Luaku mu Mpuilu wa Distrike wa “Ditabuja mu Dîyi dia Nzambi”!

MILIYO mivule ya bantu neikale mu miaba nkama pa buloba bujima. Mu Burundi, mu Congo ne mu Zaïre nkayamu, mbalongolole mpuilu 53. Wa kumpala neikale mu dia 11-13 Kashipu ne wa ndekelu, mu dia 19-21 Kabitende. Pamu’apa dimue dia ku madisangisha aa a matuku asatu​—Ditanu too ne ku Dia lumingu—​nedikale mu tshimenga tshidi pabuipi ne muaba uudi musombele.

Neupetele masanka ku dishidimunyibua divulavulayi dikuatshishi dia mu Bible. Mu miaba mivule programe neatuadije ne mijiki mu dinda dionso pa dîba 9:30. Dinda dia mu Ditanu kudi minute 25 ya dielangana nkonko ne bantu bena nsombelu idi milengibue bikole kudi ditabuja diabu mu Dîyi dia Nzambi. Tshitupa tshia kumpala etshi netshikomeshibue ne muyuki wa nshindamenu wa “Dienda bua ditabuja, ki mbua dimona.”

Muyuki wa kumpala wa mu Ditanu mu mapingaja neukonkonone tshitupa tshia mushinga mukole tshidi natshi bansonga mu tshisumbu tshia bena nkristo. Muyuki mukosolola wa bitupa bisatu udi ulonda neukonkonone mêyi-makulu a mu Bible bu mudiwu mu diumvuangana ne bienzedi bia Buena-nkristo mu ngakuilu, ngenzelu wa malu, ne tshimuenekelu tshia muntu. Pashishe muyuki wa “Dimukilayi dipanga ditabuja” ne wa “Dîyi dia Nzambi didi ne muoyo” idi izangika mubelu mulenga wa mu Ebelu nshapita 3 ne 4. Programe wa mu Ditanu neakomeshibue ne muyuki wa “Mukanda bua bantu bonso.”

Muyuki wa kumpala wa mu Disambombo mu dinda udi ne: “Ditabuja dikena midimu ndifue.” Muyuki mukuabu wa mushinga mu dinda adi, “Ikalayi bele miji ne bashindame mu bulelela,” udi umvuija mudi dikola dia mu nyuma mua kuenjibua. Tshitupa etshi netshijike ne muanda wa pa tshibidilu wa mu mpuilu, “Ditabuja mu Dîyi dia Nzambi didi difikisha ku batismo,” panyima pa muyuki eu nekuikale ndongoluelu bua bayidi bapiabapia badi ne bua kutambuishibua.

Muyuki wa dituadija nawu mu Disambombo mu mapingaja, “Luanganayi mvita mikole bua ditabuja,” udi ukonkonona mubelu wa mukanda wa mu Bible wa Yuda. Muyuki mukosolola wa dîba dijima ùdì ne mutu wa bualu “Tuyayi mu nzubu wa Yehowa” neukonkonone malengela a bisangilu bia bena nkristo. Dituku adi programe udi ujika ne muyuki wa “Ngikadilu wa ditabuja diebe​—Mmuteta mpindieu.”

Programe wa mu Dia lumingu mu dinda udi uzangika muyuki mukosolola wa bitupa bisatu wakonkonona mukanda wa mu Bible wa Yoele, pamue ne ditumika diawu mu matuku etu aa. Pashishe kudi kulonda drama wa mu Bible udi ne mutu wa bualu ne: “Lama dîsu diebe dipepele.” Muanda munene wa mpuilu ke muyuki wa patoke wa mu mapingaja, “Ditabuja ne nsombelu webe wa matuku atshilualua.”

Bushuwa neunemeshibue mu nyuma pa kuikala mu mpuilu eu. Nebakuakidile bilenga ne muoyo mujima mu tshitupa tshionso. Udilongolole kutuadija ku mpindieu bua kubuelamu. Bua muaba udi nebe pabuipi menemene, ebeja ku Nzubu wa Bukalenge wa Bantemu ba Yehowa wa muaba uudi musombele peshi fundila bapatudi ba tshibejibeji etshi. Udi mua kusangana kabidi adrese ya miaba ya mpuilu mu Burundi, mu Congo ne mu Zaïre mu nimero wa Tshibumba tshia Nsentedi wa dia 15 Luishi.