“Njila wa muoyo wa Nzambi”​—Mpungilu wa 1998-1999 udi pabuipi!

MU Burundi, mu Congo/​Brazzaville ne mu Congo/​Kinshasa nkayamu, mbalongolole mpungilu 59 kubangila mu Tshimungu too ne mu Kabitende. Pamu’apa, dimue dia ku masangila aa a matuku asatu nedikale mu tshimenga tshidi pabuipi ne muaba uudi musombele. Mu miaba ya bungi, ndongamu neatuadije dituku dionso​—Ditanu too ne Dia lumingu—​ne mijiki pa dîba 9:30 wa dinda.

Ndongamu wa mu Ditanu mu dinda neazangike luapolo pa dilubuluka dia bumanyishi bua Bukalenge mu bitupa kabukabu bia pa buloba. Ne nebazangike tshiena-bualu tshia mpungilu kudi muyuki wa nshindamenu wa “Tshia-bupikudi tshia Kristo​—Njila wa lupandu wa Nzambi.”

Mu mapingaja muyuki mukosolola wa “Baledi​—Buejayi njila wa Nzambi mu lungenyi lua bana benu,” neufile ngenyi pa mushindu wa kusonsola bansonga bua kunanga ne kusadila Yehowa. Nebakome ndongamu wa mu mapingaja ne muyuki wa “Kudi muoyo kunyima kua lufu anyi?”

Ndongamu wa mu Disambombo mu dinda udi uleja mudimu wa dienza bayidi wa Bantemu ba Yehowa mu bitupa bisatu bilondangane, “Tuambuluishayi bantu bua babuela mu njila udi ufikisha ku muoyo,” “Lutatu lua dipeta bantu” ne “Tulongeshayi bayidi bionso bivua Kristo mutumine dîyi.” Ku ndekelu kua ndongamu wa mu dinda, nekuikale ndongoluelu bua bayidi bapiabapia kutambulabu.

Muyuki wa dikangula nawu tshialu mu Disambombo mu mapingaja wa “Tusadilayi ne ditekemena dia muoyo udi kauyi ndekelu,” udi ukankamija bua kutuma meji bimpe ku tubingila tuetu nkayetu bua kusadila Nzambi. Muyuki wa “Tuanyishayi ‘mapa a bantu’ badi balongesha njila wa Nzambi” ne wa “Vula bumuntu bua kale ne vuala bupiabupia” idi ileja dikonkonona dia mvese ku mvese didi ditokesha Efeso nshapita 4. Pashishe, nebafile mibelu mimpe ya mu Mifundu mu muyuki wa “Udilame kuyi ne katoba ka mu bulongolodi ebu” ne mu muyuki mukosolola wa bitupa bisatu wa “Bansonga​—Londayi njila wa Nzambi.” Ndongamu wa mu mapingaja udi ujika ne muyuki wa “Bumuntu bua Mufuki ne njila yende.”

Ndongamu wa mu Dia lumingu mu dinda udi uleja muyuki mukosolola wa bitupa bisatu wakonkonona nshapita ya ndekelu ya mukanda wa mu Bible wa Yehezekele pamue ne diumvuija diayi dia tshiprofete. Nebatuishe ndongamu wa mu dinda ku tshibungubungu ne drama musheme muenza mu bivualu bia kale mushindamene pa lulamatu lua bansonga basatu bena Ebelu. Muanda munene wa mpungilu mu mapingaja mmuyuki wa patoke wa “Njila umuepele udi ufikisha ku muoyo wa kashidi.”

Bushuwa neunemeshibue mu nyuma mu dikalamu matuku onso asatu. Tudi tukujingila difika dimpe ne muoyo mujima mu bitupa bionso, bushuwa, nebenze tshitupa tshionso kakuyi dikufutshisha mfranga. Bua muaba udi pabuipi nebe menemene, ebeja ku Nzubu wa Bukalenge wa Bantemu ba Yehowa ba muaba uudi musombele anyi fundila bapatudi ba tshibejibeji etshi.