Bamanyishi ba Bukalenge badi balonda

“Bakatungunuka kabayi balekela”

BIANGATSHILE ku matuku a Yezu Kristo ne bapostolo bende, bamfumu ba malu a Nzambi mbatumike ne mishindu yonso mu madikolela bua kupumbisha bumanyishi bua lumu luimpe lua Bukalenge bua Nzambi. Bavua misangu ne misangu babambidika bapostolo ne “babatumina dîyi” kudi bamfumu ba muaba awu mu Yeruzaleme bua ‘kabambi malu mu dîna dia Yezu.’ (Bienzedi 5:27, 28, 40) Kadi, muyuki wa Bible udi ulonda ne: “dî dia Nzambi diakadiundadiunda, bayidi bakadi bavulangana ba bungi mu Yelushaleme.”​—Bienzedi 6:7.

Bidimu binunu bibidi kunyima tutshidi tusangana bamfumu ba malu a Nzambi mu Izalele badi basongakaja bamfumu ba muaba awu bua kukandika mudimu wa bena nkristo balelela mu ditunga adi. Bua bifimpakaji bia bena malu a Nzambi banekeshi, mu Kasuabanga 1987, bamfumu ba muaba awu ku Tel Aviv, mu Izalele, bakatumina Bantemu dîyi bua kulekela bisangilu bia bena nkristo ku Nzubu wa Bukalenge udi usanganyibua mu biro bia filiale bia Société Watch Tower. Dîyi edi diakakumbajibua mu Kasuamansense 1989. Bua kutumikila, Bantemu bavua benza bisangilu biabu mu nzubu mifutshila muaba awu munkatshi mua bidimu bisatu eku Nzubu wa Bukalenge wabu mushale kayi wambuluisha.

Mu tshikondo tshimue tshimue atshi, bakakuatshila Kabadi Kanene ka Izalele bualu ebu. Biro bia prokirere jenerale wa ditunga edi biakakonkonona didibingisha difila kudi Bantemu ne biakamba ne: dilomba diabu nedikumbajibue bualu mukenji uvua mushindamene pa kansungansunga kadi kamueneka patoke mu malu a Nzambi. Nunku, bamfumu ba muaba awu kabavua ne bukuabu bualu bua kuenza anu kushintulula dipangadika diabu, ne Bantemu ba Yehowa bakapingana ne disanka dionso ku Nzubu wa Bukalenge wabu.

Mudimu wa buambi bua malelela a Bible wakaluka tshianyima munkatshi mua bidimu abi anyi? Nansha kakese! Tshikondo tshia dikangibua dia Nzubu wa Bukalenge, kuvua bisumbu bibidi mu Tel Aviv ne kasumbu ka dilonga Bible katapuluke pabuipi ne tshimenga tshia Lod. Bidimu bisatu kunyima, pakunzulululabu Nzubu wa Bukalenge, bungi bua Bantemu ba Yehowa buakavula pa kulua bisumbu binayi, ne kasumbu kapiakapia ka dilonga Bible kavua kadisangisha ku Beersheba.

Didiunda mu Izalele ki ndishikile anu ku bisumbu binene bia miakulu ya tshiena-Arabe ne tshiena-Ebelu to. Nkuenzeke dikukila dinene dia bena tshimuangi badi bafumine ku Union Soviétique wa kale, nunku Bantemu ba Yehowa badi bakula tshiena-Russie mbaditue mu diabanyangana lumu luimpe nabu. Bimue bisangilu bia muakulu wa tshiena-Russie bidi bienzeka mu bisumbu bisatu; bantu bapite pa lukama mbafume ku didisangisha matuku adi panshi aa bua mpuilu wa tshiena-Russie.

Kakuyi mpata, bena malu a Nzambi bena kansungansunga nebatungunuke ne kampanye kabu kenzela ntendelelu mulelela. Kadi bamanyishi ba Bukalenge mbatungunuke ne kuidikija bena nkristo ba mu siekele wa kumpala, nansha muvuaku buluishi, “bakatungunuka kabayi balekela kulongesha ne kumanyisha lumu luimpe pa Kristo, Yezu.”​—Bienzedi 5:42, NW.