteta dia kapia mu matuku a Elie nedilejibue padi, ne malongesha atudi mua kupatula ku miyuki eyi yonso ibidi adi mua kuambuluisha beteleji bua kuleja ditshina dia Nzambi lelu. Kunyima kua midi, diyuki dia patoke, “Bua tshinyi kutshina Nzambi mulelela mpindieu,” nedizangike mpuilu eu.
Dilongolola mpindieu bua kubuelamu. Bua kupeta muaba udi pabuipi ne nzubu wenu, ebeja ku Nzubu wa Bukalenge wa Bantemu ba Yehowa peshi fundila bapatudi ba tshibejibeji etshi.
[Mêyi a dianyisha bua tshimfuanyi mu dibeji 32]
T. Rosenthal/SUPERSTOCK