“Basamunyi bena disanka” Mpuilu wa distrike wa Bantemu ba Yehowa
Matuku asatu a masanka a dilongesha dia Bible mmakuindile. Ne mpuilu 180 mienzela programe mu Etats-Unis patupu, pamu’apa mpuilu kampanda neenjibue pabuipi ne muaba uudi musombele. Ikala kuoku padi programe utuadija ne mijiki pa dîba 9:40 wa dinda mu Ditanu.
Programe wa mu Ditanu mu dinda neikale muenza ne mêyi a dijingilangana nawu difika dilenga pamue ne muyuki wa nshindamenu: “Batekibue ku luseke bu Basamunyi bena disanka pa buloba bujima.” Mu mapingaja, programe neashindamene pa bansonga, baledi, ne dishidimuka. “Ndiku mudiakaje bua kubuela mu dibaka anyi?” mmuyuki udi bansonga kabayi ne bua kupumbisha. Baledi badi ne bua kuteleja ne ntema yonso muyuki: “Baledi badi basanka mu bana babu.” Programe wa mu mapingaja neakomeshibue ne muyuki: “Dimanya dia mukanda—Tumika nadi bua kusamuna Yehowa.” Tshidi tshikonkononyibue tshidi ne bua kuambuluisha bansonga bua kulubuluka mu kalasa.
Programe wa mu Disambombo mu dinda neazangike batismo, ne tshikondo netshifidibue bua aba badi bakumbaje malu malomba bua kubatijibua. Mu mapingaja nekuikale dikonkonona dia mpoko pa mudi Satana katshia ku bikondo bia ku ntuadijilu mutumike ne dijinga dia kusangila bua kukuata bantu mu buteyi. Nekuikale kabidi muyuki mukole: “Epukayi mateyi a Diabolo.” Programe wa dituku neatue ku tshibungubungu ne muyuki wa mushinga: “Bua tshinyi bukua-bantu budi bukengela dimanya dia Nzambi.”
Mu Dia lumingu mu dinda, muyuki mukosolola udi ne tshiena-bualu: “Basamunyi bena disanka ku nkomenu wa ndongoluelu eu” neushindamene pa malu adi anyukula buloba bujima matutekela buludiludi kumpala. Neuzangike mudibi bikengela kunyemena kakuyi dijingakana ku muaba kudi bukubi kumpala kua dituadija dia “dikenga dinene” diakakula Yezu Kristo bualu buadi, bu mudibi bifunda mu Matayo 24:21.
Programe mu Dia lumingu mu dinda neakomeshibue ne drama wa mushinga: “Tunemekayi aba badi bakanyine mu bidimu biabo bia bukulakaje.” Pashishe, mu mapingaja, muyuki wa patoke: “Samuna Mukalenge wa kashidi!” newenjibue. Newikale muanda munene wa nshindamenu wa mpuilu.
Enza madilongolola bua kubuela. Bua kumanya muaba wa mpuilu wenzekela pabuipi menemene ne nzubu webe, uye ku Nzubu wa Bukalenge wa Bantemu ba Yehowa wa tshitupa tshiudi, peshi ufundile bapatudi ba tshibejibeji etshi. Nimero wa mu dia 8 Kabalashipu wa Réveillez-vous! neatele adrese ya miaba yonso ya mpuilu mu Etats-Unis, Canada, Grande-Bretagne, ne Irlande.