Bua tshinyi udi ne bua kubuelamu

MUNKATSHI mua matuku anayi, netubabidile dilongesha dia mu nyuma dia nsongo mu mpuilu wa distrike “Malongesha a Nzambi,” wenzeka mu muvu wa été pa buloba bujima. Amu bua mu Etats-Unis nkayamu, nekuenzeke bisangilu binene bipite pa 150 mu ngondo wa Juin, Juillet ne wa Août. Miaba mivule, programme neatuadije mu dinayi pa dîba 13 ne minute 20 ne neajike mu dia lumingu pa dîba 16 ne minute 15. Luapolo ya ba-misionere bikalabo bambuluishe bua kualukila mu matunga abo bua kubabidila tshikondo etshi tshia disanka neyikale mianda minene ya imue ya ku mpuilu eyi.

Yonso wa kutudi​—nansha muikale nsonga peshi mukulumpe, mulume, mukaji, tatu, mamu, anyi bansonga anyi bana—​nebapete dilongesha, difila mu mushindu mutokesha ne udi usankisha, nebibambuluishe. Tshilejilu, lelu’eu, bavule badi badiebeja ne: muoyo udi ne tshipatshila kayi? Mu ditanu mu dinda, netuikale ne disanka dia kuteleja dikonkonona dia lukonko elu ne netuanyishe tshikalabo ne bua kutupesha bu diandamuna bua kuambuluisha bantu netu bua kujingulula tshiena-bualu etshi.

Mu programme wa mu ditanu kunyima kua midi, nemuikale miyuki eyi: “Vuijayi buobumue bua kashidi mu dibaka dienu,” “Tumikayi bua lupandu lua ba mu nzubu muenu” ne “Baledi​—bana benu badi bakengela dibatabalela dia pa buadi.” Diakamue pashishe, ntema ya pa buayi neyitumibue ku ntatu idi bansonga bapetangana nayi ne mushindu wa kuyijikija. Nebikale ne bua kukankamijibua ne drame pa nsombelu wa lelu udi ne tshiena-bualu tshia se: Bansonga badi bavuluka Mubafuki wabu ku mpindieu.

Mu disambombo, nebakule bua mulayi wa Yezu udi utangila matuku a ku nshikidilu ne nangananga mêyi aa: “Diakamue, pajika dikenga dia mu matuku awu, dîba nedifikuluke.” (Matayi 24:29) Neusanke bua kumvua muyuki wumvuija tshikondo tshikala dikenga edi ne bua kulua. Dituku adi, netumone tshiakabidi muyuki wa midimu ya Bantemu ba Yehowa wa mu matuku etu aa ne bidibo bakumbaje.

Mu dia lumingu, drame mukuabo udi ne tshiena-bualu tshia Kanudidingi, kanuseki Nzambi, neakonkonone njiwu idiku bua muoyo mutoke wa muena nkristo yonso pa bidi bitangila tusete tua vidéo ne mijiki idiku lelu’eu. Muyuki wa patoke wa kunyima kua midi newikale ne tshiena-bualu etshi: “Dilongesha didi ne mushinga bua tshikondo tshietu etshi tshikole.” Programme neajike ne didimuija edi: “Tungunukayi ne kulama bikole malongesha a Nzambi.”

Kabiyi mpata, dikalaku diebe mu mpuilu eu wa matuku anayi nedikupeteshe mabenesha mavule. Ne muoyo mulenga, udi mubikidibue bua kubuelamu. Bua kumanya muaba wenzekela mpuilu pabuipi nebe, suaku webeje Bantemu ba Yehowa ba mu muaba uudi musombele, utufundile anyi ubale Réveillez-vous! wa dia 8 Juin, mudi adresse ya miaba yenzekela mpuilu eu ku Mputu ne ku Amerike wa ku Nord.